JOPE 36
36
Sa vosa tiko ko Ilaiu, a sa tukuna nai valavala ni lewa ni Kalou, 1-12. Sa vunauci Jope, a sa vakavulici koya talega, 13-21. Sa tukuna na lewa kei na kaukauwa ni Kalou, 22-33.
1A sa ia tiko ko Ilaiu, ka kaya,
2Mo vosoti au mada vakalailai, ka'u na vakatakila vei iko,
Ni sa vo tiko vei au na vosa me'u totaka kina na Kalou.
3Au na kauta vakayawa mai na noqu vuku,
Ia ka'u na vakadonui Koya ka Buli au.
4Ni na sega dina ni lasu na noqu vosa:
O koya sa tiko vata kei iko, sa vinaka duaduaga na nona vuku.
5Raica, sa kaukauwa na Kalou, a sa sega ni beca e dua:
Sa levu na nona kaukauwa kei na nona vuku.
6Sa sega ni maroroi ira tiko nai valavala ca:
Ka sa ia na ka dodonu vei ira na dravudravua.
7Sa rai tikoga vei ira na yalododonu:
Era tiko ga kei ira na tui e nai tikotiko vakaturaga:
Io, sa vakataudeitaki ira tiko ka tawa mudu, a ra sa vakalevulevui.
8Ia ke sa vauci e nai vesu,
Ka tauri e nai vau ni rarawa:
9Ke sa qai vakatakila vei ira na nodra cakacaka,
Kei na nodra i valavala ca ni ra sa uasivi.
10Sa basuka na daligadra talega me ra vakatavulici,
A sa vakarota vei ira me ra saumaki mai na ca.
11Kevaka era vakarorogo, ka qaravi koya,
Era na vakaotia na nodra siga ni ra tiko vinaka,
Kei na nodra yabaki ni ra marau tiko.
12Ia kevaka era sa sega ni vakarorogo, era na mate e nai seleiwau,
Ka mate ni ra lialia tiko.
13Ia ko ira na yalodauveivakaisini era sa binia tiko na cudru;
Era sa sega ni tagi vua ni sa vauci ira.
14Sa donaci ira ga na mate,
A ra sa tiko vata kei ira sa sega ni savasava.
15Sa vakabula na dravudravua ko koya e na nona rarawa,
Ka sa basuka na daligadra ni ra vakasaurarataki.
16Ka sa via kauti iko talega mai na vanua ni rarawa
Ki na vanua rabaraba, sa sega kina na osooso;
Ka me uro talega na ka sa viritu ki na nomu tepeli.
17Ia ko sa vakayacora na nodra lewa nai valavala ca:
Ena tauri iko na kena lewa kei na kenai sau dodonu.
18Ni sa tu na cudru, mo qarauni iko de yaviti iko ko koya ko qai takali yani;
Ena qai sega ni vakabulai iko rawa e dua nai soro levu.
19Ena vinakata beka ko koya na nomu i yau?
E segai, se na koula, se na vu ni nomu kaukauwa kecega.
20Mo kakua ni gadreva na bogi,
E dauyali kina na tamata mai na nodra yasana.
21Mo qarauni iko, mo kakua ni goleva na ka sa sega ni dodonu:
Ni ko a digitaka oqo, ka cata na rarawa.
22Raica, sa vueti keda cake na Kalou e na nona kaukauwa;
Ko cei e vakatavuvuli me vakataki koya?
23Ko cei sa lesia na nonai lakolako? Se ko cei me kaya, Ko sa caka cala?
24Mo nanuma mo vakalevulevuya na nona cakacaka,
Era sa dauraica na tamata.
25Sa ra raica rawa na tamata kecega
E rawarawa me raica vakayawa na tamata.
26Raica, sa levu na Kalou, ia eda sa sega ni kilai koya;
Sa sega ni kilai rawa nai wiliwili ni nona yabaki.
27Ni sa vakuvuya cake na wai ko koya:
Sa tau maikina na uca me vaka na kena bewabewa:
28Sa tau mai na o,
Ka miriki ira na lewe vuqa.
29Sa dua beka me kila rawa nai tevutevu ni o,
Se na kurukuru mai na nona vale?
30Raica, sa tevuka ko koya na nona rarama e delana,
Ka sa ubia na dreke ni wasawasa.
31Ni sa lewai ira na veivanua e na ka oqo;
Sa solia vakalevu na kakana.
32Sa tabonaka na livaliva e na ligana:
A sa lewa na vanua me se kina.
33A kena rorogo sa tukutuku e na vukuna,
Kei na pulumokau e na vukuna ka lako cake.
Currently Selected:
JOPE 36: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
