JOPE 4
4
Sa vunauci Jope ko Elifasi, ka sa vaka ni sa dauyaco na cudru ni Kalou vei ira nai valavala ca, 1-11. Sa tukuna na raivotu me malumalumu mai na yalo i Jope, 12-21.
1Sa qai vosa ko Elifasi na kai Temani, ka kaya,
2Kevaka keitou sa vakatovolea me vosa vei iko, ko na yaloca beka?
Ia ko cei e tarovi koya rawa me kakua ni vosa?
3Raica, ko a vakavulici ira na lewe vuqa,
Ia ko a dauvakaukauwataka na liga malumalumu.
4A nomu vosa sa dautokoni koya sa voleka ni bale;
Ko sa dauvakaukauwataka na duru malumalumu.
5Ia oqo ni sa yacovi iko, ko sa yalowai,
Ni sa tauvi iko, ko sa kidroa.
6Sa sega beka ni ka ko tu dei kina na nomu rerevaka na Kalou,
Kei na vu ni nomu i nuinui na nomu i valavala dodonu?
7Mo nanuma mada, se ko cei e rusa ni sa sega ni cala?
Se muduki laivi maivei na daucaka dodonu?
8E vaka ga oqo na ka ka'u sa dauraica, ko ira era sa daucuki e na caka ca,
Ka kaburaka nai valavala ca, era sa tamusuka ga na ka ko ya.
9Ni sa ceguvi ira na Kalou era sa rusa,
Ia ni sa liwavi ira na nona cudru era sa oti laivi.
10Na tagi ni laioni, kei na domo ni laioni veikata,
Kei na batidra na luve ni laioni sa vorolaki.
11Sa mate na laioni qase ni sa sega na ka e cova,
A ra sa dui vakasesei na luve ni laioni yalewa.
12Ia sa tukuni lo vei au e dua na ka,
A sa rogoca na daligaqu e dua na tikina lailai.
13Ni'u a vakanananu tiko ki na raivotu ni bogi,
E na gauna sa daubiti ira na tamata sa moce lutu,
14Sa tauvi au mai na rere, kei na sautaninini,
Ka sa yavavala kina na suiqu kecega.
15Sa qai lako voli e mataqu e dua na yalo;
Sa tu dodonu na vutika ni yagoqu:
16Sa wavu tu mai, ia ka'u sa sega ni kunea rawa na kenai rairai:
Sa tu e mataqu e dua na raivotu;
Sa tu lo ga, au sa qai rogoca e dua na domo, sa kaya,
17Me dodonu beka na tamata malumalumu, ka cala na Kalou?
Se savasava beka na tamata, ka sega ni savasava ko Koya ka Buli koya?
18Raica, sa sega ni vakadinati ira na nona tamata;
A sa vakacalai ira na nona agilose:
19Ena qai vakaevei ko ira sa tiko e na vale qele,
A nodra yavu na kuvu-ni-soso,
Ka sa butuqaqi ira na sarasara?
20Era sa vurumemei tiko mai na mataka ka yacova na yakavi:
Era sa yali laivi tu ga ka sega e nanuma kina:
21E dautakali vei ira na kedra vinaka, se segai?
Era sa ciba, ia ka sa sega na nodra vuku.
Currently Selected:
JOPE 4: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
