JOPE 42
42
Sa vakamalumalumutaki koya ko Jope vua na Kalou, 1-6. Sa vunauci iratou na wekana ko koya, a sa vakaroti me ratou sorovaki iratou, ka sa vakadonui na masu i Jope, 7-10. Sa vakalevulevui Jope na Kalou, 11-15. Sa mate ko Jope ni sa qase sara. 16.
1Sa qai vosa vei Jiova ko Jope, ka kaya,
2Au sa kila ni kemuni sa rawata na ka kecega,
A sa sega ni tarovi rawa e dua na ka ko ni sa nanuma.
3Ko cei oqo sa vakabutobutotaka na lewa ka yali na vuku?
O koya ka'u a cavuta kina na ka ka'u a lecava, Na ka e veivakurabuitaki vei au, ka'u a sega ni kila.
4Mo ni rogoci au mada, ni'u sa vosa;
Ka'u na tarogi kemuni, ia mo ni vakatakila mai vei au.
5Ka'u a rogoci kemuni e na daligaqu walega;
Ia sa qai raici kemuni na mataqu:
6O koya oqo ka'u sa beci au sara kina, ka veivutuni
E na kuvu-ni-soso kei na dravusa.
7Ia ni sa vosataka oti ko Jiova na vosa oqo vei Jope, sa qai kaya vei Elifasi na kai Temani ko Jiova, Sa waqa na noqu cudru vei iko, vei rau talega na wekamu ruarua: ni dou sa sega ni vosataki au vakadodonu, me vakataki Jope na noqu tamata. 8O koya oqo mo dou kauta mada kina e vitu na pulumokau, ka vitu na sipi tagane, ka lako vua na noqu tamata ko Jope, ka vakacabora nai soro kama e na vukumudou: ena qai masulaki kemudou ko Jope na noqu tamata, ni'u na goleva na matana, de'u kitaka vei kemudou me vaka na nomudou lialia, ni dou a sega ni vosataki au vakadodonu me vakataki Jope na noqu tamata.
9Eratou sa qai lako ko Elifasi na kai Temani, kei Pilitati na luve i Sua, kei Sofa na kai Neama, ka cakava me vaka ka vakarota vei iratou ko Jiova: ka sa vakadonui Jope ko Jiova.
10Ka sa vukica na veivakabobulataki i Jope ko Jiova, ni sa masulaki iratou na wekana: a sa solia vei Jope ko Jiova na ka sa levu cake, io sa vakaruataka na ka ka tu vua eliu. 11Sa qai lako mai vua ko iratou na tacina kecega, kei iratou na ganena kecega, kei ira kece era veiwekani kaya eliu, a ra sa kana madrai vata kaya e nona vale: a ra sa tagicaki koya, ka vakacegui koya e na vuku ni ka rarawa kecega sa vakayacora vua ko Jiova: ka ra sa dui solia vua e dua na tiki ni siliva, ka dua na sau koula. 12Ka sa vakalougatataka vakalevu ko Jiova na veiyabaki i Jope sa muri, ka vakalailai eliu: ni sa dua na oba ka va na udolu na nona sipi, ka ono na udolu na kameli, ka rua na udolu na pulumokau, ka dua na udolu na asa yalewa. 13Ka sa le vitu na luvena tagane ka le tolu na luvena yalewa. 14A sa vakayacana na kenai matai, ko Jimaima; kei na yacana nai karua, ko Kesaia; kei na yacana nai katolu, ko Kereni-apuka. 15Ka sa sega ni kune e na vanua taucoko ko ya na yalewa sa matavinaka me vaka na luve i Jope: a sa vota vei iratou ko tamadratou nai votavota e na kedra maliwa na ganedratou. 16Sa oti oqo sa bula tiko ko Jope ka dua na drau ka vasagavulu na yabaki, ka raici iratou na luvena, kei na luvedratou na luvena, me va nai tabatamata. 17A sa mate ko Jope, ni sa qase mai ka vuqa na nona yabaki.
Currently Selected:
JOPE 42: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
