JOPE 31
31
Sa vaka ko Jope ni sa dautarovi koya sara ko koya mai nai valavala sa sega ni dodonu.
1Au sa ia oti na veiyalayalati kei na mataqu;
Me'u qai via nanuma vakacava e dua na goneyalewa?
2Me qai cava na noqu i votavota mai vua na Kalou maicake?
Ka cava na ka ka'u na taukena maivei Koya na Kaukauwa maicake?
3Sa sega beka ni yacovi ira nai valavala ca na rusa?
Kei na cudruvi sa dua tani vei ira sa cakava nai valavala ca?
4Sa sega beka ni raica na noqu i lakolako ko koya,
Ka wilika kecega nai cavucavu ni yavaqu?
5Kevaka ka'u a muria na ka lasu,
Se kusarawa na yavaqu me'u ia na veivakaisini;
6Me'u vakatovolei mada e nai vakarau dodonu,
Me kila kina na Kalou ni'u sa sega ni cala.
7Kevaka sa vakatikitiki tani mai na sala na yavaqu,
Ka muria na mataqu na lomaqu, Ka kabita na ligaqu e dua na ka qeleqelewa;
8Me'u qai teitei koi au, ka dua tani me kania:
Ia me cavuivuvu na noqu kawa.
9Kevaka sa gole vakatani na lomaqu vua e dua na yalewa;
Se'u lawa koto mai na nona katuba na kai noqu;
10Me qai qaqi sila na watiqu vua e dua tani,
Me ra koto vata kaya ko ira na tani.
11Ni sa ka ca sara oqo,
Io, nai valavala ca me ra cudruva ko ira na mataveilewai.
12Ni sa bukawaqa oqori sa katia me yacova na rusa,
Sa na cavuivuvu kina na noqu i yau kecega.
13Kevaka kau a beca na noqu tamata se na noqu vada,
Ni rau sa veileti kei au;
14Ka'u na qai vakaevei ni sa tu cake na Kalou?
Ia ni sa cudru ko koya, a cava me'u kaya vua?
15Ko koya sa buli au e na kete, sa sega beka ni buli koya talega?
Sa sega beka ni dua bau ga sa cakavi keirau e na kete?
16Kevaka ka'u sa bese ni solia na ka era gadreva na dravudravua,
Se'u vakaocataka na matana na yada;
17Se'u kania duadua na qau tiki ni kakana,
Me sega ni kana kina na luveniyali;
18Ni sa tubu vata kei au mai na gauna ka'u a cauravou kina, me vaka sa tubu kei tamana,
Ia ka'u sa tuberi koya na yada mai na siga ka'u a sucu kina;
19Kevaka ka'u sa kunea e dua sa mate ni sa sega na nonai sulu,
Se dua na dravudravua sa sega na ka me tutuvitaki kina:
20Kevaka sa sega ni vosavakalougatataki au na tolona;
Ka sega ni katakata ko koya e na vutika ni noqu sipi;
21Kevaka ka'u sa dodoka cake vakaca na ligaqu vei ira na luveniyali,
Ni'u sa kila sa tiko na noqu kaukauwa mai na matamata-ni-koro:
22Me qai lutu tani na ligaqu mai na civaciva ni tabaqu,
Ka me ramusu na ligaqu mai na suina.
23Ni'u a domobula de vakarusai au na Kalou;
Ia ni sa cecere cake ko koya ka'u a sega ni rawata e dua na ka.
24Kevaka ka'u a vakararavi ki na koula,
Se'u kaya ki na koula talei, Ka'u sa vakadinati iko;
25Kevaka ka'u a reki ni'u sa vutuniyau sara,
Ni sa rawata nai yau levu na ligaqu;
26Kevaka ka'u a raica na mata-ni-siga ni sa cila mai,
Se na vula ni sa weweli lako;
27Ka sa dauveretaki lo na lomaqu,
Se sa reguca na ligaqu na gusuqu:
28Oqo talega nai valavala ca me ra cudruva ko ira na mataveilewai:
Ni'u a qai cakitaki koya na Kalou maicake.
29Kevaka ka'u a reki ni sa rusa ko koya sa cati au,
Se vakalevulevui au ni sa kune ka ca ko koya:
30Ia ka'u a sega ni laiva na gusuqu me vosa cala,
Ni'u a vatonaka na yalona.
31Kevaka era sa sega ni kaya ko ira e na nona vale,
Ko cei sa kunea e dua e sega ni vakamamautaki e na nona kakana?
32Sa sega ni moce e na gaunisala na vulagi:
Au a dolava na noqu vale vua sa taubale e vanua.
33Kevaka ka'u sa vunia na noqu talaidredre me vakataki Atama,
Ni'u sa vunia na noqu i valavala ca e lomaserequ:
34Ni'u sa rerevaki ira na lewe vuqa,
Se sa vakadomobulataki au na nodra be na veimataqali,
Me'u tiko lo kina, ka sega ni curu yani ki tautuba?
35Me dua mada me rogoci au!
Raica, oqo na ka ka'u domona, me vosa mada mai vei au ko Koya sa Kaukauwa.
Me sa vola talega e dua nai vola na noqu meca.
36E dina ka'u na qai colata e na noqu i colacola,
Ka vauca vei au me noqu i sala vakaturaga.
37Ka'u na qai tukuna vua nai wiliwili ni cavucavu ni yavaqu;
Ka'u na qai toro voleka vua me vaka na turaga.
38Kevaka sa beitaki au na noqu were,
Se tagi vata kei na kena dreke;
39Kevaka ka'u sa kania na vuana ni sa sega ni voli,
Se vakavuna na nodra mate na kenai taukei;
40Me qai tubu na kau votovotoa mei sosomi ni witi,
Kei na borosou mei sosomi ni parile.
Sa oti na vosa i Jope.
Currently Selected:
JOPE 31: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
