JOPE 13
13
Sa vunauci iratou na wekana ko Jope, 1-12; a sa tukuna na nona vakabauta, 13-19. Sa vakamamasu vua na Kalou ko koya, 20-28.
1Raica, a ka kecega oqo sa kunea na mataqu,
Sa rogoca na daligaqu ka sa kila
2A ka dou sa kila, ka'u sa kila talega;
Ka'u sa sega ni uasivi sobu vei kemudou.
3E dina, ka'u sa via vosa vei Koya sa Kaukauwa,
Au sa vinakata me keirau veitarogi kaya na Kalou.
4Ia koi kemudou, dou sa dautulia na lasu,
Dou sa vuniwai sa sega ni yaga kecega
5Ke dou tiko lo sara mada!
Sa na qai nomudou vuku ga oqori.
6Dou rogoca mada na noqu vakatusa,
Ia dou vakarorogo ki na veitarogi ni tebenigusuqu.
7Dou na vosa ca beka mo dou totaka na Kalou?
Dou na vosa vakaveivakaisini e na vukuna?
8Dou na vinakata loa beka na matana?
Dou na ia na veileti e na vuku ni Kalou?
9Sa vinaka beka me vakatarogi kemudou ko koya?
Se dou sa vakalialiai koya, me vaka sa ia na veivakalialiai na tamata?
10E dina ena vunauci kemudou ko koya,
Kevaka dou sa vakadonui ira lo na tamata.
11Ena sega beka ni vakarerei kemudou na nonai tovo vakaturaga?
Ena sega ni kani kemudou na rerevaki koya?
12A nomudou vosa vakaibalebale nai bole dravusa,
A yagomudou na yago tete.
13Dou galuvi au mada ga, me'u vosa koi au,
Me qai veitalia se cava ena yacovi au.
14A cava me'u taura kina na lewequ e batiqu?
Ka taura e ligaqu na noqu bula?
15Kevaka sa vakamatei au ko koya, ka'u na vakararavi ga vua:
Ia na noqu i valavala ka'u na vakadinadinataka e matana.
16Sai koya talega ka'u na bula kina;
Ni sa sega na tamata dauveivakaisini me toro yani vua.
17Dou rogoca vakavinaka na noqu vosa.
Kei na noqu vakatusai au e na daligamudou.
18Raica, ka'u sa qai vakarau tu ki na veilewai:
Au sa kila ni'u na vakadonui.
19Ko cei ena veilewai kei au?
Kevaka ka'u na qai galu oqo, ka'u na ciba.
20E rua ga na ka mo ni kakua ni kitaka vei au:
Ka'u na qai sega ni vunitaki au vei kemuni.
21Mo ni kauta vakayawa tani vei au na ligamuni:
Me kakua talega ni vakarerei au na ka rerevaki maivei kemuni.
22Mo ni qai kaci mai, ka'u na qai vosa:
Se'u vosa mada koi au, mo ni qai vosa mai vei au.
23E vakavica beka na noqu caka cala, kei na noqu i valavala ca?
Mo ni vakatakila vei au na noqu talaidredre kei na noqu i valavala ca.
24A cava ko ni sa vunia kina na matamuni,
Ka nanumi au me'u nomuni meca?
25Kemuni na vurulaka beka na drau-ni-kau sa cagina?
Se vakasava na vu-ni-sila malai?
26Ni ko sa vola na ka vakararawa sara vei au,
Ka votai au e na noqu i valavala ca ni'u a cauravou.
27Ko ni sa vesuka talega na yavaqu e nai vesu kau, ka vakaraica matua na noqu i lakolako kecega;
Ka sa vola vakavolivolita na qeteqete ni yavaqu:
28Ia ko koya oqori sa malai yani me vaka na ka sa vuca,
Me vaka nai sulu sa kania na sarasara.
Currently Selected:
JOPE 13: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
