JOPE 30
30
Sa vaka ko Jope ni sa vuki na nona vakarokorokotaki me vakalialiai, 1-15; kei na nona tiko vakasautu me tiko vakaca, 16-31.
1Ia edaidai era sa vakalialiai au ko ira era gone vei au,
Ko ira ka'u a sega ni nanuma na tamadra me yaga ni wili vata kei na koli ni noqu qele ni sipi.
2Ia ka cava na kena yaga vei au na kaukauwa ni ligadra,
Ko ira sa qase malumalumu?
3E na vuku ni viakana kei na dausiga era sa sui votu;
Era dro ki na lekutu loaloa sa lala ka dravuisiga
4Era tava na co gaga mai veikau,
Kei na waka ni junipa me kedra.
5Era vakasavi tani maivei ira na tamata,
Era kailataki ira me vaka era daubutako;
6Me ra tiko e na kikilo rerevaki,
E na qara kei vuravura, kei na veivatu.
7Era a tagi e loma ni veikau lalai;
Era soqoni vata e ruku ni kau karokaroa.
8Era luve ni lialia, io, era luve ni kaisi botoboto:
Era vakasavi tani mai na vanua.
9Ia era sa qai serekalitaki au,
Io, era sa cavuti au me'u ka lialia.
10Era vakasisilataki au; era dro vakayawa vei au,
Ka ra sa sega ni rere ni kasivita na mataqu.
11Ni sa sereka na nona dali ko koya, ka vakararawataki au,
Era sa biuta talega nai tarovi e mataqu.
12Era sa tu cake na cauravou e na ligaqu i matau;
Era biliraka na yavaqu,
Ka caramaka na nodra sala dauveivakarusai me'u ca.
13Era vakacacana na noqu sala,
Era vinakata na noqu rarawa,
Ka sa sega e dua sa vukei ira.
14Era sa yaco mai me vaka ni sa bote nai bono:
Ni sa ia na veivakarusai era sa luvuci au mai.
15Sa lesu mai vei au na ka rerevaki;
Sa ra vakasava na yaloqu me vaka na cagi:
A sa seavu na noqu tiko vinaka me vaka na o.
16Ia sa qai sova yani na yaloqu e lomaqu;
Sa kani au na veisiga rarawa.
17Sa laucoka na suiqu e na yagoqu e na bogi:
A sa sega ni vakacegu rawa na noqu ua.
18E na vuku ni kaukauwa ni noqu mate sa duatani mai na noqu i sulu:
Sa vauci au me vaka na bele ni noqu i sulu.
19Sa biuti au ko koya ki na lolobo,
Ia ka'u sa qai vaka na kuvu-ni-soso kei na dravusa.
20Au sa tagi vei kemuni, ia ko ni sa sega ni rogoci au:
Au sa tu cake, ia ko ni sa sega ni via kilai au.
21Kemuni sa vuki me yalovakatani vei au:
Ko ni sa vorati au e na ligamuni kaukauwa.
22Kemuni sa laveti au ki cake ki na cagi; ko ni sa vakavodoki au kina;
Ko ni sa vakawaicalataki au kina.
23Ni'u sa kila ko ni na vakayacori au ki na mate,
Ki na vale sa lesi me nodra kecega era bula tiko.
24Ia ena sega ni dodoka ko koya na ligana ki nai bulubulu,
Ia ka ra sa tagi ga ni sa ia na veivakarusai.
25Au a tagi, se segai, e na vuku i koya ka rarawa?
A sa bibi na yaloqu, se segai, e na vukudra na dravudravua?
26Ni'u a yadrava tiko na ka vinaka, sa qai yaco na ka ca:
Ia ni'u a waraka na rarama, sa qai yaco na butobuto.
27Sa rise na ketequ, ka sega ni vakacegu:
Sa yacovi au na veisiga rarawa.
28Au sa tagi voli ga, ka sa sega ni cilavi au na siga:
Au sa tu cake e nai soqosoqo ka'u sa tagica na veivuke.
29Au sa tacidra na jakoli,
Kei na nodra i tokani na ositereji.
30Sa loaloa na kuli ni yagoqu,
A sa kama na suiqu e na katakata.
31Sa vuki talega na noqu api me ka ni tagiyaso,
Kei na noqu kove me domo ni dautagi.
Currently Selected:
JOPE 30: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
