NAI VAKARUA 21
21
Ai soro e na vuku ni moku sa sega ni kilai, 1-9. Ai vakaro e na vuku ni goneyalewa sa vakabobulataki, 10-14. Ai vakaro e na vuku ni ulumatua, 15-17. Me lauviri mate na gone sa talaidredre, 18-21. Me kakua ni lili tu e na kau e na bogi na tamata caka ca, 22,23.
1Kevaka sa kune e dua sa moku-mate e na vanua sa solia vei kemuni ko Jiova na nomuni Kalou mo ni taukena, sa koto e na vanua, ia sa sega ni kilai se ko cei sa mokuta: 2me ra qai lako yani na nomuni qase kei na nomuni mataveilewai, a ra na vakarautaka na kena yawa ki na veikoro sa voliti koya sa moku-mate: 3ia ko ira na qase ni koro sa voleka kivei koya sa moku-mate, era na kauta e dua na luve ni pulumokau yalewa, sa sega ni taurivaki e na dua na cakacaka, sa sega ni yara e nai vau; 4ia na qase ni koro ko ya, era na kauta sobu na luve ni pulumokau yalewa ki na buca sa sega ni cuki ka sega ni tei, ka tamusuka maikeri na domo ni luve ni pulumokau e na buca; 5ia era na qai toro mai na bete na luve i Livai; ni sa digitaki ira ko Jiova na nomuni Kalou me ra qaravi koya, ka tauca na vosa ni veivakalougatataki e na yaca i Jiova; ia e na nodra vosa ena lewai na ka kecega e veiletitaki kei na moku kecega: 6ia na qase kecega e na koro ko ya sa voleka vei koya sa moku mate, me ra vuluvulu e dela ni luve ni pulumokau sa tamusuki na uluna e na buca: 7a ra na vosa, ka kaya, A liga i keitou sa sega ni vakadavea na dra oqo, a sa sega ni raica na mata i keitou: 8I Jiova, mo ni yalololoma, vei ira na nomuni tamata na Isireli, ko ira ko ni a vakabula, mo ni kakua talega ni beitaki ira na nomuni tamata na Isireli e na dra sa sega ni cala. Era na qai sega ni cudruvi e na dra ko ya. 9O ni na biuta tani kina na dra sa sega ni cala mai na kemuni maliwa, ni kemuni na caka dodonu e na mata i Jiova.
10Ni kemuni sa lako yani me vala kei ira na nomuni meca, a sa soli ira ko Jiova na nomuni Kalou ki na ligamuni, ka ko ni sa vakabobulataki ira, 11ia ko ni sa raica vei ira na bobula e dua na yalewa matavinaka, ka ko ni sa domona, ka via taura me watimuni: 12ko ni na qai kauta ki na nomuni vale; ia me tasia na uluna ko koya, ka civia na nonai taukuku; 13ka me luvata tani ko koya na nonai sulu ni bobula, ka tiko e na nomuni vale, ka tagicaki tamana kei tinana ka dua dina na vula: ka sa oti, ko na qai kauti koya mo drau veiwatini kaya. 14Ia kevaka ko na sega ni vinakati koya, mo ni qai laiva me lako veitalia yani ko koya; ia e tabu sara mo ni volitaka e nai lavo; mo ni kakua ni volitaka, ni kemuni sa vaqasea.
15Kevaka sa le rua na watina e dua na tamata, ka sa lomana e dua, ka cata e dua, a rau sa vakasucu gone, ko koya sa lomani kei koya talega sa cati; a sa nona sa cati na ulumatua tagane: 16ni sa vota na nonai yau ko koya vei ira na luvena, sa tabu ni vakabauta na luve i koya sa lomani me ulumatua, ka biuta na luve i koya sa cati, ko koya sa ulumatua: 17ia me vakabauta ga ko koya na ulumatua na luve i koya sa cati, ka ni sa solia vua e rua nai votavota ni nona ka kecega: ni sai matai ni nona kaukauwa ko koya; sa dodonu me nona nai votavota ni ulumatua.
18Kevaka sa yalovakatani ka dautalaidredre na luvena tagane e dua na tamata, ka sa bese ni vakarorogo kivei tamana, se vei tinana, ka rau sa dauvakanakuitataki koya, ka sa sega ni vakarorogo vei rau: 19me rau qai taura na tamana kei na tinana, ka kauta yani vei ira na qase ni nona koro, ki na matamata-ni-koro ni nona yasana; 20a rau na kaya vei ira na qase ni nona koro, A luve i keirau oqo sa yalovakatani ka dautalaidredre, sa bese ni vakarorogo kivei keirau; sa daukana ko koya, ka daumateni. 21Era na qai vakaviriki koya e na vatu ko ira kecega na lewe ni nona koro, me mate kina: ko ni na vakaotia kina na ca mai na kemuni maliwa; ia era na rogoca ko ira na Isireli kecega, ka ra na rere.
22Ia kevaka e dua na tamata sa kitaka nai valavala ca sa dodonu me mate kina, a sa lewai ko koya me mate, ka ko ni sa vakalilica e na kau: 23me kakua ni lili tu na yagona e na kau e na bogi, ia mo ni buluta e na siga dina ga ko ya; (ni sa cudruvi maivua na Kalou ko koya sa vakalilici e na kau;) mo ni kakua kina ni vakadukadukalitaka na nomuni vanua, sa solia vei kemuni ko Jiova na nomuni Kalou mo ni taukena.
Currently Selected:
NAI VAKARUA 21: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
