JOPE 27
27
Sa vaka ko Jope ni sa yalodina ko koya, 1-7. Sa na ca ga ko koya na dauveivakaisini, 8-10. Ena vuki na nona ka vinaka na tamata ca me ca kina ko koya, 11-23.
1A sa cavuta tiko na nona vosa vakaibalebale ko Jope, ka kaya,
2Me vaka sa bula dina na Kalou, ko koya sa sega ni vialewa vei au;
Ia ko Koya sa Kaukauwa, sa vakararawataka na yaloqu;
3Ni sa tiko e lomaqu na noqu cegu,
Kei na cegu ni Kalou e na qara-ni-ucuqu;
4Ena sega dina ni vosataka na ka ca na tebenigusuqu,
Se cavuta na veivakaisini na yamequ.
5Me yawa sara vei au me'u vakadonui kemudou:
Au na sega ni biuta tani vei au na noqu yalododonu,
ka yacova na siga ka'u na mate kina.
6A noqu yalododonu ka'u sa taura matua, ka'u na sega ni biuta:
Ena sega ni beitaki au na lomaqu e na veisiga kece ni noqu bula.
7Me tautauvata na noqu meca kei na tamata ca,
Kei koya talega sa vorati au me vakataki ira na tawa dodonu.
8Ia ka cava na ka me vakararavi kina ko koya na dauveivakaisini, kevaka sa vutuniyau mai
Ni sa kauta tani na yalona na Kalou;
9Ena rogoca beka na Kalou na nona tagi
Ni sa qai yacovi koya na ka rarawa?
10Ena marautaki Koya beka sa Kaukauwa?
Ena masu tikoga vua na Kalou?
11Au na vakavulici kemudou e na vuku ni liga ni Kalou:
Au na sega ni vunia na ka sa tu vei Koya sa Kaukauwa.
12Raica, koi kemudou kecega dou sa kunea oti;
A cava dou sa qai vialialia sara ga kina?
13Oqo na nonai votavota na tamata ca mai vua na Kalou,
Kei na ka era na taukena ko ira nai valavala vakaukauwa maivei koya sa Kaukauwa.
14Kevaka eratou sa vakalewevuqataki mai na luvena, eratou na mate e nai seleiwau:
Era na sega talega ni mamau e na madrai ko ira na nona kawa.
15Ko ira era vo tiko vua era na buluti e na mate:
Ena sega talega ni tagicaki ira na nodra yada.
16Kevaka sa binia vata na siliva me vaka na kuvu-ni-soso,
Ka vakarautaka nai sulu me vaka na qele;
17Ena vakarautaka ga ko koya, ia ena vakaisulu kina na yalododonu,
Era na vota talega na siliva ko ira sa sega ni cala
18Sa tara na nona vale me vaka na nuve,
Ka vaka nai cili sa cakava nai vakatawa.
19Sa koto sobu na tamata vutuniyau, ia ena sega ni vakasoqoni:
Sa yadra na matana, a sa yali ko koya.
20Sa vauci koya na domobula me vaka na waluvu;
Sa butakoci koya tani e na bogi na cava.
21Sa kauti koya tani na tokalau, a sa lako tani sara ko koya;
Ka sa cagina tani vakaukauwa mai na nona yasana.
22Ena biliraki koya, ka sega ni cegu:
Sa na via dro tani ko koya mai na ligana.
23Ena vakasausau vua ko ira na tamata,
Ka vakasiusiutaki koya tani mai na nona yasana.
Currently Selected:
JOPE 27: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
