JOPE 15
15
Sa vunauci Jope ko Elifasi ni sa vakadonui koya vakai koya, 1-16: ka sa tukuna na nodra sega ni cegu rawa na tamata ca, 17-35.
1Sa qai vosa ko Elifasi na kai Temani, ka kaya,
2Me cavuta li na vuku e sega ni yaga ko koya na tamata vuku,
Ka vakamamautaka na ketena e na cagi ni tokalau?
3Ena totaka beka na ka e na vosa e sega ni yaga?
Se e nai vakavuvuli sa sega na betena?
4Ia ko iko, ko sa biuta tani na rere,
Ka tarova na masu e na mata ni Kalou.
5Ni sa tukuna na gusumu na nomu i valavala ca,
Ko sa digitaka na vosa ni daulawaki.
6A gusumu ga sa vakacalai iko, ka segai koi au:
Io, na tebenigusumu ga sa tukuni iko.
7Ko iko beka nai matai ni tamata ka sucu?
Se ko buli mada eliu ko iko ka qai buli emuri na veiulu-ni-vanua?
8Ko sa rogoca beka na bose vuni ni Kalou?
Se ko sa tarova li na vuku me nomu ga?
9A cava ko kila, keitou sa sega talega ni kila?
Se cava ko vakasamataka, sa sega talega vei keitou?
10Sa tiko vei keitou na ulu sika kei na qase dina talega,
Sa gone ko tamamu.
11Sa ka lailai beka vei iko na veivakacegui ni Kalou?
Se dua beka na ka vuni sa tu vei iko?
12A cava sa kauti iko vakatani kina na lomamu?
Se cava sa sauriva kina na matamu,
13Mo vakatanitaka kina na yalomu vua na Kalou,
Ka vosataka kina na gusumu na vosa vakaoqori?
14A cava na tamata, me sa savasava ko koya?
Kei koya sa sucu mai vua na yalewa, me yalododonu ko koya?
15Raica, sa sega ni vakadinati ira na nona era yalosavasava;
Ia sa sega ni savasava e matana na lomalagi.
16Ka sa vakaevei na kena vakasisila kei na kena dukadukali na tamata,
Ko koya sa daugunuva na ca me vaka na wai?
17Au na vakatakila vei iko, rogoci au mai;
Ia na ka ka'u a raica ka'u na tukuna;
18Oqori era sa tukuna
Ko ira na vuku maivei ira na nodra qase, a ra sa sega ni vunia:
19Ko ira ga ka soli kina ko vuravura,
Ka sega ni kai tani me veilakovi kei ira.
20Sa kana rarawa ko koya na tamata ca e na nona siga kecega,
Ka sa vunitaki vua na dauivalavala kaukauwa se na vica beka na nona yabaki.
21Sa rorogo tu e daligana na ka rerevaki:
Ni sa sautu tiko, ena yacovi koya na dauveivakarusai.
22Sa sega ni dinata ni na lesu tale mai na butobuto,
A sa waraki koya tu nai seleiwau.
23Sa qara sese voli tu na kena, ka kaya, Sa evei?
Sa kila ko koya ni sa voleka sara vua na siga ni butobuto.
24Sa vakarerei koya na rarawa kei na yaluma;
Era gumatua vua, me vaka na tui sa vakarau ki nai valu.
25Ni sa dodoka na ligana vua na Kalou,
A sa vakaukauwataki koya me veivala kaya sa Kaukauwa.
26Sa cici vakadomoqa vei koya,
E na nonai sasabai sukusukura:
27Ni sa ubia na matana e nona uro,
A sa uro mai na detena.
28Ia sa tiko ga ko koya e na veikoro lala,
E na veivale sa sega e tiko kina, Ka sa voleka ni rusa:
29Ena sega ni vutuniyau ko koya, ena sega ni tiko dei na nona ka,
Ena sega talega ni vakadedetaka na kena vinaka e vuravura.
30Ena sega ni lako tani mai na butobuto;
Ena malai yani na tabana e na yameyame ni buka,
Ena takali talega ko koya e nai cegu ni gusuna.
31Me kakua na dauvakacalai me vakararavi e na ka sa sega ni yaga:
Ni na sega ni yaga na kenai sau.
32Ni sa bera na kena gauna sa na yaco ga,
Ena sega talega ni bulabula na tabana.
33Ena kuretaki sobu na vuana vou me vaka na vaini,
Ena mimira na sena me vaka na olive.
34Ni na lala na nodra i soqosoqo na dauveivakaisini,
Ia na bukawaqa ena kania na nodra veivale era sa tarai yau ni vere.
35Era sa kunekunetaka na ca, ka vakasucuma na lasu,
Ka sa vakarautaka na veivakaisini na lomadra.
Currently Selected:
JOPE 15: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
