JOPE 12
12
Sa tabana yani ko Jope na nodratou vosa na wekana, 1-5; a sa vakadinadina ni sa kaukauwa sara na Kalou, 6-25.
1A sa vosa ko Jope, ka kaya,
2Sai kemudou dina ga na tamata,
Ia na vuku ena mate vata kei kemudou!
3Ia sa tu talega vei au na lomavuku me vaka sa tu vei kemudou;
Au sa sega ni uasivi sobu vei kemudou;
Ia ko cei sa sega ni kila na ka vakaoqori?
4Au sa vaka e dua sa vakalialiai koya na kai nona,
E dua sa masu vua na Kalou, ka sa rogoci koya ko koya:
Ia sa vakalialiai na tamata sa dodonu ka sega ni cala.
5O koya sa tiko vakacegu sa nanuma e lomana
Sa cina e beci ko koya sa voleka ni tidara na yavana.
6Sa sautu na nodra i tikotiko na daubutako,
A ra sa tiko dei ko ira era sa vakacudruya na Kalou;
Io na tamata sa dausoli ka kina na Kalou.
7Ia mo taroga mada na manumanu ni vanua, era na vakavulici iko;
Kei na manumanu vuka, ka ra na tukuna vei iko:
8Se vosa ki na vanua, ka na vakavulici iko:
Ia na ika talega ni waitui ena vakatusa vei iko.
9Ko cei me sega ni kila e na ka kecega oqo,
Ni sa cakava na ka oqo na liga i Jiova?
10Sa tiko e ligana na nodra i cegu na ka kecega sa bula,
Kei na yalodra na tamata kecega.
11Sa sega beka ni vakatovolea na vosa na daliga?
Ka sega talega ni tovolea na kena kakana na gusu?
12Sa tu na vuku vei ira na qase;
Kei na yalomatua vei ira sa vuqa na nodra siga.
13Sa tu vei Koya na vuku kei na kaukauwa;
Sa nona na lewa dina kei na yalomatua.
14Raica, sa basuka sobu ko koya, a sa dredre me tara tale e dua:
Sa sogolatia na tamata, ka sa sega e dolava rawa.
15Raica, sa tarova na wai, ka sa di:
Sa vakatauca tale, a sa la'ki luvuci vuravura.
16Sa tu vei koya na kaukauwa kei na vuku:
Sa nona ko koya sa vakacalai kei koya sa vakacala.
17Sa kauti ira tani vakabobula na daubose,
A sa vakasesei ira na mataveilewai.
18Sa sereka na kedrai vesu na tui,
Ka sa vauca na tolodra e nai vau.
19Sa kauti ira tani vakabobula na turaga,
Ka sa vakabalei ira na qaqa.
20Sa vakatakalitaka na nodra vosa na daudina,
Ka sa kauta tani na nodra yalomatua na qase.
21Sa vakaisini ira na turaga,
Ka sa sereka nai vau ni tolodra na qaqa.
22Sa vakarairaitaka na ka titobu mai na butobuto,
A sa kauta mai ki na rarama na yaloyalo ni mate.
23Sa vakalewevuqataki ira na veimatanitu, a sa vakarusai ira tale;
Sa vakalevulevuya na veimatanitu, a sa vakalailaitaka tale.
24Sa vakatakalitaka na nodra yalomatua na turaga ni kai vuravura,
A sa vakasesei ira voli e na lekutu sa sega kina na sala.
25Era vakayayamo voli e na butobuto ka sa sega na rarama,
A sa qisi ira me ra yatayata tu me vakataki koya sa mateni.
Currently Selected:
JOPE 12: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
