JOPE 19
19
Sa cavuta ko Jope na nodra sega ni loloma na wekana, 1-22. Sa tukuna na nona vakabauta nai Vakabula, 23-29.
1A sa vosa ko Jope, ka kaya,
2A cava na kena dede mo dou vakararawataka na yaloqu,
Ka dabilaki au e na vosa?
3Sa vakatini na nomudou vosavakacacataki au:
Dou sa sega ni madua ni dou sa lomakaukauwa vei au.
4Ia ke'u sa cala dina ga,
Ke sa tiko ga vei au na noqu cala.
5Kevaka e dina ni dou sa via vakalevulevui kemudou vei au,
Ka via cavuta vei au na ka ka'u rogo ca kina:
6Dou kila oqo ni sai koya na Kalou sa vakabalei au,
Ka sa lawavaki au e nona lawa.
7Raica, ka'u sa qoqolou e na vuku ni valavala kaukauwa, ia ka sega e rogo mai:
Au sa kaci vakadomoilevu, ia sa sega ni yaco na lewa.
8Sa sogolatia na noqu sala ko koya me'u dredre ni lako,
Ka sa vakabutobutotaka na noqu i lakolako.
9Sa luvata tani vei au na noqu i ukuuku,
Ka sa kauta tani nai sala mai na uluqu.
10Sa basuraki au sobu e na veitikina, ia ka'u sa yali:
Ka sa cavuivuvutaka na ka ka'u sa vakararavi kina, me vaka na kau.
11Sa vakawaqa talega vei au na nona cudru,
Ka sa nanumi au me'u vaka e dua vei ira na nona meca.
12Sa lako vata mai ko ira na nonai valu, ka ra caramaka na nodra sala me rawai au,
Era sa vakavolivolita vakaivalu na noqu i tikotiko.
13Sa vakaveiyawakitaki ira na wekaqu vei au,
Ka ra sa qai lomavakatani vei au ko ira nai kai noqu.
14Sa ra yali na wekaqu,
Ka ra sa guilecavi au ko ira na noqu i tau.
15Ko ira era tiko e noqu vale, kei ira na noqu vada, era sa nanumi au me'u vulagi:
Au sa vaka na kai tani vei ira.
16Au a kaciva na noqu tamata, a sa sega ni rogo mai;
Ia ka'u a vakamasuta e na gusuqu.
17Sa ka tani vua na watiqu na noqu i cegu,
Ka ra sa vakasisilataki au ko ira na luve ni yagoqu.
18Ia ko ira na lalai era beci au;
Au a tu cake, ka ra sa vosacataki au.
19Sa vakasisilataki au ko ira kece na tamata keitou a bose vata:
Ia ko ira ka'u a lomana era sa vuki rubu vei au.
20A suiqu sa kabita na kuliqu kei na lewequ,
Ia ka'u sa dro bula ga e na kuli ni batiqu.
21Dou lomani au mai, dou lomani au mai, koi kemudou na wekaqu;
Ni sa tarai au na liga ni Kalou.
22A cava dou sa vakacacani au kina me vaka sa cakava na Kalou,
Ka sa sega ni rauti kemudou na yagoqu?
23Me volai mada na noqu vosa!
Me ceuti mada ki nai vola!
24Me ceuti e na peni aironi kei na uma
Ki na vatu me tu ga ka tawa mudu!
25Ni'u sa kila sa bula tiko na noqu i Vakabula,
Ena tu talega e vuravura e na siga maimuri:
26Ia ni sa rusa sara na kuliqu oqo,
Ka'u na kunea ga na Kalou e na yagoqu:
27Ko koya ka'u na raica dina sara koi au,
Ka kunea e na mataqu, ka sega ni dua tani;
Ni sa vakarusai oti e lomaqu na noqu i ivi.
28Ia sa dodonu mo dou kaya, A cava keitou sa vakacacani koya kina?
Ni sa kune vei au na vu ni ka dina.
29Dou rerevaka nai seleiwau,
Ni sai sau ni cudru nai seleiwau,
Mo dou kila ni sa na veilewaitaki.
Currently Selected:
JOPE 19: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
