JOPE 17
17
Sa vakadodonutaka na nona vosa vua na Kalou, 1-5. Era na kurabui na tamata yalododonu e na vukuna, ia era na sega ni yalolailai kina, 6-10. Sa vakanananu ki na mate ko koya, 11-16.
1Sa takali na noqu i cegu; sa oti na noqu siga;
Sa noqu ga nai bulubulu.
2Ko ira na veivakalialiai era sa tiko kei au?
A mataqu sa tiko vata kei na nodra veivakararawataki, se segai?
3Me dua mada na ka me daru veivakadinadinataki;
Ko cei mada ko koya ena veitauri liga kei au?
4Ni kemuni sa tabonaka na lomadra me ra kakua ni vuku;
O koya oqo ko ni na sega kina ni vakalevulevui ira.
5Ko koya sa vosaveicavilaki vei ira na wekana,
Ena boko na matadratou na luvena.
6Sa soli au talega ko koya me'u vosabecitaki vei ira na tamata;
Ia ka'u sa ka vakasisila e matadra.
7Ka sa buawa na mataqu e na vuku ni rarawa,
Ka sa vaka na yaloyalo na tikiqu kecega.
8Ena kurabui ko ira na yalododonu e na ka oqo,
Ena yavala ko koya na tawa cala me vorati koya na dauveivakaisini.
9Ia na yalododonu ena lako dei tiko e nona sala,
Ko koya talega sa liga savasava ena kaukauwa cake tikoga.
10Ia koi kemudou kecega, dou lesu mada mai:
Ni'u sa sega ni kunea vei kemudou e dua na tamata vuku.
11Sa oti yani na noqu siga; sa muduki tani na noqu i naki,
Io, na vakanananu ni lomaqu.
12Era sa vukica na bogi me siga;
Sa lekaleka na rarama e na vuku ni butobuto.
13Ke'u sa waraka nai bulubulu me noqu vale:
Ka'u sa cakava na noqu i mocemoce e na butobuto.
14Ke'u sa kaya yani ki na vuca, ko iko na tamaqu:
Ki na baca, ko iko na tinaqu kei na ganequ.
15Sa qai evei na ka me'u nuitaka?
Ia na ka ka'u sa nuitaka, ko cei ena kunea?
16Ena lako sobu ga ki nai sogo ni bulubulu;
Ni sa yaco na vakacegu e na kuvu-ni-soso.
Currently Selected:
JOPE 17: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
