2 SAMUELA 4
4
E le rua na tamata sa mokuti Isi-poseci, ka kauta na uluna vei Tevita, 1-8. Sa vakamatei rau ko Tevita me kenai sau, 9-12.
1Ia ni sa rogoca na luve i Saula ni sa mate ko Apineri mai Epironi, sa malumalumu na ligana, a ra sa kidroa ko ira kecega na Isireli. 2A sa le rua na nona tamata na luve i Saula erau turaga ni mataivalu: na yacana e dua ko Peana, ia na yaca ni kenai karua ko Rekapi, erau luve i Rimoni na kai Pieroci, o koya sa dua vei ira na kawa i Penijamini: (ni sa wili vata kei Penijamini ko Pieroci: 3a ra sa dro ki Kiteimi na kai Pieroci: a ra sa tiko vulagi kina ka yacova na gauna oqo).
4Ia sa dua na luve i Jonacani na luve i Saula, ka sa lokiloki na yavana ruarua. Sa yabaki lima ko koya ni sa kau mai Jesirieli nai rogorogo kei Saula kei Jonacani, a sa keveti koya cake na yalewa sa nonai mei, a sa dro: ia ni sa kusarawa ni dro ko koya, sa lutu na gone, a sa lokiloki kina. Ia na yacana ko Mefiposece.
5A rau sa lako ko Rekapi kei Peana, na luve i Rimoni na kai Pieroci, ka rau sa tadu mai ni sa katakata na siga, ki na vale i Isi-poseci, a sa davo koto ko koya me vakacegu ni sa siga levu. 6A rau sa curu ki loma ni vale, me vaka era via kauta na witi; a rau sa cokai koya e na ketena: ka rau sa dro bula ko Rekapi kei Peana na tuakana. 7Ia ni rau sa lako mai ki vale, sa davo ko koya e nonai mocemoce e nona vale ni moce, a rau sa mokuti koya, ka vakamatei koya, ka tamusuka na uluna, ka kauta na uluna, ka lako yani e na sala mai na buca e na bogi ko ya ka siga. 8A rau sa kauta na ulu i Isi-poseci kivei Tevita ki Epironi, a rau sa kaya vua na tui, Ni raica, na ulu i Isi-poseci na luve i Saula na nomuni meca, o koya ka qarai kemuni mo ni mate; sa cudruvaka ko Jiova na noqu turaga na tui vei Saula kei na nona kawa e na siga edaidai.
9A sa vosa ko Tevita vei Rekapi kei Peana na tuakana, erau luve i Rimoni na kai Pieroci, ka kaya vei rau, Me vaka sa bula ko Jiova, o koya sa vakabula na yaloqu mai na ka rarawa kecega, 10ni sa tukuna vei au e dua, ka vaka, Raica, sa mate tu ko Saula, ka sa nanuma ko koya ni sa kauta mai nai rogorogo vinaka, ka'u a qai taura ka vakamatea mai Sikilaki: ia sa ka oqo ka'u a cakava vua mei covi ni gusuna: 11ia ka na vakaevei ni ra sa vakamatea e dua na tamata yalododonu e na nona vale, e na nonai kotokoto, ko ira na tamata ca? me'u kakua beka ni taroga na kena dra mai na ligamudrau, ka muduki kemudrau tani mai vuravura? 12A sa vakarota vei ira na cauravou ko Tevita, a ra sa vakamatei rau, ka muduka tani na ligadrau kei na yavadrau, ka vakarubeca ki cake mai na mata-ni-wai mai Epironi. A ra sa kauta na ulu i Isi-poseci, ka buluta e nai bulubulu i Apineri mai Epironi.
Currently Selected:
2 SAMUELA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
