NAI VAKARUA 20
20
Na bete kei na turaga lalai me bukutaki ira na tamata ni ra lako ki nai valu, 1-9. Ai vakaro eso e na vuku ni valu, 10-20.
1Ni kemuni sa lako yani me vala kei ira na nomuni meca, ka sa raica na ose kei na qiqi-ni-valu, kei na tamata era lewe vuqa, ka lewe lailai ko kemuni, mo ni kakua ni rerevaki ira: ni sa tiko vata kei kemuni ko Jiova na nomuni Kalou, o koya ka kauti kemuni cake mai na vanua ko Ijipita. 2Ia ni kemuni sa la'ki toro voleka ki nai valu, me qai toro mai na bete ka vosa vei ira na tamata, 3ka kaya vei ira, Mo ni rogoca, na Isireli, kemuni sa toro ki nai valu edaidai vei ira na nomuni meca: me kakua ni waicala na yalomuni, mo ni kakua ni rere, ni kakua tale ni sautaninini, ni kakua talega ni domobula e na vukudra; 4ni sa lako vata kei kemuni ko Jiova na nomuni Kalou, me veivala kei ira na nomuni meca ka totaki kemuni, ka me vakabulai kemuni.
5Me qai vosa vei ira na tamata ko ira na turaga lalai, ka kaya, Ko cei vei kemuni sa tara e dua na vale vou, ka sa sega ni curuma? Me lesu ko koya ki na nona vale, de mate e nai valu, ka sa curuma na tamata tani: 6Se ko cei na tamata sa tea e dua na were ni vaini, a sa sega ni kania na kenai matai? me lesu ga ko koya ki na nona vale, de mate e nai valu, ka qai kania na kenai matai na tamata tani: 7Se ko cei na tamata sa veivosaki kei na dua na yalewa me watina, a sa sega ni kauti koya? me lesu ga ko koya ki na nona vale, de mate e nai valu, ka qai vakawati kaya na tamata tani. 8Ia me ra vosa tale vei ira na tamata ko ira na turaga lalai, ka me ra kaya, Ko cei vei kemuni sa rere ka sa waicala na lomana? me lesu ga ko koya ki na nona vale, de waicala na yalodra na wekana me vakataki koya. 9Ia ni ra sa vosa oti na turaga lalai vei ira na tamata, me ra qai lesia na turaga ni mataivalu me liutaki ira na tamata.
10Ni kemuni sa toro voleka ki na dua na koro me veivala kaya, mo ni qai kacivaka kina me sautu. 11Ia kevaka sa vosa vinaka mai vei kemuni ka me sautu, ka sa dolava na koro vei kemuni, me ra qai nomuni qali na tamata kecega era sa tiko kina, a ra na qaravi kemuni. 12Ia kevaka sa bese ni sautu kei kemuni, ka sa bolea ga me vala kei kemuni, mo ni qai bukuya na druadrua ni koro ko ya: 13ia ni sa solia ki na ligamuni ko Jiova na nomuni Kalou, mo ni qai yavita na kena tagane kecega e nai seleiwau: 14ia ko ira na yalewa, kei na gone, kei na manumanu e yavai va, kei na ka kecega sa tiko e na koro, io na kenai yau kecega, mo ni tokitaka me nomuni; ia mo ni kania nai toki maivei ira na nomuni meca, o koya sa solia vei kemuni ko Jiova na nomuni Kalou. 15Mo ni kitaka vakaoqo ki na veikoro kecega sa tiko vakayawa sara vei kemuni, era sa sega ni koro ni veimatanitu oqo. 16Ia na koro ni veimatanitu oqo, o koya sa solia vei kemuni ko Jiova na nomuni Kalou mo ni taukena, mo ni kakua ni vakabula e dua na ka sa bula: 17mo ni vakarusai ira sara ga: ko ira na Itaiti, kei na Amoraiti, na kai Kenani, kei na Perisaiti, na Aivaiti, kei na Jepusaiti; me vaka sa vakaroti kemuni ko Jiova na nomuni Kalou: 18me ra kakua kina ni vakavulici kemuni me kitaka na nodra ka vakasisila kecega, era sa kitaka ki na nodra kalou; mo ni kakua kina ni valavala ca vei Jiova na nomuni Kalou.
19Ni kemuni sa buku druadrua ni dua na koro ka sa dede, ni kemuni sa kaba tiko, mo ni kakua ni vakacacana na kena kau sa dauvua: ni kemuni na kana rawa kina, ia mo ni kakua kina ni taya sobu; ni sa nona na tamata na kau ni vanua, me yaga ni sa buku na druadrua: 20Ia na kau ga ko ni sa kila sa sega ni daukani na vuana, mo ni vakacacana ka taya sobu; ia mo ni viri bai ki na koro sa veivaluti kei kemuni, ka me vakamalumalumutaki mada.
Currently Selected:
NAI VAKARUA 20: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
