2 SAMUELA 6
6
Sa kauta mai na kato ni Kalou ko Tevita, 1-5. Sa mate ko Usa, a sa kau kina na kato ki na vale i Opeti-itomi, a sa kalougata kina ko Opeti-itomi, 6-11. Sa qai la'ki kauta mai na kato ki Saioni ko Tevita, a sa meke lako ni sa liutaka, a sa beci koya ko Maikali, 12-23.
1A sa vakasoqoni ira vata tale ko Tevita na tamata digitaki kecega, e le tolu na oba, maivei ira na Isireli. 2A sa ia ko Tevita, kei ira kecega na tamata era sa tiko vata kaya, ka lako yani mai Peali e Juta, ka me kauta cake maikea na kato ni Kalou, sa vakayacani e na yaca i Jiova ni lewe vuqa, o koya sa tiko e na tadrua ni jerupi.
3A ra sa vakavodoka na kato ni Kalou ki na dua na qiqi-ni-yaya vou, a ra sa kauta mai na vale i Epinatapi mai Kipea: a sa tubera na qiqi-ni-yaya vou ko Usa kei Eiio, oi rau na luve i Epinatapi. 4A ra sa kauta mai na vale i Epinatapi mai Kipea, a ra sa lako vata kei na kato ni Kalou; a sa liutaka na kato ko Eiio. 5Ia era sa qiriqiri e na mata i Jiova ko Tevita, kei ira kecega na mataqali i Isireli, e na ka ni meke kecega sa caka e na kau damanu, io e na api, kei na soliteri, kei na tibereli, kei na sibali kei na kasitaneti.
6Ia ni ra sa yaco ki na rara ni samu sila nei Nakoni, sa dodoka na ligana ki na kato ni Kalou ko Usa ka taura; ni ra sa tarabe na pulumokau. 7A sa waqa na cudru i Jiova vei Usa; a sa yaviti koya maikea na Kalou e na vuku ni nona cala; a sa mate maikea ko koya voleka ki na kato ni Kalou. 8A sa rarawa ko Tevita, ni sa yaviti Usa ko Jiova: a sa vakayacana na tikina ko ya, ko Peresi-usa, ka yacova na siga oqo. 9A sa rere vei Jiova ko Tevita e na siga ko ya, ka kaya, Ena kau vakacava mai vei au na kato i Jiova? 10A sa sega ni via kauta vua ko Tevita na kato i Jiova ki na koro i Tevita: a sa kauta vakatikitiki ko Tevita ki na vale i Opeti-itomi na kai Kaca. 11A sa tiko na kato i Jiova e na vale i Opeti-itomi na kai Kaca ka vula tolu: a sa vakalougatataki Opeti-itomi ko Jiova, kei iratou kecega na nona lewe-ni-vale.
12A sa tukuni vei Tevita na tui, ka vaka, Sa vakalougatataka ko Jiova na vale i Opeti-itomi, kei na nona ka kecega, e na vuku ni kato ni Kalou. A sa lako ko Tevita, ka kauta cake e na marau na kato ni Kalou mai na vale i Opeti-itomi ki na koro i Tevita. 13Ia ni ra sa lako tu ka kalawa vakaono ko ira ka colata na kato i Jiova, sa cabora e dua na pulumokau ka dua na manumanu uro ko koya. 14A sa tabalaka na meke ko Tevita e na mata i Jiova; a sa vauca vua ko Tevita e dua na efoti lineni. 15A sa kauta cake na kato i Jiova ko Tevita, kei na mataqali kece i Isireli, e na kaila kei na uvu davui.
16Ia ni sa yaco ki na koro i Tevita na kato i Jiova, sa vakararai ko Maikali na luve i Saula mai na katuba, ka kunei Tevita na tui ni sa ladelade ka meke tiko e na mata i Jiova; a sa beci koya e lomana.
17A ra sa kauta na kato i Jiova, ka tauca e na kena tikina, e loma ni vale laca ka birika ko Tevita me tu kina: a sa vakacabora ko Tevita eso nai soro kama ka so nai soro ni veivinakati e na mata i Jiova. 18Ia ni sa vakacabora oti ko Tevita nai soro kama kei nai soro ni veivinakati, sa vosavakalougatataki ira na tamata ko koya, e na yaca i Jiova ni lewe vuqa. 19A sa vota vei ira kecega na tamata, io vei ira na lewe vuqa kecega na Isireli, na tagane kei na yalewa, ki na tamata yadua e dua nai buli madrai, kei na tiki ni lewe ni manumanu, ka dua na keki vua ni lolo. A ra sa lako yani na lewe vuqa, na tamata yadua ki na nona vale.
20A sa lesu ko Tevita me vosavakalougatataki ira na nona lewe-ni-vale. A sa curu yani ko Maikali na luve i Saula me tavaki Tevita, a sa kaya, Sa lagilagi na tui Isireli edaidai, ne! o koya ka luvata na nonai sulu e matadra na vada ni nona tamata, me vaka sa luvata votu na nonai sulu e dua vei ira na tamata lialia. 21A sa kaya vei Maikali ko Tevita, E na mata i Jiova ga, o koya ka digitaki au, ka biuti tamamu, kei na nona lewe-ni-vale kecega, ka lesi au me'u turaga vei ira na nona tamata ko Jiova, io vei ira na Isireli: o koya oqo ka'u na reki kina e na mata i Jiova: 22ia ka'u na beci au vakalevu cake, ka'u na vakamalumalumutaki au sara: ia ko ira na vada ko sa vosa kina, era na vakarokorokotaki au tiko. 23A sa sega kina ni vakaluveni ko Maikali na luve i Saula, ka yacova na siga sa mate kina.
Currently Selected:
2 SAMUELA 6: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
