JOPE 21
21
Sa tukuna ko Jope ni sa sega ni ka wale na nona rarawa, 1-6. Sa sautu e na siga eso ko ira era beca na Kalou, 7-15; ia ka sa daukilai talega na nodra rusa, 16-21. Sa tukuna na lewa ni Kalou ni sa vuqa na kenai valavala, 22-26. Era na lewai emuri nai valavala ca, 27-34.
1A sa vosa ko Jope, ka kaya,
2Dou vakarorogo vakavinaka ki na noqu vosa,
Ia me sa nomudou veivakacegui na ka ga oqo.
3Dou vosoti au mada me'u vosa:
Ia ni'u sa vosa oti, dou qai ia tiko na veivakalialiai.
4Koi au beka, au sa ia na tagi vua na tamata?
Ia ke sa vakakina a cava me sa sega kina ni rarawa na yaloqu?
5Dou raici au mada, ka mo dou kurabui,
Ka tabonaka na gusumudou.
6Ni'u sa vakananuma tiko ka'u sa kidroa,
Ka sa sautaninini na lewequ.
7A cava era sa bula tiko kina nai valavala ca,
Ka yaco me ra qase, io, ka ra vutuniyau mai?
8Era sa vakataudeitaki vata kei na nodra kawa e matadra,
Kei na luvedra talega e matadra:
9Sa sega na rere mai na nodra veivale,
Ka sa sega ni tau vei ira na kuita ni Kalou.
10Sa rika na nodra pulumokau tagane, a sa yaco ga;
Sa vakasucu na nodra pulumokau yalewa, a sa sega ni lutudole na luvena.
11Era sa vakatubura na nodra lalai me vaka na qele ni sipi,
Ka ra meke voli na luvedra.
12Era sa taura na tibereli kei na api,
Ka rekitaka na domo ni kove.
13Era vakaotia na nodra siga e na marau,
Ka lako sobu vakasauri ki nai bulubulu.
14Ia era a kaya vua na Kalou, Lako tani vei keitou;
Ni keitou sa sega ni via kila na nomu sala.
15Ko cei ko Koya sa Kaukauwa, me keitou qaravi koya?
A cava talega na betena vei keitou, kevaka keitou masu vua?
16Raica, era sa sega ni veitaliataka na nodra ka vinaka:
Me yawa vei au na nodra lewa nai valavala ca!
17Sa bokoci vakavica na nodra cina nai valavala ca!
Ka sa yacovi ira vakavica na veivakarusai!
Sa vota na rarawa vei ira e nona cudru.
18Era sa vaka na vu-ni-sila e na mata ni cagi,
Ka vaka na qa-ni-sila sa kauta tani na cava.
19Sa maroroya na Kalou na nonai valavala ca me kedra na luvena:
Sa sauma vua ko koya, ena kunea talega ko koya.
20Sa na kunea na matana na nona rusa,
Ia ena gunuva ko koya na cudru i Koya sa Kaukauwa.
21Ni na vinakata vakaevei ko koya na nona mataqali sa taravi koya,
Ni sa mudu koso na nona bula?
22Sa dua beka me vakavulici koya na Kalou me vuku?
Ia sa daulewai ira era sa cecere.
23Sa mate e dua ni sa yago kaukauwa sara,
Ni sa tiko vinaka sara ka vakacegu.
24A sucuna sa to sara e na wai-ni-sucu,
Ka sa suasua na uto-ni-suina.
25A sa mate e dua tani ni sa rarawa na yalona,
Ka sa sega ni kana e na vakacegu.
26Era na koto vata e na kuvu-ni-soso,
Ka ubi ira na baca ni qele.
27Raica, ka'u sa kila na ka dou sa nanuma,
Kei na nomudou vakalewai au vakaca.
28Ni dou sa kaya, Sa evei na nona vale na turaga?
Sa evei na nodra i tikotiko nai valavala ca?
29Dou a sega beka ni tarogi ira era sa lako tu e na sala?
Dou sa sega beka ni kila na nodra i vakatakilakila?
30Ni sa maroroi ki na siga ni rusa na tamata ca?
Era na tuberi yani ki na siga ni cudru.
31Ko cei me tukuna votu vua na nonai valavala?
Ia ko cei me sauma vua na ka sa cakava ko koya?
32Ena colati yani ki nai bulubulu ko koya,
Ka ra na yadrava na nonai bulubulu.
33Ia na qele e na buca ena kamikamica vua,
Ena muri koya na tamata kecega,
Me vaka sa sega ni wili rawa ko ira era liutaki koya.
34Ia ka cava dou sa vakacegui au wale kina,
Ni sa tiko na lasu e na nomudou vosa.
Currently Selected:
JOPE 21: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
