JOPE 24
24
Sa vaka ko koya ni sa sega ni saumi na ca kecega e na bula oqo, 1-17. Era sa daucudruvi vakavuni na tamata ca, 18-25.
1Ni sa sega ni vuni na veigauna vei Koya sa Kaukauwa,
A cava era sega kina ni kunea na nona siga ko ira era kilai koya?
2Eso na tamata era kisira nai yalayala ni vanua;
Era kovea na qele ni sipi, ka la'ki vakania.
3Era vakasava tani na nodra asa na luveniyali,
Era sa taura na nona pulumokau na yada mei vakadinadina.
4Era sa biuti ira tani na dravudravua mai na sala:
Sa ra vunitaki ira vata vakataki ira na dravudravua kei vuravura.
5Raica, me vaka na asa kila mai lekutu,
Era sa lako ki na nodra cakacaka; ka sou e na mataka ka qara matua na kedra:
Sa rawa mai lekutu na kedra kei na kedra talega na luvedra.
6Era dui tamusuka na kedra mai na were:
A ra sa vetia na nodra vaini nai valavala ca.
7Era sa davo luvawale e na bogi ka sega ni vakaitutuvi,
Ka sega ni vakaitutuvi e na liliwa:
8Era sa suasua e na uca mai na veiulu-ni-vanua,
A ra sa mokota na vatu ni sa sega na vanua me ra vakaruru kina.
9Eso era sa kaliraka tani na luveniyali mai na mata-ni-sucu,
Ka ra sa taura na nonai sulu na dravudravua mei vakadinadina ni ka;
10Sa ra qai lako luvawale ka sega ni vakaisulu,
A ra sa kauta tani nai vau sila maivei ira sa viakana;
11Era sa caka waiwai e nodra loma ni bai na tamata oqo,
Ka butubutu e nai keli waini, ka viagunu tiko.
12Sa ra vutugu na tamata mai loma ni koro,
Ka sa qoqolou na yalo i koya sa mavoa:
Ia sa sega ni vakacalai ira na Kalou.
13Ko ira oqo era sa besetaka na rarama;
Era sega ni kila na kena sala,
Se tiko e na kenai lakolako.
14Sa yadra mai na daulaba ni sa kida na mataka, ka sa vakamatea na dravudravua kei na luveniyali:
Ka sa vaka na daubutako e na bogi.
15A matana talega na dauyalewa sa waraka na yakavi,
Ka kaya, Sa na sega ni kunei au e dua na tamata:
A sa puloutaka na matana.
16Ni sa butobuto era kelirukuta na vale,
Era sa digitaka oti e na siga:
Era sega ni kila na rarama.
17Ni sa tautauvata na mataka kei na yaloyalo ni mate vei ira;
Ke sa kilai ira e dua, ke sa vaka na yaloyalo ni mate dina na nodra rere.
18Sa totolo ko koya e na dela ni wai;
Sa vakarusai na nodra i votavota e vanua:
Sa sega ni goleva na sala ko koya ki na veiwere-ni-vaini.
19Sa vakaseavutaka na wai ni uca-vulavula na siga kei na katakata:
Sa vakakina nai bulubulu vei ira era sai valavala ca.
20Ena guilecavi koya ko tinana; ena daumaki koya na baca;
Ena sega ni nanumi tale;
Ia ena raramusumusu na caka ca me vaka na kau.
21Sa vakacacani koya sa yava ka sega ni vakasucu:
A sa sega ni caka vinaka vua na yada.
22Sa yarataki ira talega na qaqa e na nona kaukauwa:
Sa tu cake ko koya, ka sa sega e nanuma me bula.
23Sa soli vua me tiko vakacegu, a ra sa vakararavi kina;
Ia sa vakaraica na nodra sala na matana.
24Era sa vakalevulevui me bogi vica ga,
Era sa qai yali ka vakamalumalumutaki;
Era sa kau tani me vakataki ira na tamata kecega;
Era sa doloki me vaka na sola ni sila.
25Ia kevaka e sega ni vakakina, ko cei me vakatakila na noqu lasu,
Ka vakatawayagataka na noqu vosa?
Currently Selected:
JOPE 24: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
