JEMESA 5
5
Sa cudruvi ira na tamata vutuniyau na Kalou ni ra sa tamatai valavala ca, 1-6. Ai valavala e kilikili kei ira na tamata lotu, 7-12. Sa yaga sara na masu, 13-18. Sa ka vinaka na saumaki ira na tamata sa cala, 19,20.
1Dou lako mai, oi kemudou na tamata vutuniyau, dou tagi ka qoqolou e na vuku ni nomudou ka rarawa ena yaco mai. 2Sa vuca na nomudou i yau, a sa kania na nomudou i sulu na sarasara. 3Sa veveka na nomudou koula kei na siliva; ka na tukuni kemudou na kena veveka, ka na kania na lewemudou me vaka na bukawaqa. Dou sa kumuna vata nai yau me yacova na gauna maimuri sara. 4Raica, sa tagi na kedrai voli na tamata daucakacaka, era sa tamusuka na nomudou veiwere, o koya dou sa bureitaka: ia sa curu ki na daligana na Turaga ni lewe vuqa na nodra tagi era sa dautamusuka. 5Dou a marau tikoga e vuravura, dou a daukana tiko; dou a dauvakania na lomamudou, e na siga sa ia kina na dauveivakamatei. 6Dou a lewai koya sa yalododonu, dou a vakamatea; sa sega ni vorati kemudou ko koya.
7O koya ga oqo, na veiwekani, mo dou qai vosota, me yaco mada na nona lako mai na Turaga. Raica, nai vakatau-ni-were sa waraka na vua ni qele e talei, a sa wawa vakadede, me rawata mada na uca sa liu, kei na uca sa muri. 8Dou wawa talega koi kemudou; vakataudeitaka na yalomudou: ni sa roro mai na nona lako mai na Turaga.
9Dou kakua ni dui veikudruvi, na veiwekani, de dou cudruvi: raica, sa tu e na mata ni katuba na Turaga-ni-lewa. 10Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota, era a vosa e na yaca ni Turaga. 11Raica, eda sa dauvakatokai ira era sa vosota me ra kalougata. Dou a rogoca na dauvosota nei Jope, dou sa raica talega ni sa tinia vakaevei na Turaga; ni sa yalovinaka sara na Turaga, ka sa dauloloma.
12Ia na ka levu sara oqo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se ki na dua tani na ka: me io ga na nomudou io; ia me sega ga, na segai; de dou cudruvi kina.
13Kevaka e dua vei kemudou sa vakararawataki, me masu tiko. Kevaka e dua sa marau, me sere. 14Kevaka e dua vei kemudou sa tauvi-mate, me kacivi ira na qase ni soqosoqo lewe ni lotu; ia me ra masulaki koya, ka walia e na waiwai e na yaca ni Turaga: 15ia na masu ni vakabauta ena vakabulai koya sa tauvi-mate, ka na vakabulai koya na Turaga, ia kevaka ka kitaka nai valavala ca, ena sega ni cudruvi kina. 16Dou dui veivakatusa na nomudou i valavala ca, ka veimasulaki, mo dou vakabulai kina. Sa yaga vakalevu na nona masu gumatua na tamata yalododonu. 17A tamata sa vakataki keda sara ko Ilaija, a sa masu vagumatua sara me kakua ni tau na uca; a sa sega kina ni tau mai na uca e vuravura, a sa oti mada na yabaki tolu kei na vula ono. 18A sa qai masu tale, a sa tau na uca mai lomalagi, a sa vuataka na vuana na qele.
19Oi kemudou na veiwekani, kevaka e dua vei kemudou sa lako sese mai nai vakavuvuli dina, a sa vakalesui koya tale mai e dua; 20me kila ko koya oqo, o koya sa vakalesuya tale na tamata caka cala mai na nonai valavala e cala kina sa vakabula na yalo mai na mate, a sa buluta talega nai valavala ca e vuqa.
Currently Selected:
JEMESA 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific