2 SAMUELA 5
5
Sa lako mai kivei Tevita ko ira na Isireli, ka buli koya me nodra tui, 1-5. Sa vala ko koya kei ira na kai Jepusa, 6-10. Sa tara ko Airami na nona vale, 11,12. O iratou na watina kei iratou na luvena, 13-16. Sa mokuti ira na kai Filisitia ko koya, 17-25.
1A ra sa lako mai kivei Tevita ki Epironi ko ira na veimataqali kecega ni Isireli, a ra sa kaya, Ni raica, sa suimuni, kei na lewemuni koi keimami: 2Ia e na gauna eliu, ni sa neimami tui ko Saula, sai kemuni ga ka kauti ira yani ka kauti ira tale mai na Isireli: a sa kaya vei kemuni ko Jiova, Oi kemuni ena vakatawai ira na noqu tamata na Isireli, ia ko ni na turaga ni valu vei ira na Isireli. 3A ra sa lako mai vua na tui ki Epironi ko ira kecega na qase ni Isireli; a sa veiyalayalati kei ira ko koya na tui ko Tevita mai Epironi e na mata i Jiova: a ra sa lumuti Tevita me nodra tui na Isireli.
4Sa yabaki tolusagavulu ko Tevita ni sa buli me tui; ka sa tui tiko ko koya ka yabaki vasagavulu. 5Sa nodra tui na Juta mai Epironi ka yabaki vitu ka vula ono; a sa nodra tui na Isireli kecega kei na Juta mai Jerusalemi ka yabaki tolusagavulu ka tolu.
6A ra sa lako ko koya na tui kei ira na nona tamata ki Jerusalemi kivei ira na Jepusaiti, nai taukei ni vanua: a ra sa vosa vei Tevita, ka kaya, O na sega ni curu mai ki ke, kevaka ko sa sega ni kauti ira tani na mataboko kei ira na lokiloki: ni ra sa nanuma, Sa sega ni lako rawa mai ki ke ko Tevita. 7A sa kaba na koro ni valu mai Saioni ko Tevita ka rawa; ko ya na koro i Tevita. 8A sa kaya ko Tevita e na siga ko ya, O koya sa yaco ki nai kelikeli, ka yaviti ira na Jepusaiti, kei ira na mataboko kei ira na lokiloki ko ira ka'u sa cata sara e na yaloqu, ena turaga ni valu ko koya. O koya era sa kaya kina, Ena sega ni lako mai ki na vale ko ira na mataboko kei na lokiloki.
9A sa tiko ko Tevita e na koro ni valu ko ya, ka vakatoka, Na koro i Tevita. A sa tara voli na koro ko Tevita mai Milo ka kauta ki loma. 10A sa tubu tiko ko Tevita, ka yaco sara, a sa totaki koya ko Jiova na Kalou ni lewe vuqa.
11Ia ko Airami na tui Taia, sa tala vei Tevita eso na tamata, ka vakauta eso na kau sitari; ka tala eso na matai ni kau, ka so na matai ni vatu; a ra sa tara e dua na vale nei Tevita. 12A sa kila ko Tevita ni sa vakataudeitaki koya ko Jiova me nodra tui na Isireli, ka vueta cake na nona matanitu e na vukudra na nona tamata na Isireli.
13A sa kauta vua ko Tevita eso tale me watina lalai, ka so me watina dina, mai Jerusalemi, ni sa biuti Epironi: a sa sucu tale eso na luvena tagane kei na luvena yalewa. 14Ia oqo na yacadratou na luvena eratou sa sucu mai Jerusalemi; ko Samua, kei Sopapi, kei Necani, kei Solomoni, 15kei Ipiari, kei Ilisua, kei Nefeki, kei Jafia, 16kei Ilisama, kei Elaiata, kei Ilifeleti.
17Ni ra sa rogoca ko ira na kai Filisitia sa lumuti ko Tevita me nodra tui na Isireli, era sa lako cake ko ira kecega na kai Filisitia me ra qarai Tevita; a sa rogoca ko Tevita, ka sa lako sobu ki na koro ni valu. 18A ra sa lako vakaivalu mai ko ira na kai Filisitia, ka ra yatuni ira e na buca ko Refeimi. 19A sa tarogi Jiova ko Tevita, ka kaya, Me'u lako cake vei ira na kai Filisitia, se me'u kakua? ko ni na soli ira ki na ligaqu, se segai? A sa kaya vei Tevita ko Jiova, Mo lako cake ga; ni'u na soli ira vakaidina na kai Filisitia ki na ligamu. 20A sa lako ko Tevita ki Peali-pirasimi, ka sa mokuti ira maikea ko Tevita, ka sa kaya, Sa gumatua vei ira na noqu meca e mataqu ko Jiova, me vaka na kaukauwa ni veiwai. O koya oqo sa vakayacana kina na tikina ko ya, ko Peali-pirasimi. 21A ra sa biuta maikea na nodra matakau, ia sa kauta tani ko Tevita kei ira na nona tamata.
22A ra sa lako cake tale ko ira na kai Filisitia, ka ra sa yatuni ira e na buca ko Refeimi. 23A sa tarogi Jiova ko Tevita, a sa kaya ko koya, Mo kakua ni lako cake; mo vakasaraviravi ira ki dakudra ka sikiti ira ni ko sa donuya na veikau oqori: 24Ia ni ko sa rogoca na kena rorogo ni tuvuka ni veikau oqori, mo qai yavala; ni na liutaki iko yani ko Jiova, me mokuta na nodra i valu na kai Filisitia. 25A sa kitaka vakakina ko Tevita, me vaka sa vakarota vua ko Jiova; a sa mokuti ira na kai Filisitia mai Kipa ka yaco sara ki Keseri.
Currently Selected:
2 SAMUELA 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
