JOPE 22
22
Sa tukuna ko Elifasi ni sa sega ni yaga vua na Kalou na nona yalododonu na tamata, 1-4. Sa beitaki Jope e nai valavala ca, 5-11. Sa tukuna nai valavala vakaturaga ni Kalou, 12-20. Sa vunautaka na veivutuni, kei na kena yaga, 21-30.
1Sa qai vosa ko Elifasi na kai Temani, ka kaya,
2Me dua beka na tamata me yaga vua na Kalou,
Me vaka sa yaga vua vakai koya na tamata vuku?
3Sa marautaka na nomu yalododonu ko Koya sa kaukauwa?
Se sa vakaiyau kina ko koya, ni ko sa vakadodonutaka na nomu sala?
4Ena vunauci iko ni sa rerevaki iko?
Ena ia na veilewai kei iko?
5E sega beka ni ka levu na nomu ca?
Ka sega ni wiliki rawa na nomu i valavala ca?
6Ni ko sa taura walega nai vakadinadina maivua na wekamu,
Ka luvata tani na nodra i sulu era luvawale.
7Ko sa sega ni solia na wai ni gunu vei ira era sa oca,
Ko sa bureitaka talega na kakana vei ira era viakana.
8Ia ko koya na ligamatua, sa taukena na vanua,
Ka sa tiko kina ko koya sa daudokai.
9Ia ko sa vakatalai ira wale na yada, ka ra sa lala tu,
A sa musuki na ligadra na luveniyali.
10O koya oqo sa voliti iko kina nai cori,
Ka sa vakidroataki iko na rere e veivakidacalataki;
11Se na butobuto, mo kakua ni rai rawa;
Ka sa luvuci iko na wai levu.
12Sa sega beka ni tiko na Kalou mai na lomalagi cecere?
Ia mo raica na kedra cecere na kalokalo, ni sa cecere vakaidina!
13Ia ko sa kaya, Sa kila vakaevei na Kalou?
E rawa beka vua me lewa mai na loma ni butobuto loaloa?
14Sa tabonaki koya na o loaloa, ka sa sega ni rai rawa kina;
Ka sa lako voli tu e na dela ni drodrolagi.
15Ko sa muria beka na sala makawa,
Era sa daulako kina na tamata ca?
16Ko ira ka muduki dole na nodra bula, Ka sa luvu sara na nodra yavu:
17Ko ira ka kaya vua na Kalou, Mo lako tani vei keitou:
Se cava beka me na kitaka vei keitou ko Koya sa Kaukauwa?
18Ia sa vakasinaita na nodra veivale e na ka vinaka!
A sa yawa vei au na nodra lewa na tamata ca!
19Era sa kunea ko ira na yalododonu, ka reki kina:
Ka sa dredrevaki ira ko koya sa sega ni cala.
20A sa sega ni muduki na neitou ka, ia na ka sa vo tu vei ira sa vakamai e na bukawaqa.
21Mo kilai koya mada ga, mo drau veivinakati:
Ena yaco kina vei iko na vinaka.
22Mo vakabauta mada na vunau ni gusuna,
Ka binia na nona vosa ki lomamu.
23Kevaka ko sa lesu mai vei Koya sa Kaukauwa, ko na tara cake;
Ko na vakayawataka nai valavala ca mai na nomu vale.
24Ko na qai vakotora na koula ki na soso;
Kei na koula ni Ofa ki na veivatu ni wai drodro:
25Io, ena qai yaco me nomu bai ni valu ko Koya sa Kaukauwa.
Ka me nomu siliva talei talega.
26Ni ko na qai rekitaki Koya sa Kaukauwa,
Ka ta cake vua na Kalou.
27Ko na qai masu vua, ia ena rogoci iko ko koya,
Ko na vakayacora talega na ka ko sa yalataka vua.
28Ko na lesia na ka, ia ena vakataudeitaki vei iko:
Ena cilava talega na nomu sala na rarama.
29Ni sa ia na veivakabalei, ko na kaya,
Sa na ia na vakacecere cake:
Ka na vakabula na yalomalumalumu ko koya.
30O koya ena vakabulai koya sa cala:
Ia ena vakabulai ko koya ni sa savasava na ligamu.
Currently Selected:
JOPE 22: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
