AISEA 11
11
Sa tukuna na Mesaia, ko koya sa vakatokai na Coke sa tubu mai na dulumi i Jese, 1-5. Ena tubu na sautu e vuravura e na nona lewa, 6-9. Ena lesu tale mai vua ko ira na Isireli, era na kacivi na lewe ni veivanua, me ra lewe ni nona matanitu, 10-16.
1Ia ena tubu mai e dua na Coke mai na dulumi i Jese, ka na tubu cake mai na wakana e dua na Tabana. 2Ka na tiko ga vua na Yalo i Jiova, na Yalo ni vuku kei na lewa dina, na Yalo ni vakavuvuli kei na kaukauwa, na Yalo ni daukila ka kei na rerevaki Jiova: 3Ena rekitaka sara ko koya na rerevaki Jiova: ena sega ni lewa ko koya me vaka na ka sa rairai walega vua, se vunauca me vaka na ka sa rogoca e daligana: 4Ena lewai ira vakadodonu ga na dravudravua, ka lewa vakadodonu e na vukudra na yalomalumalumu e vuravura: ena yaviti vuravura e nai titoko ni gusuna, ia e nai cegu ni tebenigusuna ena vakamatei ira nai valavala ca. 5Ena kenai vau ni tolona na yalododonu, kei na yalodina.
6Ia ena tiko vata na wolifa kei na lami, ka na davo vata na lepate kei na luve ni me; ena tiko vata talega na luvedratou na pulumokau kei na laioni kei na manumanu uro; ia ena tuberi iratou e dua na gone lailai. 7Ena kana vata na pulumokau yalewa kei na pera; ena koto sobu vata na luvedratou: ia na laioni ena kania na co ni sila me vaka na pulumokau. 8Ena qito mai na qara ni gata na gone dramidrami, ia ena tabaka e na ligana na qara ni gata daukata na gone sa qai kali. 9Era na sega ni ia na veivakacacani se na veivakamatei e na noqu ulu-ni-vanua tabu kecega: ni na roboti ko vuravura e na veikilai kei Jiova, me vaka sa ubia na wasa titobu na wai. 10Ia e na siga ko ya ena dua na coke kei Jese, ena tu me nodra kuila na veimataqali; era na vakasaqarai koya ko ira na veimatanitu: ia na nonai tikotiko ena vakaiukuuku. 11Ia ena yaco e na siga ko ya, ena baci dodoka tale vakarua na ligana na Turaga, me vakabulai ira na kena vo ni nona tamata, era sa vo tiko, mai Asiria, kei Ijipita, kei Pacirosi, kei Kusa, kei Ilama, kei Saina, kei Emaci, kei na veiyanuyanu mai na wasawasa. 12Ia ena vakarewataka ko koya e dua na kuila vei ira na veimatanitu, ka vakasoqoni ira vata na Isireli era sa biu laivi, ka na soqona vata ko koya na Juta era dui veiseyaki mai nai yalayala vava kei vuravura. 13Ena takali talega na vuvu i Ifireimi, ka ra na muduki tani na meca i Juta: ena sega ni vuvutaki Juta ko Ifireimi, ena sega talega ni vakararawataki Ifireimi ko Juta. 14A rau na vukaca na nodra i yalayala na kai Filisitia ki ra; erau na lomavata me vakacataki ira na kai na tu-i-cake: erau na tarai Itomi kei Moapi; ka ra na talairawarawa vei rau ko ira na luve i Amoni. 15Ena vakarusa sara ko Jiova na toba ni wasawasa ni Ijipita; ena yalovaka na ligana ki na uciwai e na nona cagi levu, ka yavita me vitu mada na kena soniwai, ka kauti ira yani na tamata ka me sega ni suasua na yavadra. 16Ia ena dua na nodra salatu na kena vo ni nona tamata, era sa vo tiko, mai Asiria; me vaka sa dua na nodra na Isireli e na siga era a lako cake kina mai na vanua ko Ijipita.
Currently Selected:
AISEA 11: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
