AISEA 40
40
Sa tukuna ko Aisea nai rogorogo vinaka me na vunautaki, 1,2. A vunau i Joni na Dauveipapitaiso, 3-8. A nodra vunau nai Apositolo, 9-11. Ni sa kaukauwa sara na Kalou, 12-17, ka sa sega e dua me vakatautauvatataki kaya, 18-25, sa vakacegui ira kina na tamata era vakararavi vua, 26-31.
1Dou vakacegui ira, dou vakacegui ira na noqu tamata, sa kaya na nomudou Kalou. 2Dou vosataka na vosa ni veivakacegui ki Jerusalemi, ka tukuna vua, ni sa oti na nona gauna ni oca, ni sa bokoci na nona caka cala; ni sa cudruvi ko koya e na liga i Jiova me rauta vakarua na nonai valavala ca kecega.
3Sa rogo na domo ni dua sa kacikaci e loma ni veico, Dou caramaka na sala i Jiova, cakava me dodonu e loma ni vanua na salatu ni noda Kalou: 4Ena vakaceceretaki na buca kecega, ka na vakalolovirataki na ulu-ni-vanua kei na vanua cecere kecega; na tikina sa veve ena vakadodonutaki, kei na tikina sukusukura ena vakalogalogavinakataki: 5ena qai vakarairaitaki mai nai ukuuku i Jiova, ka ra na raica vata na tamata kecega: ni sa cavuta na gusu i Jiova. 6Sa vosa mai e dua ka vaka, Mo kaci mada! A sa kaya ko koya, A cava me'u sa kacivaka? Sa co ga na tamata kece, ka sa vaka na se ni co na kedrai ukuuku kecega: 7sa daumalai na co, a sa daumira na sena, ni sa uvuca nai cegu i Jiova: e dina era sa co ga na tamata. 8Sa daumalai na co, a sa daumira na sena, ia na vosa ni noda Kalou ena tu dei ka tawa mudu.
9Mo cabeta na ulu-ni-vanua cecere, ko iko Saioni, ka kauta mai nai rogorogo vinaka, mo tabalaka vakaukauwa na domomu, ko iko Jerusalemi, ka kauta mai nai rogorogo vinaka; mo tabalaka, kakua ni ko rere; kaya ki na veikoro e Juta, Raica na nomudou Kalou! 10Raica, ena lako vakaukauwa mai na Turaga ko Jiova, ia na ligana ena lewa e na vukuna: raica, na kenai sau ena solia sa tiko ga vua, kei na ka ni nona cakacaka e matana: 11ena vakani ira na nona qele ni sipi me vaka nai vakatawa; ena keveti ira na luve ni sipi e na ligana, ka kauti ira voli e na lomaserena; ko ira era vakasucuma tiko na luvedra ena tubera voli vakamalua ko koya.
12O cei sa vakarauta na wai e na qeteqete ni ligana, ka vakarauta na lomalagi e nai qaqalo ni ligana, ka kumuna vata e nai vakarau na qele kei vuravura, ka vakarauta e nai vakarau ni bibi na veiulu-ni-vanua, kei na veiulu-ni-koro e nai vakatovotovo? 13Ko cei sa kila rawa na Yalo i Jiova, se ko cei me nonai vakavuvuli me vakavulici koya? 14Erau sa bose vata kei cei, se ko cei sa vakavukui koya, ka vakavulici koya e nai valavala ni lewa, ka vakavulici koya me vuku; ia ko cei sa vakatakila vua na sala ni vuku? 15Raica, na veimatanitu sa nanumi me ra vaka e dua na mata ni wai e nai takitaki, ka vaka na kuvu-ni-soso e na dari ni vakarau; raica, sa tomika ko koya na veiyanuyanu me vaka sa ka lailai sara. 16Ia na kau mai Lepanoni, sa sega ni rauta me buka; ka sa lailai talega na kena manumanu mei soro kama. 17A veimatanitu kece sa vaka na ka walega vua; io, sa nanumi me ka lailai vei koya ka levu na ka sa sega, ka sa ka wale sara ga.
18Ia dou na qai vakatautauvatataka na Kalou kei cei? se dou na vakarauvatani koya kei na cava? 19Sa cakava na matakau ceuceu e dua na matai, ka dua na matai ni koula sa botana e na koula, ka sa bulia na kena sinucodo siliva. 20Ko koya sa dravudravua ka sa dredreta na cakai soro oqo, sa digitaka na kau sa sega ni vuca rawa; ka sa qai qara e dua na matai vuku, me vakaduria e dua na matakau ceuceu, ena sega ni yavala. 21Dou a sega beka ni kila? dou a sega ni rogoca? sa sega beka ni tukuni vei kemudou mailiu? dou a sega ni kila mai na gauna sa tauyavutaki kina ko vuravura? 22Sai koya ga sa tiko maicake ka toka era ko vuravura, ia na lewena era sa vaka na vodre; sai koya ga sa tevuka, me vaka nai ubi levu, na mata-ni-lagi; ka birika, me vaka na vale laca, mei tikotiko: 23Sai koya ga sa vakasivoi ira sara na tui; ia ko ira na turaga ni lewa kei vuravura sa cakava ko koya me ka wale sara: 24era sega ni tei dina, era sega ni kaburaki dina, sa sega ni tei sobu dina ki na qele na wakadra; ka sa uvuci ira walega ko koya, a ra sa malai, ia na covulaca ena kauti ira tani me vaka na qa ni sila.
25Ia dou na qai vakatautauvataki au kei cei, se me keirau vakatautauvatataki kei cei? sa kaya ko Koya na Yalosavasava. 26Dou ta cake, ka rai yani; ko cei ka bulia na ka oqori? ka sa kauta vakamataivalu mai na kedrai vavakoso? sa kacivi ira kecega e na yacadra, ka ni sa levu na nona kaukauwa, ka sa daugumatua sara; sa sega e dua sa yali.
27A cava ko sa vosa kina, ko iko Jekope, ko iko talega Isireli, ka kaya sa vuni tu na noqu sala vei Jiova, ia na noqu ka ka'u sa dodonu kina sa takali tani vua na noqu Kalou? 28Ko sa sega beka ni kila? ko sa sega ni rogoca? ko koya sa Kalou ka tawa mudu, ko Jiova, ko koya ka bulia nai yalayala kei vuravura; ena sega ni malumalumu ko koya, ena sega ni oca; sa sega ni dikevi rawa na nona vuku. 29Sa dausolia na kaukauwa vei ira era sa malumalumu: ia ena vakalevutaka na kaukauwa vei ira era sa sega ni gumatua rawa. 30Io era na malumalumu ka oca ga na cauravou, a ra na bale sara na tamata bula: 31ia ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici ka sega ni oca, era na lako tu, ka sega ni malumalumu.
Currently Selected:
AISEA 40: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
