JOPE 3
3
Sa vosavakacacataka na siga sa sucu kina ko Jope, 1-10. Sa kaya ga ni ka vinaka na mate ka ca na bula rarawa, 11-26.
1Sa oti oqo, sa qai vosavakacacataka na nona siga ko Jope.
2A sa kaya ko Jope,
3Me yali na siga ka'u a sucu kina,
Kei na bogi sa tukuni kina, Sa sucu e dua na gonetagane.
4Me butobuto na siga ko ya;
Me kakua ni nanuma kina maicake na Kalou,
Me kakua talega ni cilava na rarama:
5Me sa nodrau ga na butobuto kei na yaloyalo ni mate;
Me ubia tikoga na o;
Me ka rerevaki sara ga na kena butobuto.
6Ia na bogi oqori, me taura ga na butobuto loaloa;
Me kakua ni reki vata kei na veisiga ni yabaki;
Me kakua ni wili vata kei na veivula.
7Raica, me tu duadua na bogi oqori,
Me kakua ni rogo kina na domo ni reki.
8Me ra vosavakacacataka ko ira era sa dauvosavakacacataka na siga eso,
Ko ira era vakarau tu me yavalata na livaiacani.
9Me vakabutobutotaki na kalokalo e na kena yakavi;
Me waraka na rarama, ia me sega ga;
Me kakua talega ni kunea na mataka caca,
10Ni sa sega ni sogota na kete i tinaqu,
Ka sega ni vunia na rarawa mai na mataqu.
11A cava ka'u a sega kina ni mate ni'u sa qai sucu mai?
A cava ka'u a sega kina ni ciba ni'u ni'u sa lako mai na kete?
12A cava sa tabei au kina na duruna?
Kei na mata-ni-sucu me'u sucuma?
13Kevaka e segai, au a qai koto vakadua edaidai ka sega ni oca,
Ka'u a qai moce ga: keitou a qai cegu vata,
14Kei ira na tui kei ira na daubose kei vuravura,
Ko ira era sa cakava me nodra na yasana sa sega ni tawa;
15Se kei ira na turaga era sa vakoula,
A ra sa vakasinaita na nodra vale e na siliva;
16Se me'u tautauvata kei na lutudole me'u sa segai ga;
Me vaka na gone lalai era sa sega ni kunea na rarama.
17Sa mudu maikea na nodra veivakararawataki na tamata ca;
A ra sa vakacegu maikea ko ira era sa oca.
18Era sa vakacegu vata maikea ko ira na bobula;
Era sa sega ni rogoca na vosa ni dauveivakasaurarataki.
19Era sa tiko maikea na lalai kei na lelevu;
A sa sereki na tamata maivua na nona turaga.
20A cava sa soli kina na rarama vei koya sa rarawa,
Kei na bula vei koya sa gaga na yalona;
21Ko ira era sa gadreva me ra mate, ka sa sega ga;
A ra sa gu vakalevu kina ka vakalailai ki nai yau sa vuni tu;
22Era sa marau vakalevu,
Ka reki, ni ra sa kunea nai bulubulu?
23A cava sa soli kina na rarama vua na tamata sa vuni tu na nona sala,
Ko koya sa vakalatia na Kalou?
24Ni sa liu mai na noqu vutugu a sa muri na noqu kana,
Ka sa sova yani na noqu vakatutukua me vaka na vadugu ni wai.
25Ni sa yacovi au na ka ka'u a domobula kina,
Kei na ka ka'u a rerevaka sa qai yaco mai vei au.
26Au a sega ni tiko vinaka, se tiko wele, se tiko vakacegu;
Ka sa yaco ga mai na ka rarawa.
Currently Selected:
JOPE 3: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
