AISEA 7
7
Ni sa rerevaki Risina kei Peka ko Easi, 1-4, sa vakacegui koya ko Aisea, 4-9. Ni sa bese ni taroga ko Easi e dua nai vakatakilakila, sa qai yalataka vua na Mesaia mei vakatakilakila, 10-16. A sa tukuna ni na yaco mai na nona cudruvi ko Easi mai na vanua ko Asiria, 17-25.
1A sa yaco e na gauna i Easi, na luve i Jocame, na luve i Usaia, na tui Juta, ni rau sa qai lako cake ki Jerusalemi, ko Risina na tui Siria, kei Peka na luve i Rimalaia, na tui Isireli, me rau kaba, a rau sa sega ni rawata. 2A sa tukuni ki na mataqali i Tevita, ka vaka, Sa to vata ko Siria kei Ifireimi. Sa qai yavala na lomana, kei na lomadra na nona tamata, me vaka sa yavala na kau ni veikau ni sa liwa na cagi. 3Sa qai kaya vei Aisea ko Jiova, Mo drau lako mada, ko iko kei Siari-yasupi na luvemu me tavaki Easi, ki na salisali ni drano maicake ka koto mai na salatu e na nodratou vanua na dausavai sulu, 4ka kaya vua, Mo qarauni kemuni, ka mo ni vakacegu; ni kakua ni rere, se yalolailai e na vukudrau na bui ni kau oqo sa kubou tu, io e na vuku ni nodratou cudru waqawaqa ko Risina kei Siria, kei na luve i Rimalaia. 5Ka ni ratou sa bosea na ka ca vei iko ko Siria, kei Ifireimi, kei koya na luve i Rimalaia, a ratou sa kaya, 6Me datou lako cake ki Juta, ka vakararawataka, ia me datou basuka me noda, ka lesia kina e dua na tui, io na luve i Tapeli: 7Sa vaka na Turaga ko Jiova, Ena sega ga ni rawa, se yaco: 8ni sa ulu i Siria ga ko Tamasiko, ka sa ulu i Tamasiko ga ko Risina; ia ena sega ni oti na yabaki e onosagavulu ka lima, ena vakabalei sobu mada eliu ko Ifireimi, me kakua ni matanitu. 9Ia na ulu i Ifireimi ga ko Samaria, kei na ulu i Samaria na luve i Rimalaia. Kevaka dou na sega ni vakadinata, dou na sega ni vakataudeitaki.
10Sa vosa tale vei Easi ko Jiova, ka kaya, 11Mo kerea mada e dua nai vakadinadina vei iko maivei Jiova na nomu Kalou; mo kerea e dua mai na tikina titobu, se na tikina cecere sara. 12A sa kaya ko Easi, Au na sega ni kerea, ia ka'u na sega ni vakatovolei Jiova vakaca. 13Ka sa kaya ko Aisea, Dou rogoca mada na mataqali i Tevita; A ka lailai beka na nomudou vakaocataki ira na tamata, mo dou sa vakaocataki koya talega na noqu Kalou? 14Ia ko Jiova vakataki koya ga ena solia vei kemudou e dua nai vakadinadina; Raica, ena bukete e dua na goneyalewa, ena vakasucuna e dua na gonetagane, ena vakayacani koya ko Imanueli: 15Na pata kei na oni ena kania ko koya, ni sa kila me biuta na ka ca, ka digitaka na ka vinaka: 16Ia ni sa bera ni kila ko koya na gone me biuta na ka ca, ka digitaka na ka vinaka, ena lala mada na nodrau vanua na tui ruarua ko sa rerevaka.
17Ena vakayacora vei kemuni ko Jiova vei ira talega na nomuni tamata, kei na mataqali i tamamuni, na gauna sa sega tale e vakakina, mai na siga sa lako tani kina mai Juta ko Ifireimi; io na tui Asiria. 18Ia ena yaco e na siga ko ya, ena kalu ko Jiova ki na lago sa tiko mai na vu ni uciwai ni Ijipita, kei na pi mai na vanua ko Asiria: 19Ia era lako mai, ena tiko kece e na veibuca e lala, kei na veiqara ni uluvatu, kei na kau vakavotona kecega, kei na veico kecega. 20E na siga ko ya ena tasia ko Jiova e nai tasi sa voli mai na tai kadua ni uciwai, io ko tui Asiria, na ulu, kei na vutika ni yavana; ia na kumina talega ena tasia laivi. 21Ia ena yaco e na siga ko ya ena dua na tamata sa na vakania e dua na pulumokau yalewa ka rua na sipi; 22ka na yaco, e na vuku ni kena levu ni wai-ni-sucu ena rawa kina ena kana pata ko koya: ni ra na kania na pata kei na oni ko ira kecega era vo tiko e na vanua. 23Ia ena yaco e na siga ko ya, na tikina kece sa tu kina na vaini e udolu sa dau kenai voli e dua na udolu na sikeli siliva, ena yaco ga me veikau vakavotona ka veisoni. 24Era na vakagasau ka vakadakai titi na tamata era lako yani kina; ni na veikau vakavotona ka veisoni na vanua taucoko. 25Ia na veiulu-ni-koro kecega sa dauwereci e nai sivi, sa dredre mo lako kina e na vuku ni kau vakavotona kei na soni e rerevaki; ena kedra yasana ga na pulumokau me ra lako tu kina, kei na vanua era na lako voli kina na manumanu lalai.
Currently Selected:
AISEA 7: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
