JOPE 28
28
Sa tukuna ko Jope na vuku e na ka vakavuravura eso, 1-11. Ia na vuku dina, sa solia ga na Kalou, ka sa ka vinaka duaduaga, 12-28.
1E dina sa dua nai keli ni siliva, Kei na yasana sa vakasavasavataki kina na koula.
2Sa kau mai na qele na aironi,
A sa vakawaicalataki na kopa mai na vatu.
3Sa vakaotia na butobuto na tamata,
Ka sa vakasaqaqara na ka kece sara ga:
Io na vatu ni butobuto, kei na yaloyalo ni mate.
4A wai sa vure mai vua sa tiko kina;
Sa guilecava na yavadra sa lako tu:
Sa mamaca mai, sa lako tani vei ira na tamata.
5Ia sa tubu mai na qele na kakana:
A sa cukiti e rukuna me vaka e na bukawaqa.
6A kena veivatu na yasana ni safaia,
Ka sa tu kina na kuvu ni koula.
7Sa dua na sala sa sega ni kila e dua na manumanu vuka,
Ka sa sega ni kunea na mata ni vulituri:
8Sa sega ni butuka na luve ni laioni,
A sa sega ni lako voli kina na laioni daukata.
9Sa dodoka na ligana ko koya ki na uluvatu;
A sa vukica na veiulu-ni-vanua mai vuna.
10Sa kelia na dreke ni wai e na maliwa ni veivatu;
Ka sa kunea na ka talei kecega na matana.
11Sa bonota na uciwai ko koya, me kakua ni vuabale;
Ka sa kauta mai ki na rarama na ka sa vuni.
12Ia sa kune maivei na vuku?
Ka sa evei na yasana ni yalomatua?
13Na tamata, sa sega ni kila na kenai voli;
Ka sa sega ni kune e na vanua ni bula.
14Sa kaya na vanua titobu, Sa sega vei au:
Ka sa kaya na wasawasa, Sa sega vei au.
15Ena sega ni voli rawa e na koula talei;
Ia na siliva, ena sega ni vakarautaki me kenai voli.
16Ena sega ni vakatauvatani na kenai voli kei na koula mai Ofa,
Se na onikisa talei, se na safaia.
17Na koula kei na karisitala sa sega ni tautauvata kaya:
Ia ena sega ni voli rawa e nai yaya koula dina.
18Ena sega ni cavuti na lase damudamu, se na mata-ni-civa:
Ni sai yau talei na vuku, ka sai yau lailai na rupi.
19A topasa ni Iciopea sa sega ni tautauvata kaya;
Ena sega talega ni vakatauvatani kei na koula dina.
20Sa na qai vu maivei na vuku?
Ia sa evei na vanua me kune kina na yalomatua?
21Ni sa vuni mai na matadra kecega era bula tiko,
Ka sa tabonaki vei ira na manumanu vuka.
22Ko Rusa kei Mate, erau sa kaya,
Keirau sa rogoca na kenai rogorogo e na daliga i keirau.
23Na Kalou ga sa kila na kenai lakolako,
Ka sa kila ko koya na kena yasana.
24Ni sa rai yani ko koya ki nai yalayala kei vuravura,
Ka sa kunea na veiyasana kecega e ruku i lomalagi;
25Me lewa na kena kaukauwa ni cagi;
Ka sa vakatovolea na wai e na dua nai vakarau.
26Ni sa lesia na kenai valavala ni uca ko koya,
Kei na sala ni livaliva ni kurukuru:
27Sa qai kunea na ka oqori ko koya, ka tukuna;
Sa vakarautaka, ka vakadikeva talega.
28Ka sa kaya vua na tamata, Raica, na rerevaka na Turaga, sai koya na vuku;
Kei na biuta na ka ca, sai koya na yalomatua.
Currently Selected:
JOPE 28: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
