JOPE 41
41
Sa tukuna na livaiacani na Kalou.
1Ko sa yavia rawa beka mai na livaiacani e na siwa?
Se vauca na yamena e na dali ko sa vakatukuca sobu?
2Ko na daramaka beka e dua na dali ki na ucuna?
Se cula basika na galegalena e nai qila?
3Ena masuti iko vakalevu beka?
Ena vosa vakamalumalumu vei iko?
4Ena ia beka na veiyalayalati kei iko?
Ko na kauti koya li me nomu tamata ka tawa mudu?
5Drau na qito kaya beka me vaka ko qito kei na manumanu vuka?
Se ko na vauca me nodra na nomu vada?
6Ko ira na veitokani, era na cakava beka me nodra ka ni vovoli?
Era na vota beka vei ira na dauveivoli?
7Ko na vakaosoosoya beka na kulina e na saisai aironi?
Se na uluna e na moto ni ika?
8Mo tabaka e na ligamu;
Nanuma na veivaluti, ka kakua ni kitaka tale.
9Raica, sa sega ni yaga na nanuma me rawai ko koya:
Ena domobula e dua ni sa raica walega, se segai?
10Sa sega e dua sa doudou me via vakacudruya:
Ia ko cei na yatedei me qai tu rawa e mataqu?
11Ko cei sa solia taumada vei au, me'u sauma tale vua?
A ka kece sa tu e ruku ni lomalagi sa noqu ga.
12Au na sega ni galutaka na veitiki ni yagona,
Se nona kaukauwa, se nona vatukai vinaka.
13Ko cei sa luvata rawa na nonai sulu esau?
Se ko cei me torova na nonai tarovi sa taqarua?
14Ko cei me basuka nai sogo ni matana?
Sa ka rerevaki tu na batina ka tu volita.
15Sa dokai koya e na vuku ni varina,
Sa sogodregati matua vata sara;
16Sa vakata vata e dua na tikina ki na dua na tikina tani,
Me dredre kina ni curuma na cagi;
17Sa sema vata e dua na tikina ki na kenai sa,
Sa veikabi ga, me dredre kina ni tawase.
18Ni sa suru ko koya, sa cila mai kina na rarama;
Ia na matana sa vaka ni sa kida na mataka:
19Sa lako mai na gusuna na cina caucaudre,
Sa lidi maikina na mata ni bukawaqa:
20Sa kuvu mai na ucuna na kubou,
Me vaka mai na kuro sa kere, se na lovo:
21A nonai cegu sa vakawaqaca na qilaiso ni buka,
Ka sa lako mai na gusuna na yameyame ni buka.
22Sa tiko e domona na kaukauwa,
Ka sa vuki na rarawa me reki e matana.
23A ua ni lewena sa veikabiti vata:
Sa kaukauwa tu; sa sega ni yavalati rawa.
24Sa kaukauwa na lomana me vaka na vatu:
Io, sa kaukauwa me vaka na tiki ni vatu i qaqi e ra.
25Ni sa tu cake ko koya, era sa rere na qaqa:
Ni sa yavala, sa yali na yalodra.
26Ai seleiwau ni tamata sa yaviti koya sa sega ni lau:
Sa vakakina na moto, se nai wau, se na saisai.
27Sa nanuma na aironi ko koya me co malai, Kei na parasa me kau vuca.
28Ena sega ni dro e na vuku ni gasau:
A vatu sa rabotaki sa vukica me vu-ni-sila:
29A i wau sa nanuma ko koya me vu-ni-sila:
Sa dredrevaka na rorogo ni moto.
30Sa tu e rukuna na caca ni kuro gagata:
Sa koto e na ka gagata e na lolobo.
31Sa vakerea na wai titobu me vaka na kuro:
Sa vakerea na waitui me tautauvata kei na kuro wali.
32A we ni nonai lakolako sa caucaudre:
Eda vakasama ua wai titobu me sika mai.
33Sa sega e vuravura me tautauvata kaya,
Sa buli me sega ni rere rawa.
34Sa raiwaletaka na ka cecere kecega:
Sa turaga ko koya vei ira kecega na gone dauviavialevu.
Currently Selected:
JOPE 41: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
