JOPE 40
40
Sa vakamalumalumutaki koya ko Jope vua na Kalou, 1-5. Sa cikevi Jope ko koya me vakatakila ni sa dodonu, ka kaukauwa, ka vuku, 6-14. Sa tukuna na piimoci, 15-24.
1Sa vosa tiko vei Jope ko Jiova ka kaya,
2Ko koya sa veileti kei Koya sa Kaukauwa, ena vakavulici koya beka talega?
Ko koya sa vunauca na Kalou, me vosa mada kina.
3Sa qai vosa vei Jiova ko Jope, ka kaya,
4Ni raica ga, ni'u sa ka walega; a cava me'u kaya vei kemuni?
Au sa tabonaka na gusuqu e na ligaqu.
5Au sa vosa oti vakadua: ia ka'u na sega ni vosa tale:
Io, sa vakarua: ia ka'u na sega ga ni kuria.
6Sa qai vosa tale vei Jope ko Jiova mai na covulaca, ka kaya,
7Mo vauca mada vakatagane na tolomu:
Ka'u na vakatarotarogi iko, ia mo vakatakila mai vei au.
8Ko na via vakatawayagataka beka na noqu lewa?
Ko sa via vakacalai au, mo dodonu kina ko iko?
9A ligamu beka sa vaka na liga ni Kalou?
Se ko sa kurukuru rawa beka e domomu me tautauvata kaya?
10Mo vakaiukuukutaki iko mada e na ka vakaturaga kei na vakarokoroko;
Ka vakaisulutaki iko e nai ukuuku kei na lagilagi.
11Mo duibiubiuta na katakata ni nomu cudru:
Ka raici ira yadua era viavialevu, ka vakamalumalumutaki ira.
12Mo raici ira kecega era viavialevu, ka vakamalumalumutaka,
Ka buturaki ira nai valavala ca e na nodra i tikotiko.
13Mo vunitaki ira vata e na kuvu-ni-soso,
Sogolati ira e na vanua vuni.
14Ka'u na qai vakadinadina vei iko,
Ni sa vakabulai iko rawa na ligamu i matau.
15Mo raica mada na piimoci, ko koya ka'u sa bulia vata kei iko:
Sa daukana co me vaka na pulumokau.
16Mo raica mada, sa tiko e tolona na nona kaukauwa,
Kei na nona gulevu sa tu e na ua ni ketena.
17Sa sautakurekure na buina ka sa vaka na sitari:
Na dali ni sagana sa tobe vata.
18A suina sa vaka na paipo parasa kaukauwa;
A suina sa vaka na uma aironi.
19Ko koya ka uasivi e na cakacaka ni Kalou:
Ko koya sa bulia sa solia vua na nonai yaragi.
20Sa tubura dina na kena na veiulu-ni-vanua,
A ra sa dauqito maikina na manumanu kecega ni vanua.
21Sa koto e ruku ni kau rugurugua,
E na ruku ni gasau kei na lolobo.
22Sa vakarurugi koya na yaloyalo ni kau rugurugua;
Sa tu voliti koya na wilou mai na wai drodro.
23Raica, ni sa vuabale na uciwai, sa sega ni rere ko koya;
Sa yatedei ga ni sa drodro sara mai na Joritani ki na gusuna.
24Ena rawai koya beka e dua ni sa rai tiko?
Se na cula rawa na ucuna e nai cori?
Currently Selected:
JOPE 40: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
