JOPE 38
38
Sa qai vosa vei Jope na Kalou, ka tukuna na nona cakacaka, me kila kina ko Jope na nona lialia kei na nona malumalumu.
1Sa qai vosa mai vei Jope ko Jiova mai na covulaca, ka kaya,
2Ko cei oqo sa vakabutobutotaka na lewa
E na vosa sa sega ni vuku?
3Mo vauca mada vakatagane na tolomu:
Ni'u na vakataroga vei iko, ia mo vakatakila mai vei au.
4Ko a tiko maivei ni ka'u a tauyavutaki vuravura?
Mo tukuna mai, kevaka ko sa kila.
5Ko cei ka lewa na kenai vakarau, kevaka ko sa kila?
Se ko cei ka dreta kina na dali i vakarau?
6Sa tauyavutaki e na dela ni cava?
Se ko cei ka tea na kena vatu i tutu;
7Ni ra a sere vata na kalokalo i volasiga,
Ka ra kaila e na reki ko ira kecega na luve ni Kalou?
8Se ko cei ka sogolatia na wasawasa e nai sogo,
Ni sa loka, me vaka ni sa curu mai na kete?
9Ni'u a cakava na o me kenai sulu,
Kei na butobuto loaloa me kenai vau,
10Ni'u a vakarauta na kenai yalayala,
Ka cakava na kenai vakadei kei na kenai sogo,
11Ka kaya, Mo yaco mai ki ke, kakua ni sivia:
Ia me yala ga eke na nomu ua sa viavialevu?
12Ko sa vakarota beka na mataka e na nomu gauna,
Ka vakatakila ki na mataka na vanua me kida kina?
13Me taura nai yalayala kei vuravura,
Me ra kureitaki tani kina ko ira nai valavala ca?
14Sa vuki oqori me tautauvata kei na tete ki na ka sa tabaki kina;
A sa tu mai na ka ko ya me vaka nai sulu.
15Sa bureitaki vei ira nai valavala ca na kedra rarama,
Ia ena ramusu na liga sa viavialevu.
16Ko sa curuma beka nai vurevure ni waitui?
Se ko sa lako voli e na dreke ni wasawasa;
17Se sa dola oti vei iko na katuba kei mate?
Se ko sa kunea na kenai sogo ni yaloyalo ni mate?
18Se ko kila beka na kena raraba ni vuravura?
Tukuna mai kevaka ko kila na ka kecega oqo.
19Sa evei na gaunisala sa tiko kina na rarama?
Ia na butobuto, sa evei na kena vanua,
20Mo kauta kina ki na kenai yalayala,
Mo kila talega kina na sala ki na kena vale?
21Ko sa kila beka ni ko a qai sucu?
Se ni sa vuqa nai wiliwili ni nomu siga?
22Ko sa curuma beka na lololo ni uca-vulavula?
Se ko sa raica na lololo ni uca-cevata,
23Ka'u sa maroroya ki na gauna ni rarawa,
Ki na siga ni tuvai valu kei nai valu?
24A sala cava sa wase kina na rarama,
Sa veibiuyaki kina na cagi mai na tu-i-cake e vuravura?
25Ko cei sa wasea na sala ni wai me tau mai kina ni sa vuabale,
Se na sala me sei kina na kurukuru;
26Me tau kina na uca ki na vanua sa sega kina na tamata;
Kei na lekutu, sa sega kina na tamata;
27Ka me vakamamautaka na vanua sa lala ka sega ni teivaki;
Me vakatubura talega na mata ni co malumalumu me rovu mai?
28Sa vakatamani beka na uca?
Se ko cei beka sa vakatubura na mata ni tegu?
29A kete i cei sa lako maikina na wai cevata?
A tegu cevata talega ni lomalagi, ko cei sa vakasucuma?
30Sa tabogo na wai me vaka e na vatu,
Ka sa cevata na dela ni wai titobu.
31Ko na vauca vata rawa na veikalokalo ko Peliatisi,
Se sereka nai vau kei Oraioni?
32Ko na kauti Masaroci beka mai e na kena gauna?
Se tuberi Akituro yani kei ira na luvena?
33Ko sa kila beka nai valavala ni kena lewai na lomalagi?
Ko sa vakayacora rawa, mai na kena lewa ki vuravura?
34Ko sa tabalaka rawa beka na domomu ki na o,
Me tauci iko na wai levu?
35Ko na vakatala rawa beka na livaliva, me lako yani, Me mai kaya vei iko,
Koi keitou ga oqo?
36Ko cei sa vakacuruma na vuku ki na lomada?
Se ko cei sa vakayalomatuataka na tamata?
37Ko cei sa wilika rawa na o kei lomalagi e na nona vuku?
Se ko cei ka livia rawa na wai mai na tavaya kei lomalagi,
38Ni sa kaukauwa mai na kuvu-ni-soso,
Ka veikabi sara na qele qa?
39Ko na vakasasa beka na kena kakana na laioni?
Se vakamamautaki ira na luve ni laioni ni ra sa viakana,
40Ni ra sa koto sobu e nodra i kotokoto,
Ka tiko ga e na tikina vuni ni ra lawa koto?
41Ko cei sa solia na kena na reveni,
Ni sa tagi na luvena vua na Kalou,
Era sa lako sese voli ni sa sega na kedra?
Currently Selected:
JOPE 38: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
