JOPE 32
32
Sa cudru ko Ilaiu vei Jope kei iratou na wekana tolutolu, 1-6. Sa cauravou ga ko koya, ia ka sa doudou ni vosa ni sa so na ka e via tukuna, 6-22.
1Sa qai cegu ni vosa vei Jope ko iratou na tamata tolutolu oqo, ni sa vakadonui koya tiko.
2Sa qai waqa mai na cudru i Ilaiu na luve i Parakeli na luve i Pusa, mai na mataqali i Rami: sa waqa mai na nona cudru vei
Jope, ni sa vakadonui koya, ka sa sega ni vakadonuya na Kalou.
3A sa waqa talega na nona cudru vei iratou na wekana tolutolu, ni ratou sa vakacalai Jope tiko, ka sa sega ni vakadinadinataka rawa.
4Ia ko Ilaiu sa vakaberabera ni vosa vei Jope, ni ratou sa qase vua.
5Ia ni sa kunea ko Ilaiu ni sa sega na vosa e na gusudratou na tamata tolutolu ko ya, sa qai waqa mai na nona cudru.
6A sa qai vosa ko Ilaiu na luve i Parakeli na luve i Pusa, ka kaya,
Koi au ka'u sa gone wale, ia koi kemudou dou sa qase sara;
O koya ka'u a tarovi au kina, ka rere ni vakatakila vei kemudou na lomaqu.
7Au a kaya, Me vosa mada ko ira sa bula dede,
Ia me vakatavuvulitaka na vuku ko ira ka yabaki vuqa.
8Ia ka sa tiko e dua na yalo e na loma ni tamata:
A sa solia vei ira na vuku nai cegu i Koya sa Kaukauwa.
9Era sa sega ni vuku kece na turaga:
A ra sa sega ni kila na lewa dodonu ko ira kece na qase.
10O koya ka'u a kaya kina, Dou vakarorogo mai vei au;
Ka'u na vakatakila talega na lomaqu.
11Raica, ka'u a waraka na nomudou vosa;
Ka'u a vakatu daliga ki na nomudou i vakavuvuli,
Ni dou a qara na ka mo dou kaya.
12Ia ka'u a vakarorogo vei kemudou,
Ka raica, sa sega e dua vei kemudou sa vakatakila rawa ni sa cala ko Jope,
Se sauma tale rawa na nona vosa:
13De dou kaya, Keitou sa kunea e na neitou vuku:
Sa biuti koya sobu na Kalou, ka segai na tamata.
14Ia sa sega ni vosataki au:
Ka'u na sega talega ni vosataka vua na nomudou vosa.
15Eratou a kidroa, eratou a sega ni vosa tale:
E sega na vosa me ra kaya.
16Ka me'u wawa tiko, ni ratou sa sega ni vosa;
Ni ratou sa tiko lo, ka sega ni vosa tale?
17Koi au talega, ka'u na vosataka na noqu i tavi;
Koi au talega, ka'u na vakatakila na lomaqu.
18Ni sa levu na vosa vei au;
Sa uqeti au na yalo sa tiko e lomaqu.
19Raica, na ketequ sa vaka na waini sa sogo deivaki;
Sa voleka ni kacabote me vaka na tavaya vou.
20Ka'u na vosa me'u vakacegu rawa:
Ka'u na dalaga, ka me'u sauma mada.
21Me'u kakua mada ni vinakata loa e dua na tamata,
Me'u kakua talega ni veicavilaki ni'u sa vosa vakarokoroko ki na tamata.
22Ni'u sa sega ni kila na veicavilaki:
Kevaka ka'u kitaka vakakina, ena kauti au tani vakasauri ko koya ka buli au.
Currently Selected:
JOPE 32: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
