AISEA 39
39
Sa vakaraitaka ko Esekaia na nonai yau vei ira nai talaki nei tui Papiloni, 1,2; sa qai tukuna ko Aisea na veivakabobulataki ki Papiloni, 3-8.
1E na gauna ko ya ni sa rogoca ko Merotaki-paletani na tui Papiloni, na luve i Paletani, ni sa tauvi mate ko Esekaia, ka sa bula tale, sa qai vakauta vua nai vola kei na ka-ni-loloma. 2Ka sa rekitaki ira ko Esekaia, ka vakaraitaka vei ira na vale ni nona ka talei, na siliva, kei na koula, kei na ka boi vinaka, kei na waiwai vinaka, kei na vale taucoko ni nonai yaragi, kei na nonai yau kecega: sa sega e dua na ka e nona vale, kei na nona matanitu taucoko, me sega ni vakaraitaka vei ira ko Esekaia.
3Sa qai lako mai kivei Esekaia na tui ko Aisea na parofita, a sa kaya vua, A cava era kaya ko ira na tamata oqo? ka ra sa lako maivei kivei iko? Ka sa kaya ko Esekaia, Era sa lako mai na vanua vakayawa, io mai Papiloni. 4Sa qai kaya ko koya, A cava era sa kunea mai nomu vale? Ka sa kaya ko Esekaia, Na ka kecega sa tu e noqu vale era sa kunea: sa sega e dua na noqu i yau ka'u sa sega ni vakaraitaka vei ira. 5A sa kaya vei Esekaia ko Aisea, Mo rogoca mada na vosa i Jiova ni lewe vuqa: 6Raica, sa lako mai na gauna ena kau tani kina ki Papiloni na ka kecega sa tu e na nomu vale, kei na ka era sa binia na nomu qase ka yacova na siga oqo: ena sega ni vo e dua na ka, sa kaya ko Jiova: 7ia ko ira na luvemu era na tubu emuri maivei iko, ko ira ko na vakatubura, era na kauta tani; ka ra na matanivanua e na vale vakaturaga i koya na tui Papiloni. 8A sa kaya vei Aisea ko Esekaia, Sa vinaka na vosa i Jiova ko sa mai tukuna. Sa kaya talega, Sa na tiko na sautu kei na ka dina e na noqu gauna.
Currently Selected:
AISEA 39: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
