AISEA 26
26
A nodra sere ni vakavinavinaka na Isireli vua na Kalou e na vuku ni nona cudruvi ira na nodra meca, kei na nona vakabulai ira, 1-19. Sa vakaroti ira me ra vakararavi tikoga vei Jiova me vakayacora mada na ka oqori, 20,21.
1E na siga ko ya ena seretaki na sere oqo e na vanua ko Juta; Sa dua na noda koro kaukauwa; ena lesia ko Koya na veivakabulai me bai kei na bai ni valu. 2Dou dolava na matamata-ni-koro, me curu kina na matanitu yalododonu sa taura tiko na dina. 3Ko koya sa lomadei vei kemuni ko ni na vakacegui koya dina sara: ka ni sa vakararavi vei kemuni. 4Dou vakararavi vei Jiova ka sega ni mudu, ni sa uluvatu e sega ni oti rawa na TURAGA ko JIOVA. 5Ni sa vakabalei ira sobu ko koya era a tiko e cake; sa biuta sobu na koro cecere; sa biuta sobu sara ki na qele; sa vakabalea ki na kuvu-ni-soso. 6Ena butuki sobu e na yavadra; io na yavadra na luveniyali kei na yavadra na dravudravua. 7A nodra sala na yalododonu sa dodonu sara: koi kemuni, na Yalododonu sara, ko ni na vakadodonutaka na nodra sala na yalododonu. 8Io, e na sala ni nomuni lewa dodonu, Jiova, keimami a waraki kemuni; sa gadreva na yacamuni na yalo i keimami, kei na ka ko ni sa nanumi kina. 9E na vu ni lomaqu ka'u sa gadrevi kemuni e na bogi; io, e na vu ni yaloqu ka'u sa qarai kemuni e na mataka: ia ni kemuni sa cudruvi vuravura, era na qai vulica nai valavala dodonu na lewe i vuravura. 10Kevaka sa lomani na tamata ca, ke sega ni vulica nai valavala dodonu ko koya: e na vanua daucaka dodonu ena caka vakatawadodonu ga kina ko koya, ka sega ni via raica na ka vakaturaga i Jiova. 11Kemuni Jiova, sa dulaki cake na ligamuni, a ra sa bese ni raica; ia era na raica ga na nomuni lomakatakata e na vukudra na nomuni tamata, ka madua; io, na bukawaqa ena kani ira na nomuni meca. 12Kemuni Jiova, ko ni na lewa me neimami na vakacegu: ni kemuni sa cakava kecega vei keimami na cakacaka me yaga vei keimami. 13Kemuni Jiova, ko ni sa neimami Kalou, ia era a lewai keimami ko ira na turaga tani; ia e na vukumuni duaduaga keimami na vakacaucautaka na yacamuni. 14Era sa ciba, era na sega ni bula; Era sa mate, era na sega ni tu cake tale: O koya kemuni sa talevi ira ka vakarusai ira, ka vakaotia na ka kece era sa nanumi kina. 15Ko ni sa vakalewevuqataka na matanitu, Jiova; ko ni sa vakalewevuqataka na matanitu; ko ni sa dokai: ko ni sa vakarabailevutaka nai yalayala kecega ni vanua. 16Kemuni Jiova, ni ra sa rarawa, era sa qai qarai kemuni; era sa sova na masu vuni ni kemuni sa cudruvi ira. 17Me vaka na yalewa bukete e voleka ni vakasucu, sa yaluma, ka qoqolou ni sa taratara tiko; keimami a vakakina e matamuni, Jiova. 18Keimami a bukete, keimami a yaluma, sa vaka ni keimami a vakasucuma na cagi: keimami a sega ni vakabula rawa na vanua; ka ra sa sega ni lutu na kai vuravura. 19Ena bula ko ira na nomu mate, ia ko ira na noqu mate era na tu cake tale. Dou yadra ka sere, koi kemudou ka tiko e na kuvu-ni-soso, ni sa vaka na tegu e na co na nomu tegu, ia na qele ena biuti ira tani na mate.
20Koi kemudou na noqu tamata, dou lako mai ka curuma na nomudou yasana vuni, ka sogota na nomudou katuba; dou vunitaki kemudou vakalailai ga me takali mada na veicudruvi. 21Ia dou raica, sa lako mai ko Jiova mai na nona yasana me cudruvi ira na kai vuravura e na vuku ni nodra i valavala ca; ia ko vuravura ena vakaraitaka na kena dra, ka sega ni ubi ira tiko na nona moku mate.
Currently Selected:
AISEA 26: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
