NAI VAKARUA 22
22
Me ra tiko veilomani na veiwekani, 1-4. Me kakua ni tautauvata nai sulu ni yalewa kei nai sulu ni tagane, 5. Me kakua ni tobo vata na manumanu vuka kei na luvena, 6,7. Me viribaiti na dela ni vale, 8. Me kakua ni tei vata e na dua na were na sore ni kau e vuqa, 9. Me kakua ni veiliwaitaka vata na pulumokau kei na asa, 10. Me kakua ni sulumaki nai sulu lineni sa tali vata kei na vutika ni sipi, 11. Me vakabeleni nai sulu, 12. A lewa e na vuku ni veiwatini, 13-30.
1Mo ni kakua ni raica na pulumokau se na sipi ni wekamuni ni sa lako sese, ka weletaka: mo ni kauta tale vua na wekamuni. 2Ia kevaka sa sega ni voleka vei kemuni na wekamuni, se ko sa sega ni kilai koya mo ni qai kauta ki na nomuni vale, ia mo ni maroroya ka me vakasaqara mada na wekamuni, mo ni qai vakasuka tale vua. 3Mo ni kitaka vaka talega kina e na vuku ni nona asa; ia mo ni kitaka vakakina e na vuku ni nonai sulu; ia na ka kecega sa vakayalia ko koya na wekamuni, ka ko ni sa kunea, mo ni kitaka vakakina: e tabu mo ni wele kina. 4Mo ni kakua ni raica na nona asa na wekamuni se nona pulumokau, ni sa bale koto e na sala, ka weletaka: mo ni vukei koya dina mo drau vakaduria cake tale.
5Me kakua ni vakaisulutaka nai sulu ni tagane na yalewa, me kakua talega ni vakaisulutaka nai sulu ni yalewa na tagane: ni ra sa ka vakasisila vei Jiova na nomuni Kalou ko ira kecega era kitaka na ka oqo.
6Kevaka ko ni sa la'ki donuya e dua nai oviovi ni manumanu vuka e na sala, se e na dua na kau, se na qele, se tiko kina na luvena se na yaloka, a sa ovica tiko na luvena se na yaloka na tinatina, mo ni kakua ni kauta vata na tinatina kei na luvena: 7mo ni biuta tu ga na tinatina, ia sa tara vei kemuni mo ni kauta na luvena; me yaco kina vei kemuni na ka vinaka, ka me balavu na nomuni bula.
8Ni kemuni sa tara e dua na vale vou, mo ni qai viria e dua na bai e na dela ni nomuni vale, mo ni kakua kina ni vakayacora na dra ki na nomuni vale, kevaka sa lutu maikina e dua na tamata.
9Mo ni kakua ni tea e na nomuni veivaivaini na sore ni kau tani: de vakadukadukalitaki na vua ni sore ni kau ko ni sa tea, kei na vua ni veivaivaini talega.
10Me rau kakua ni veiliwaitaki vata na pulumokau kei na asa me yarataka nai siviyara.
11Mo ni kakua ni vakaisulu e nai sulu sa tali vata kina na ka tani, na vutika ni sipi kei na lineni.
12Mo ni cakava e dua na manumanu e na bati ni nomuni sulu vava, ko ni sa tutuvi kina.
13Kevaka sa taura e dua me watina e dua na tagane, a rau sa veiyacovi kaya, a sa cati koya, 14ka beitaka vua na ka ca, ka vakarogocataka na yacana, ka kaya, Au a kauta na yalewa oqo, ia ni ka'u a mocera, au sa qai kila ni sa sega ni goneyalewa: 15me rau qai kauta na goneyalewa ko tamana kei tinana kei nai vakatakilakila ni nona goneyalewa, vei ira na qase ni koro, ki na matamata-ni-koro: 16ena qai kaya na tama ni goneyalewa vei ira na qase, Au a solia na luvequ vua na tagane oqo me watina, a sa cata ko koya; 17ka raica, sa beitaki koya vakaca, ka vaka, Au a kunea na luvemu ni sa sega ni goneyalewa; ia oqo nai vakatakilakila ni nona gone yalewa na luvequ. Me rau qai tevuka nai sulu e matadra na qase ni koro. 18Ia ko ira na qase ni koro ko ya me ra qai taura na tamata ko ya, ka vakanakuitataka; 19a ra na vakaitotogitaki koya, me dua na drau na sikeli siliva, me soli ki na tama ni goneyalewa ni sa vakarogocataka na yacana e dua na goneyalewa ni Isireli: ia ena watina tikoga ko koya; sa tabu vua me biuta tani ni sa bula tiko ko koya. 20Ia kevaka sa dina na ka oqo, ka sa sega ni kune na nonai vakatakilakila ni goneyalewa: 21era na qai kauta na yalewa ki na katuba ni vale nei tamana, a ra na vakavirika e na vatu na lewe ni nona koro me mate ko koya: ka ni sa kitaka na ka lialia e Isireli, ni sa dautagane e na vale nei tamana: kemuni na vakaotia kina na ca mai na kemuni maliwa.
22Kevaka sa kune e dua na tamata ni sai valavala ca vata kei na yalewa sa vakawati, erau na mate ruarua, na tagane sa ca vata kaya na yalewa, kei na yalewa talega: kemuni na vakaotia kina na ca maivei Isireli.
23Kevaka sa dua na goneyalewa, sa musu vua e dua na tagane, a sa kunei koya e na koro e dua na tagane, ka rau ca kaya; 24dou na qai kauti rau ruarua yani ki na matamata ni koro ko ya, ia dou na vakaviriki rau e na vatu me rau mate; na goneyalewa, ni sa sega ni qoqolou, e na koro: kei koya na tagane, ni sa vaqasea na wati ni kai nona: kemuni na vakaotia kina na ca mai na kemuni maliwa.
25Ia kevaka e dua na tagane sa kunea mai na veiwere e dua na goneyalewa sa musu, a sa tauri koya vakaukauwa na tagane, ka vakacacani koya: ena qai mate duaduaga na tagane sa kucuva: 26ia mo ni kakua ni kitaka e dua na ka vua na goneyalewa; sa sega na ka e dodonu me mate kina na goneyalewa: ni sa tautauvata na ka oqo kei na nona tu e dua na tamata, ka vakamatea na kai nona: 27sa kunei koya e na veiwere ko koya, a sa qoqolou na goneyalewa sa musu, ka sega e dua me vakabulai koya.
28Kevaka e dua na tagane sa kunea e dua na goneyalewa sa sega ni moce kei na tagane, ka sa sega ni musu, ka sa taura, ka moce vata kaya, ka rau sa kune; 29ena qai solia ki na tama ni goneyalewa ko koya na tagane sa moce vata kaya e limasagavulu na sikeli siliva, ia ena qai watina ko koya; ni sa vaqasei koya, sa tabu vua me biuta tani ni sa bula tiko ko koya.
30Sa tabu vua na tagane me vakawati kei na wati i tamana, se vakarairaitaka na luvawale nei tamana.
Currently Selected:
NAI VAKARUA 22: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
