JEMESA 4
4
Sa tukuna ni sa tubu na i valu mai na yaloca, 1; a sa sega ni yaco na noda gagadre ni da sa yaloca, 2,3. Me da kakua ni lomavata kei ira na tamata e sega ni lotu, 4,5. E ca na viavialevu, 6-16. Sa ca ko ira era sa kila na ka dodonu, ka sega ni muria, 17.
1Sa vu maivei na veiba kei na veivala vei kemudou? sa sega li ni vuna na nomudou gagadre ca sa veivala e na veitiki ni yagomudou? 2Dou sa kocokoco, ka sega ni rawata: dou sa ravuravu, ka daugagadre, ka sega ni taura rawa me nomudou: dou sa veivala ka veiba, ia dou sa sega ni rawata, ni dou sa sega ni kerekere. 3Dou sa kerekere ga, ka sega ni rawata, ni dou sa kerekere vakaca, mo dou vakayalia e na nomudou gagadre ca.
4Oi kemudou na dauyalewa kei na dautagane, dou sa sega beka ni kila, ni sa veicati kei na Kalou na veivinakati kei vuravura? ia sa veimecaki kei na Kalou ko koya sa via veiwekani kei vuravura. 5Dou sa vakasama beka ni sa kaya walega nai Vola Tabu, Sa gadreva vakavuvu na Yalo sa tiko e na lomada?
6Ia sa solia vakalevu na loloma ko koya. O koya sa kaya kina ko koya, O ira sa viavialevu sa vorati ira na Kalou, ia sa solia na loloma vei ira era sa yalomalumalumu. 7O koya mo dou qai vakamalumalumutaki kemudou vua na Kalou. Vorata na tevoro, ena dro tani kina vei kemudou ko koya. 8Toro voleka yani vua na Kalou, ka na toro voleka mai vei kemudou ko koya. Vakasavasavataka na ligamudou, oi kemudou na lomalomarua. 9Dou mai rarawa, ka qoqolou, ka tagi: me vuki na nomudou dredre me qoqolou, kei na nomudou marau me mataveveku. 10Dou vakamalumalumutaki kemudou e na mata ni Turaga, ka na laveti kemudou cake ko koya.
11Kakua ni dou veikaseti, na veiwekani. O koya sa kaseta na wekana, ka lewai koya na wekana, sa kaseta na vunau talega, ka sa lewa na vunau: ia kevaka ko sa lewa na vunau, ko sa qai sega ni muria na vunau, ko sa lewa ga. 12Sa dua bauga sa vakatura na vunau, ko koya sa rawata na veivakabulai, kei na veivakarusai: o cei ko iko mo lewa na tani?
13Dou lako mai, oi kemudou sa daukaya, Edaidai se na mataka eda na lako ki na koro ko ya, ka tiko kina ka yabaki dua, ka veivoli kina, ka rawata nai yau: 14ia dou sa sega ni kila na ka sa na yaco e na mataka: A cava na nomudou bula? Na kabukabu walega koi kemudou, sa rairai ka sa vakadede vakalailai ga, a sa qai seavu yani. 15Ia oqo mo dou kaya, Kevaka sa vinaka vua na Turaga, eda na bula, ka kitaka na ka oqo, se na ka ko ya. 16Ia dou sa qai marau ka dokadokai kemudou: e ca na marau kecega sa vaka ko ya.
17O koya sa ca kina vua sa kila me caka vinaka, ka sega ni kitaka.
Currently Selected:
JEMESA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
