NAI VAKARUA 18
18
Ko Jiova sa nodra i votavota na bete kei na Livai, 1,2. A kena tiki ni soro na bete, 3-5; a kedra na Livai, 6-8. Me biu na ka era vakasisila kina na veimatanitu, 9-14. Sa yalataki e dua na parofita levu, 15-19. Me vakamatei na parofita vakailasu, 20-22.
1Ko ira na bete na Livai, io ko ira kece na mataqali i Livai, ena sega na nodra tikina se nodra i votavota vata kei ira na Isireli: me ra kania ga na ka sa vakacabori vei Jiova e na bukawaqa, kei na nonai votavota. 2Era na sega kina ni votai e na kedra maliwa na wekadra: ko Jiova ga sa nodra i votavota, me vaka ka kaya vei ira.
3Ia sa dodonu me nodra na bete mai vei ira na tamata, maivei ira era vakacabora nai soro, se na pulumokau se na sipi; me ra solia vua na bete na tabana, kei na baluna ruarua, kei na kato ni kena. 4Ai sevu ni nomuni sila, na nomuni waini, kei na nomuni waiwai, kei na vutika na sipi sa koti taumada, mo ni solia vei koya. 5Ni sa digitaki koya ko Jiova na nomuni Kalou mai na nomuni mataqali kecega, me tu me ia na veiqaravi e na yaca i Jiova, ko koya kei ira na luvena ka sega ni mudu.
6Ia kevaka sa na lako mai na Livai mai na dua na nomuni koro e Isireli taucoko, sa tiko vulagi kina ko koya, a sa lako mai ni sa gu sara na lomana ki na yasana sa digitaka ko Jiova; 7ena qai ia na veiqaravi e na yaca i Jiova na nona Kalou, me vakataki ira kecega na Livai na wekana, era sa dautu e na mata i Jiova. 8Ena tautauvata na kedrai votavota me ra kania, ia ena kenai kuri talega vei ira yadua nai voli ni ka mai nona qase.
9Ni kemuni sa yaco ki na vanua sa solia vei kemuni ko Jiova na nomuni Kalou, mo ni kakua ni muria na nodra i valavala vakasisila na veimatanitu ko ya. 10Me kakua ni kune vei kemuni e dua me vakacabora na luvena tagane se na luvena yalewa e loma ni bukawaqa, se dua na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau, 11se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate. 12Ni ra sa tamata vakasisila vei Jiova ko ira kecega era sa kitaka na veika oqo: e na vuku talega ni veika vakasisila oqo sa vakasevi ira tani e matamuni ko Jiova na nomuni Kalou. 13Mo ni yalodina sara vei Jiova na nomuni Kalou. 14Ni ra sa vakarorogo vei ira era daudigitaka na siga eso, kei ira na rairai, ko ira na veimatanitu ko ni na taukena: ia koi kemuni, sa sega ni laivi kemuni ko Jiova na nomuni Kalou mo ni vakakina.
15Ena vakatubura vei kemuni ko Jiova na nomuni Kalou e dua na parofita mai na kemuni maliwa, maivei ira na wekamuni, me vakataki au; ko ni na vakarorogo vei koya; 16me vaka na ka kecega ko ni a kerea vei Jiova na nomuni Kalou mai Orepi, e na siga ni soqoni vata, ka kaya, Me'u kakua ni rogoca tale na domo i Jiova na noqu Kalou, me'u kakua talega ni raica tale na bukawaqa levu oqo, de'u mate kina. 17A sa kaya vei au ko Jiova, Sa ka dodonu na ka era sa kaya: 18au na vakatubura vei ira e dua na parofita maivei ira na wekadra, me vakataki iko, ia ka'u na vakacuruma na noqu vosa ki na gusuna; ia ena tukuna vei ira na ka kecega ka'u na vakarota vei koya: 19ia na tamata sa na sega ni vakarorogo ki na noqu vosa sa na tukuna ko koya e na yacaqu, au na tarogi koya kina.
20Ia na parofita sa doudou me cavuta e dua na vosa e na yacaqu, na ka ka'u sa sega ni vakarota vua me vosataka, se sa vosa e na yaca ni kalou tani eso, ena mate ga na parofita ko ya. 21Ia de ko ni kaya e lomamuni, Keitou na kila vakaevei na vosa sa sega ni cavuta ko Jiova? 22ni sa vosa e dua na parofita e na yaca i Jiova, kevaka sa sega ni caka na ka, se yaco mai, sa qai sega ni cavuta na ka ko ya ko Jiova; sa cavuta vakaviavialevu na parofita: mo kakua ni rerevaki koya.
Currently Selected:
NAI VAKARUA 18: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
