OSEA 11
11
A loloma ni Kalou vei ira na Isireli; kei na nodra sega ni loloma vua, 1-4. Era sa cudruvi kina, 5-7. Sa vosavakayalololoma tale vei ira na Kalou, 8-11. A nodra daulasu na Ifireimi, kei na nodra lomadina na Juta, 12.
1Ni sa gone ko Isireli, ka'u a lomani koya, ia ka'u a kaciva na luvequ mai Ijipita. 2Ni ra sa kacivi ira, era sa lako tani ga vei ira: sa ra soro vei ira na Peali, ia era vakama na ka boi vinaka ki na matakau ceuceu. 3Ia ka'u a vakavulici ira na Ifireimi e na lako, ka taura na ligadra; ia era sega ni kila ni'u a vakabulai ira. 4E na dali ni tamata ka'u a tuberi ira, e nai vau ni loloma: ia ka'u a vakataki ira era sa laveta nai vau mai na gusudra, ia ka'u a tauca vei ira na kakana.
5Era na sega ni lesu tale ki na vanua ko Ijipita, ia na kai Asiria, ena nodra tui ga ni ra bese ni veivutuni. 6Ia nai seleiwau ena tau ki na nodra veikoro, ka vakaotia na tabana, ka kania, e na vuku ni ka era bosea. 7Ia na noqu tamata era sa gu ga me ra vuki tani vei au: ni ra kacivi ira me ra lako mai vua sa Cecere, ia sa sega e dua sa vakacaucautaki koya.
8Au na laivi iko vakaevei, Ifireimi? au na soli iko yani vakaevei, Isireli? au na soli iko vakaevei mo tautauvata kei Atima? au na cakavi iko vakaevei mo tautauvata kei Sepoimi? sa dua tani mai na yaloqu e lomaqu, sa tubu sara mai na noqu dauloloma. 9Au na sega ni vakayacora na noqu cudru katakata, au na sega ni lesu tale me'u vakarusai Ifireimi: ni'u sa Kalou, ka'u sega ni tamata; sai au na Yalosavasava e na kemudou maliwa: ia ka'u na sega ni curu ki na koro. 10Era na muri Jiova, ena qai tagi ko koya me vaka na laioni: ni sa tagi ko koya, era na qai lako rerere mai ko ira na luvena mai ra. 11Era na lako rerere mai Ijipita me vaka na manumanu vuka, ka vaka na ruve mai na vanua ko Asiria: ia ka'u na vakaitaukeitaki ira tale e na nodra veivale, sa kaya ko Jiova.
12Sa ra vakavolivoliti au e na lasu ko ira na Ifireimi, kei na mataqali i Isireli talega e na veivakaisini: ia ko ira na Juta sa ra lewa vata tiko kei na Kalou, ka sa lomadina vua sa Yalosavasava sara.
Currently Selected:
OSEA 11: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
