NAI VAKARUA 19
19
A veikoro mei drodro, 1-13. Me kakua ni kisiri nai yalayala ni vanua, 14. Me le rua na tamata sa beitaka na tamata me cudruvi kina, 15. Me cudruvi na tamata sa beitaka vakailasu e dua, 16-21.
1Ni sa muduki ira tani ko Jiova na nomuni Kalou na veimatanitu, ko ira sa solia na nodra vanua vei kemuni ko Jiova na nomuni Kalou, ka ko ni sa kedrai sosomi, ka tiko e na nodra veikoro, kei na nodra veivale: 2mo ni qai lesia vei kemuni e tolu na koro e na nomuni loma ni vanua, sa solia vei kemuni ko Jiova na nomuni Kalou mo ni taukena. 3Mo ni caramaka na sala, ka wasea tolu na veiyasana ni nomuni vanua, sa solia vei kemuni ko Jiova na nomuni Kalou mo ni taukena, me dro kina ko koya yadua sa vakamatea e dua na tamata.
4Ia oqo nai valavala e na vukuna sa vakamatea e dua ka sa dro kina, me bula: Ko koya sa vakamatea na kai nona ni sa sega ni nakita, ka sega ni cati koya eliu; 5me vaka ni rau lako na tamata kei na kai nona ki veikau me ta kau, a sa laveta na matau e na ligana me taya na kau, a sa taucu na matau mai na kena dia, a sa lauta na kai nona, ka sa mate kina; me dro ko koya ki na dua na koro oqo, ka me bula; 6de vakasavi koya sa ia na veivakamatei ko koya sa nonai tavi me cudruvaka na mate, ni sa katakata tu na lomana, ka vauci koya, ka mokuta-mate ni sa rui balavu na sala; ia sa sega ni dodonu me mate ko koya, ni sa sega ni cati koya eliu. 7O koya ka'u a vakaroti kemuni kina, ka vaka, Mo ni wasea tani e tolu na nomuni koro.
8Ia kevaka sa vakalevutaka na nomuni vanua ko Jiova na nomuni Kalou, me vaka ka bubului kina vei ira na nomuni qase, ka solia vei kemuni na vanua kecega ka yalataka ko koya me solia vei ira na nomuni qase; 9kevaka ko ni sa vakabauta ka cakava nai vakaro kecega oqo ka'u sa vakarota vei kemuni edaidai, mo ni lomani Jiova na nomuni Kalou, ka mo lako tikoga e na nona sala; ko ni na qai kuria tale e tolu na nomuni koro, mei kuri ni koro tolutolu oqo: 10me kakua kina ni vakadavei na dra sa sega ni cala e na nomuni vanua, sa solia vei kemuni ko Jiova na nomuni Kalou mo ni taukena, ka ko ni sa cudruvi e na vuku ni dra.
11Ia kevaka sa cata na kai nona e dua na tamata, ka namaki koya, ka mokuta-mate, ka sa qai dro ki na dua na koro oqo: 12me ra qai talaki na qase ni nona koro ka kauti koya maikina, ka soli koya vua sa nonai tavi me cudruvaka na mate, me mate ko koya. 13Me kakua ni lomani koya na matamuni, ia mo ni biuta tani vei ira na Isireli nai sau ni dra sa sega ni cala, me yaco ga kina vei kemuni na ka vinaka.
14Mo ni kakua ni kisira nai yalayala ni vanua ni kai nomuni, era sa vakatakilakilataka ko ira eliu, e na nomuni votavota, ko ni na taukena e na vanua sa solia vei kemuni ko Jiova na nomuni Kalou mo ni taukena.
15Me kakua ni dua bauga na tamata mei vakadinadina ni beitaki e dua e na dua na ka sa sega ni dodonu, se dua nai valavala ca sai valavala ca kina ko koya: me lewe rua se lewe tolu eratou kila, ena vakadinadinataki kina na cala ni tamata.
16Kevaka sa tu e dua na tamata ka tukutuku vakailasu, ni sa beitaka na tamata tani e na cala; 17me rau tu ruarua na tamata erau veibeitaki e na mata i Jiova, e na matadra na bete kei ira era sa turaga-ni-lewa e na gauna ko ya; 18ia me ra vakatarotaroga vakavinaka ko ira na turaga-ni-lewa: ia kevaka sa tukutuku vakailasu na tamata, ka sa beitaka vakailasu na wekana; 19kemuni na qai kitaka vua me vaka na ka ka nakita ko koya me kitaka vua na wekana: ko na vakaotia laivi kina na ca vei kemuni: 20Ia ko ira na tani, era na rogoca ka ra na rere, ka sega ni kitaka tale na ka ca vakaoqo e na kemuni maliwa. 21Ia mo ni kakua ni lomana e dua; mei sau ni mate na mate, mei sau ni mata na mata, mei sau ni bati na bati, mei sau ni liga na liga, mei sau ni yava na yava.
Currently Selected:
NAI VAKARUA 19: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
