JOPE 5
5
A ka rarawa sa tubu e na vuku ni ca ni tamata, 1-7. E vinaka vua sa rarawa me nanuma vua na Kalou, 8-16. Ena qai yaga na ka rarawa vua sa vakararavi vei koya, 17-27.
1Mo ia mada na kaci; de dua beka me via rogo mai vei iko?
Ia ko cei vei ira era a yalosavasava mo goleva?
2Ni sa vakamatea na tamata lialia na yaloca,
A sa vakarusai koya sa sega ni vuku na vuvu.
3Au sa kunea na lialia ni sa vakawakana tu:
Ia ka'u a kaya vakasauri me sa ca na nonai tikotiko.
4Sa yawa ni tiko vinaka ko iratou na luvena,
A ra sa butuqaqi mai na matamata-ni-koro,
A sa sega e dua me vakabulai ira.
5Sa kania na kedra vuata ko koya sa viakana,
A sa kauta tani mai na loma ni kau votovotoa,
A sa tiloma na nodra i yau ko koya sa viagunu.
6E dina sa sega ni tubu na ca mai na kuvu-ni-soso,
A sa sega ni tubu mai na qele na rarawa;
7A sa sucu ga na tamata me rarawa,
Me vaka ni sa dauvuka cake na lidi-ni-buka.
8Ia koi au ka'u na golevi koya kina na Kalou,
Ka'u na vakalaiva na noqu ka vua na Kalou.
9Ko koya sa cakava tiko na ka levu ka sa sega ni kilai rawa;
Na ka e veivakurabuitaki sa sega ni wili rawa:
10Ko koya sa vakatauca na uca ki vuravura,
Ka sa solia na wai ki na veiwere:
11Me vakatikori ira ki cake era tiko era;
Me ra vueti cake me ra tiko vinaka ko ira sa dautagi.
12Sa vukica ko koya na nodra i lawaki na tamata qaseqase,
Ka sa sega kina ni kitaka rawa na ligadra na ka era segata tiko.
13Sa coriti ira na vuku e na nodra qaseqase;
A sa biliga tani na nodra lewa na yalovakatani.
14Era sa ciciva na butobuto ni sa siga tu,
A ra sa vakayayamo voli e na siga levu me vaka e na bogi.
15Ka sa vakabula na dravudravua mai nai seleiwau;
Mai na gusudra, kei na ligadra na kaukauwa.
16A ka oqo sa nuidei kina ko koya na dravudravua,
Ka sa sogorubu na gusuna sa sega ni dodonu.
17Raica, sa kalougata na tamata sa vunauca ko koya na Kalou:
A ka oqo mo kakua kina ni beca ni sa vakararawataki iko ko Koya sa Kaukauwa:
18Ni sa vakararawataka, a sa vivia talega:
Sa vakamavoataka, a sa vakabula talega e na ligana.
19E na ka rarawa e ono, ena vakabulai iko ko koya:
Ia e na kenai kavitu, ena sega na ca me tauvi iko.
20Ni sa dausiga, ena vakabulai iko mai na mate:
E nai valu talega, mai na kaukauwa ni seleiwau.
21Ko na vunitaki mai na kaukauwa ni vosa:
Ia ni sa lako mai na veivakarusai, ko na sega ni rerevaka.
22Ko na dredrevaka na veivakarusai kei na dausiga:
Ko na sega talega ni rerevaka na manumanu ni vanua.
23Ni dou na tovata kei na veivatu ni vanua;
Ka ra na veivinakati kei iko na manumanu ni vanua.
24Ia ko na kila talega ni na sautu na nomu vale;
Ia ko na taleva na nomu i tikotiko, ka na sega na ka e yali kina.
25Ko na kila talega ni ra na le vuqa na luvemu,
Ia na nomu kawa ena vaka na co ni vanua.
26Ko na yaco ki na nomu i bulubulu ni ko sa qase vinaka mai,
Me vaka nai vau sila sa yau mai e na kena gauna.
27Raica oqo keitou sa qaqa ka sa vakakina;
Mo rogoca, ka kila talega mo vinaka kina.
Currently Selected:
JOPE 5: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
