JOPE 23
23
Sa via lako ko Jope ki na mata ni Kalou ni sa vakararavi vua, 1-9. Sa vaka ni sa kila na Kalou na nonai valavala ni sa dodonu, 10-12. Sa rerevaka tale na lewa ni Kalou, 13-17.
1A sa vosa ko Jope, ka kaya,
2E na siga edaidai oqo sa gaga na noqu tagi;
Sa ka bibi na ligamuni sa tauci au ka mamada na noqu vutugu.
3Me'u kila mada na vanua me'u kunei koya kina!
Me'u torova sara na nonai tikotiko!
4Ka'u na qai vakadodonutaka na noqu ka vua,
Ka vakasinaita na gusuqu e na noqu i vakamacala:
5Ka'u na qai kila na vosa ena kaya mai vei au,
Ka vakasamataka na ka ena kaya vei au.
6Ena veivorati kei au ko koya e nona kaukauwa levu?
E segai; ena golevi au ga ko koya.
7Ena veilewai rawa kaya maikea ko koya sa yalododonu:
Ia ka'u na qai vakabulai sara mai vua sa lewai au.
8Raica, ka'u sa lako ki liu, ka sa sega kina ko koya;
Kimuri, ia ka'u sa sega ni kunea:
9Ki na liga i mawi, na yasana sa cakacaka kina ko koya, ia ka'u sa sega ni kunea:
Sa vunitaki koya e na liga i matau, au sa sega ni raici koya rawa kina.
10Ia sa kila ko koya na sala ka'u sa muria:
Ni sa vakatovolei au oti ko koya, ka'u na qai lako mai me vaka na koula.
11Sa muria dina na nonai lakolako na yavaqu;
A nona sala ka'u sa vakabauta, ka sega ni lako tani maikina.
12Au sa sega talega ni biuta na vunau ni tebenigusuna;
A vosa ni gusuna ka'u sa vinakata, ka cata na qau kakana.
13Ia sa dua bau ga na lomana, ko cei me vagolea tani?
Na ka sa vinakata na yalona, sa kitaka ga.
14Ni sa ia ko koya na ka sa lesia vei au;
Ka sa vuqa na ka vakaoqo sa tiko vua.
15O koya oqo ka'u sa kidroa kina e matana:
Ni'u sa vakanananu, ka'u sa rerevaki koya.
16Ni sa vakamalumalumutaka na yaloqu na Kalou,
Ka sa vakararawataki au ko Koya sa Kaukauwa:
17Ni'u a sega ni muduki tani ni sa bera ni yaco na butobuto;
Ka sa sega ni tabonaka ko koya na butobuto mai na mataqu.
Currently Selected:
JOPE 23: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
