OSEA 12
12
Era sa vunauci ruarua na Ifireimi kei na Juta, 1,2. Sa tukuni vei ira me ra muria nai valavala i Jekope na nodra qase, 3-6. A nodra i valavala vakailasu na Ifireimi sa vu ni nodra cudruvi, 7-14.
1O ira na Ifireimi era sa kana cagi, io, era sa muria na cagi mai na tu-i-cake: e na veisiga kecega era sa kuria na vosa lasu kei na vakacaca; ka ra sa ia na veiyalayalati kei ira na kai Asiria, a waiwai talega sa kau ki Ijipita. 2Sa dua talega na ka e veiletitaka kei Juta ko Jiova, ia ena cudruvi Jekope ko koya me vaka na nonai valavala; ka na saumi koya me vaka na nona cakacaka.
3E na kete i tinana sa taura ko koya na bukubuku ni yava i tuakana, ia ni sa kaukauwa ko koya sa gumatua vua na Kalou: 4io, sa gumatua vei koya na agilose ko koya, ka sa rawai koya: sa tagi ko koya, ka vakamamasu vua: ia sa kunei koya mai Peceli ko koya, ka vosa kina vei keda maikea; 5io, ko Jiova na Kalou ni lewe vuqa; ko Jiova na yacana e daukilai kina. 6Ia ko iko, mo lesu mai kina vua na nomu Kalou mo vakabauta nai valavala loloma kei na ka dodonu, ka waraki koya tikoga na nomu Kalou.
7Sa dua na dauveivoli ko koya, ai vakarau ni bibi daulasu sa tu e ligana: sa vinakata me ia na veivakasaurarataki. 8A sa kaya ko Ifireimi, Au sa vutuniyau ga, au sa rawata ga eso na noqu i yau: e na noqu cakacaka kecega era na sega ni kunea vei au na caka cala mei valavala ca. 9Ia koi au ko Jiova na nomu Kalou mai na vanua ko Ijipita, ka'u na vakatikori iko tale e na vale laca, me vaka e na siga ni so tabu. 10Au a vosa talega e na gusudra na parofita; ia, ka'u a vakalevutaka na raivotu, e na gusudra talega na parofita ka'u a ia na vosa vakatautauvata. 11Sa tu beka mai Kiliati na caka cala? e dina era sa lasu wale: era sa vakamatea na pulumokau mai Kilikali mei soro; io, na nodra i cabocabo-ni-soro sa vaka nai binibini vatu e na bati ni tova ni veiwere.
12A sa dro ko Jekope ki na vanua ko Siria, io, sa ia na veiqaravi ko Isireli me dua kina na watina, ia me rawa e dua na watina sa vakatawa sipi kina ko koya. 13Ia e na dua na parofita sa kauti ira na Isireli mai Ijipita ko Jiova, e na dua talega na parofita sa vakatawai kina. 14Sa ra ia na veivakacudrui vakararawa sara ko ira na Ifireimi: ena baleti ira kina na kedra dra, a nodra i rogorogo ca talega ena vakasuka vei ira ko koya na nodra Turaga.
Currently Selected:
OSEA 12: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
