JOPE 20
20
Sa tukuna ko Sofa na ka ena yaco vei ira nai valavala ca.
1Sa qai vosa ko Sofa na kai Neama, ka kaya,
2O koya oqo sa uqeti au kina na nanuma ni lomaqu me'u vosa,
Ka'u sa kusarawa e na vuku ni ka oqo.
3Au sa rogoca na vunau me'u madua kina:
A sa uqeti au na yaloqu matua me'u sauma yani.
4Ko sa sega beka ni kila makawa na ka oqo,
Mai na gauna sa vakatikori kina na tamata e vuravura,
5Ni sa ka lekaleka na nodra marau nai valavala ca,
A sa oti rawarawa sara na reki ni dauveivakaisini?
6Kevaka sa vue na nona totoka ki lomalagi,
Ka sa yaco ki na o na uluna;
7Ena yali laivi sara ga me vaka na nona benu:
Ko ira era sa raica era na kaya, Evei ko koya?
8Ena vuka tani yani ko koya me vaka na tadra, ka na sega ni kune tale:
Ia ena vakasevi tani me vaka na raivotu e na bogi.
9A mata i koya talega ka kunea ena sega ni kunea tale;
Ena sega ni raici koya tale na nona yasana.
10A luvena era na via vakayalovinakataki ira na dravudravua,
Ena vakasuka talega na ligana na nodra i yau.
11A suina sa sinai tu e nonai valavala ca ni sa cauravou,
Ena koto sobu kaya e na kuvu-ni-soso.
12Kevaka sa kamikamica e na gusuna nai valavala ca;
Ka sa vunia e ruku ni yamena;
13Ka sa domica, ka sega ni via tiloma;
Ka sa mama tikoga e na gusuna:
14Ena dua tani mai na kena kakana e ketena,
Ka sa mi ni gata mai e lomana.
15Sa tiloma oti nai yau, ia ena luaraka tale:
Ena biuta tani mai na ketena ko koya na Kalou.
16Ena sucuma na wai gaga ni gata;
Ena vakamatei koya na yame ni gata loa.
17Ena sega ni raica na uciwai,
Na soniwai, nai davedave oni kei na uro ni wai-ni-sucu.
18A ka sa oca kina ena vakasuka tale, ka na sega ni tiloma:
Me vaka nai yau sa rawata ko koya ena solia vaka talega kina, ka na sega ni rekitaka.
19Ni sa vakasaurarataka ka biuta na dravudravua;
A sa kovea na vale sa sega ni tara ko koya;
20Ena sega dina ni vakacegu na ketena;
Ena sega ni maroroya ko koya na ka sa domona.
21E sega na ka e vo me sega ni kania ko koya;
O koya oqo ena sega kina na nonai yau me vo tu.
22Ni sa vutuniyau sara tiko ena dravudravua mai:
Ena tarai koya na ligadra kecega nai valavala ca.
23Ni sa la'ki vakamamautaka na ketena,
Ena vakatauca vua na Kalou na nona cudru katakata,
Ena vakatauca vua ni sa kana tiko.
24Ena dro tani mai nai yaragi aironi,
Ia na gasau ni dakai parasa ena laubasikataki koya.
25Sa ucuni mai, sa laubasikataka na yagona;
Io, na matana makamakalivata ena laubasikataka na mina:
Sa kani koya na domobula.
26A butobuto kecega ena vuni tu e nona yasana vuni:
A bukawaqa sa sega ni irivi ena kati koya;
Ena ca ko koya sa vo tiko e nona vale.
27Ena tukuna na nonai valavala ca ko lomalagi:
Ena veimecaki kaya talega ko vuravura.
28Ena lako tani nai yau sa tubu e nona vale,
Ena dave yani e na siga ni nona cudru.
29Oqo nai votavota ni tamata i valavala ca mai vua na Kalou,
Kei na ka sa lesia na Kalou me nona.
Currently Selected:
JOPE 20: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
