JOPE 39
39
Sa tarogi Jope na Kalou e na vuku ni me kei na teira, 1-4; kei na asa kila, 5-8; kei na iunikoni, 9-12; kei na belo, 13-18; kei na ose, 19-25; kei na manulevu, 26; kei na ikeli, 27-30.
1Ko sa kila beka nai tabayabaki sa vakasucu kina na me kila ni uluvatu?
Se ko sa kila rawa na gauna sa vakasucu kina na teira?
2Se ko sa wilika rawa na vula era yacova?
Se ko kila nai tabayabaki era vakasucu kina?
3Era koto era, ka ra vakasucuma na luvedra,
Era biuta tani na nodra yaluma.
4Sa yago vinaka na luvedra, era tubu cake mai veikau;
Era lako tani, ka sega ni lesu tale vei ira.
5Ko cei sa vakatala na asa kila me veitalia voli?
Se ko cei sa sereka nai vesu ni asa kila?
6Ka'u sa cakava na lekutu me nona vale,
Kei na talasiga me nonai tikotiko.
7Sa beci ira na lewe vuqa e na koro,
Ka sa weletaka na nona kaila na vakacici manumanu.
8A kena vanua me kana voli kina na veiulu-ni-vanua,
A sa qara na co drokadroka kecega.
9Ena via qaravi iko beka na iunikoni; se na via tiko e na nomu lomanibai?
10Ko sa vauca rawa beka na iunikoni e na kena dali ki nai siviyara?
Se na muri iko ni yara ka kadrukadru e na buca?
11Ko na vakararavi vua ni sa levu na nona kaukauwa?
Se ko na biuta beka vua na nomu i tavi cakacaka?
12Ko na vakararavi vua me kauta mai na nomu sila,
Ka yauta mai ki na nomu lololo?
13A taba ni ositereji sa daumarau!
Ia na tabana kei na lawena sa yaga li ki na luvena?
14Sa vakalutuma na kena yaloka ki na qele,
Ka vakatakatataka e na kuvu-ni-soso,
15Ka sa sega ni nanuma ni na butuka beka na tamata,
Se na buturaka na manumanu kila.
16Sa loma kaukauwa vei ira na luvena, me vaka era sega ni nona;
Sa oca wale ko koya, ka sa sega ni rere;
17Ka ni sa sega ni soli vuku vua na Kalou,
Ka sa sega ni vakayalomatuataki koya.
18Na gauna sa wavu tu vakadodonu cake kina ko koya,
Ena beca na ose kei koya sa vodoka.
19Ko sa solia beka vua na ose na kaukauwa?
Ko sa vakatobetaka na domona e na tobe kurekure?
20Ko sa qisi koya beka me rika me vaka na vodre?
Na suru ni ucuna sa ka rerevaki.
21Sa qeva na buca e na yavana, ka reki e na nona kaukauwa:
Sa la'ki tavaki ira na tamata era vakaiyaragi tu.
22Sa dredrevaka na rere, ka sa sega ni taqaya;
Sa sega talega ni dro tani mai nai seleiwau.
23Sa qiriti koya na taga ni gasau,
Kei na moto makamakalivata kei nai sasabai.
24Sa tiloma na qele e na nona lomakatakata kei na cudru:
Ka sa sega ni tu vakadua ni sa qai uvu na davui.
25Sa vakaueue ki na domo ni davui;
A sa boica nai valu ni sa yawa tu,
Kei na nodra kurukuru na kapiteni kei na kaikaila.
26Sa vuka cake beka na manulevu e na nomu vuku,
Ka vakatetaba me vuka ki na mata ni ceva?
27Sa vuka cake beka na ikeli ni ko sa vakarota kina,
Ka cakava maicake na nona tavata?
28Sa tiko mai na uluvatu ka sa tu dei kina,
E na bati ni uluvatu, kei na tikina dredre.
29Mai na yasana ko ya sa qara na kena;
Sa irova vakayawa na matana.
30A luvena talega sa daugunu dra:
Ia e na vanua sa no kina na mate, sa tiko kina ko koya.
Currently Selected:
JOPE 39: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
