JOPE 35
35
Sa vaka ko Ilaiu ni sa sega ni ca rawa se vinaka rawa na Kalou e na vuku ni cakacaka ni tamata, 1-8. A sa sega ni kune ka vinaka na tamata eso ni ra sega ni kerea e na vakabauta, 9-16.
1Sa ia tiko na vosa ko Ilaiu, ka kaya,
2Ko sa nanuma beka ni ka dodonu oqo,
Mo kaya, Sa uasivi cake na noqu yalododonu, sa uasivi sobu na nona yalododonu na Kalou?
3Ni ko sa taroga, A cava na betena vei au ke sa sega vei au nai valavala ca?
4Au na tukuna vei iko,
Vei iratou talega na nomu i tokani ka tiko vata kei iko.
5Mo ta cake mada ki na lomalagi, ka raica:
Ka vakaraica na o sa cecere cake vei iko.
6Kevaka ko sai valavala ca, a cava ko sa cakava vua?
Ia kevaka sa vakalevutaki na nomu talaidredre, a cava ko sa kitaka vua?
7Kevaka ko sa caka dodonu, a cava ko sa solia vua:
Se cava sa rawata maivei iko ko koya?
8Ena ca beka e na nomu i valavala ca e dua na tamata vakataki iko;
Ka na yaga beka na nomu caka dodonu vua e dua na luve ni tamata.
9Ni sa levu na veivakasaurarataki, era sa tagi kina ko ira era sa vakasaurarataki:
Era sa qoqolou e na vuku ni ligadra na kaukauwa.
10Ia sa sega e dua sa kaya, Sa evei na Kalou ka buli au,
Ko koya sa solia na sere e na bogi,
11Ko koya sa vakavulici keda vakalevu, ka vakavulici ira vakalailai na manumanu ni vanua;
Ka sa qisi keda me da vuku cake vei ira na manumanu vuka?
12Era tagi maikea ka sega e dua sa vosa mai,
E na vuku ni nodra viavialevu na tamata ca.
13E dina ena sega ni vakarogoca na ka wale na Kalou,
Ena sega talega ni goleva ko Koya sa Kaukauwa.
14Ia ni ko sa kaya ko na sega ni kunei koya rawa,
Sa tiko ga vua na lewa dodonu: o koya oqo mo vakararavi kina vua.
15Ia oqo, ni sa sega ni lako mai ko koya e nona cudru,
Ka sa sega ni nanuma vakalevu na viavialevu:
16Sa dalaga wale kina ko Jope,
Sa vakalevutaka na vosa sa sega ni vuku.
Currently Selected:
JOPE 35: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
