JOPE 14
14
Ni sa ka lekaleka na bula ni tamata, ka sa sega ni bula tale e vuravura ni sa mate, sa masuta na Kalou ko Jope me lomani koya mai.
1A tamata sa sucu maivua na yalewa
Sa vica walega na nona siga, ka sa vutu ni rarawa.
2Sa tubu mai ko koya me vaka na se ni kau, ka sa tamusuki tale:
Sa dro talega me vaka na yaloyalo, ka sa sega ni tiko dei.
3Ia ko ni sa yadrava beka e dua sa vakaoqo,
Ka kauti au mai me daru veilewai kei kemuni?
4Ko cei me kauta rawa mai e dua na ka savasava mai na ka sa sega ni savasava? sa sega sara e dua.
5Ni sa lokuci tu na nona siga, ka sa tu vei kemuni nai wiliwili ni nona vula.
Ni kemuni sa lesia talega na kenai yalayala me kakua ni sivia;
6Mo ni gole tani mada mai vua, me vakacegu ko koya,
Me vakaotia mada na nona siga, me vaka na tamata sa voli na nona cakacaka.
7Ni sa nuitaki, kevaka sa ta sobu na kau, ena tubu tale,
Ena sega talega ni yali na kena tubucoke mai.
8Kevaka sa vuca mai na wakana e na qele,
Ka sa mate na vuna e na soso;
9Ena tubu mai ni sa boica na wai,
Ena tubura na tabana me vaka na kau sa tei.
10Ia sa mate ga na tamata, ka sa takali yani:
Io sa ciba na tamata, ka sa evei ko koya?
11Me vaka sa dauyali na wai mai na wasawasa,
Ka sa daudi ka maca na uciwai:
12Sa dau vakakina na tamata, era sa duikoto sobu, ka sega ni tu cake tale;
Era na sega ni yadra
Se vakaturi cake mai na nodra moce ka me yali mada na lomalagi.
13Mo ni vunitaki au mada e nai bulubulu,
Ka tabonaki au, me oti mada na nomuni cudru,
Ka lokuca vei au e dua na siga, ka nanumi au!
14Kevaka sa ciba na tamata, ena bula tale ko koya?
Au na waraka na siga kecega sa loku vei au,
Me yaco mada na noqu vakamataliataki.
15Ko ni na kaci mai, ka'u na rogo yani vei kemuni:
Ko ni na vinakata na cakacaka ni ligamuni.
16Ia oqo ko ni sa wilika nai cavucavu ni yavaqu:
Kemuni sa sega beka ni daunanuma na noqu i valavala ca.
17Sa dregati e loma ni taga na noqu talaidredre,
Ia ko ni sa cula kina na noqu i valavala ca.
18Sa yaco dina me ka wale na ulu-ni-vanua sa lutu sobu;
A vatu talega, sa biu tani mai na kena yasana:
19Sa solota na vatu na wai:
Ko ni sa luvuca na ka sa tubu mai na kuvu-ni-qele;
Ia ko ni sa dauvakaotia talega na vakanananu ni tamata.
20Ko ni sa gumatua tikoga vua, a sa takali ko koya:
Ko ni sa vakatanitaka na matana, ka vakatalai koya yani.
21Sa vakarokorokotaki mai ko iratou na luvena, a sa sega ni kila ko koya;
A ratou sa vakasivoi, ka sa sega ni kunea ko koya.
22Ia ena rarawa ga na lewena,
Ena tagi talega e lomana na yalona.
Currently Selected:
JOPE 14: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
