2 SAMUELA 11
11
Sa la'ki vala ki Rapa ko Joapi, 1. Ai valavala ca levu i Tevita, 2-27.
1Ia ni sa oti na yabaki, ka sa yaco na gauna era sa daulako yani kina ki nai valu ko ira na tui, sa talai Joapi ko Tevita, kei ira vata kaya na nona tamata, kei ira kecega na Isireli; a ra sa vakacacani ira na luve i Amoni, ka buku na druadrua mai Rapa; a sa tiko ga mai Jerusalemi ko Tevita.
2Ia e na yakavi sa tu cake ko Tevita mai na nonai mocemoce, ka la'ki gade e dela ni vale ni tui: a sa raica ko koya mai na dela ni vale e dua na yalewa sa sisili tiko; a sa matavinaka sara na yalewa. 3A sa talaki ko Tevita me taroga na yalewa. A sa kaya e dua, Sa sega li ni luve i Iliami, ko Paci-sepa, na wati i Uraia na Itaiti? 4A sa tala eso na tamata ko Tevita, ka kauti koya mai; a sa lako mai vua ko koya na yalewa, a sa moce vata kaya ko koya; (ni sa vakasavasavataki ko koya mai na nona qeleqelewa:) a sa lesu tale ki na nona vale. 5A sa bukete mai na yalewa, ka sa talaki ka tukuna vei Tevita, ka vaka, Au sa bukete. 6A sa talaki vei Joapi ko Tevita, ka vaka, Mo talai Uraia mai vei au, o koya na Itaiti. A sa talai Uraia vei Tevita ko Joapi.
7Ia ni sa lako mai vei koya ko Uraia, sa tarogi koya ko Tevita, se sa vakaevei ko Joapi, ka vakaevei ko ira na tamata, ka vakaevei nai valu. 8A sa kaya vei Uraia ko Tevita, Mo lako sobu ki na nomu vale, ka vuya na yavamu. A sa lako tani mai na vale ni tui ko Uraia, a sa kau yani vua e dua nai votavota kakana mai vua na tui. 9A sa moce vata kei ira kecega na tamata ni nona turaga ko Uraia mai na katuba ni vale ni tui, ka sega ni lako sobu ki nona vale. 10A ra sa tukuna vei Tevita, ka vaka, Sa sega ni lako sobu ko Uraia ki na nona vale: sa qai kaya vei Uraia ko Tevita, O a sega li ni lako vakayawa mai? a cava ko a sega ni lako sobu kina ki na nomu vale? 11A sa kaya vei Tevita ko Uraia, Sa tiko na kato, kei ira na Isireli, kei ira na Juta, e na vale vakacevaceva; kei na noqu turaga ko Joapi, kei ira na nona tamata na noqu turaga, era sa tiko wale e na qele; me'u qai lako beka koi au ki na noqu vale, ka kana ka gunu, ka moce kaya na watiqu? me vaka ko ni sa bula koi kemuni, a sa bula na yalomuni, au na sega ni kitaka na ka oqo. 12A sa kaya vei Uraia ko Tevita, Mo tiko tale mada oqo edaidai, ia e na mataka au na talai iko yani. A sa tiko ga mai Jerusalemi ko Uraia e na siga ko ya, kei na mataka. 13A sa kacivi koya ko Tevita, a sa kana ka gunu ko koya e matana; a sa vakamatenitaki koya ko koya: ia e na yakavi sa curu yani me la'ki koto e nonai mocemoce kei ira na tamata ni nona turaga, ka sega ni lako sobu ki nona vale.
14Ia e na mataka, sa vola ko Tevita e dua nai vola vei Joapi, a sa solia vei Uraia me kauta vua. 15A sa vola vakaoqo e nai vola, Dou lesi Uraia me la'ki donuya na tikina ki liu sa katakata kina nai valu, ia dou qai suka tani vua, me moku mate ko koya.
16Ia ni sa kaba tiko na koro ko Joapi, sa lesi Uraia ki na tikina sa kila era sa tiko kina na tamata qaqa. 17A ra sa curu mai na lewe ni koro, ka veivala kei Joapi; a sa bale eso vei ira na tamata i Tevita; ka mate talega ko Uraia na Itaiti.
18A sa talaki ko Joapi ka tukuna vei Tevita nai tukutuku kecega ni valu; 19a sa vakaroti koya sa tala ko koya, ka kaya, Ni ko sa tukuna vakaoti vua na tui nai tukutuku ni valu, 20kevaka sa tubu na cudru ni tui, a sa kaya vei iko ko koya, A cava dou a toro voleka kina ki na koro mo dou veivala? dou a sega beka ni kila era na vanavana mai na dela ni bai? 21o cei beka ka vakamatei Apimeleki na luve i Jirupeseci? sa sega beka ni dua na yalewa ka biuta sobu na tiki ni vatu ni varo sila, mai na dela ni bai, ka sa lutuki koya a sa mate kina mai Tipesi? a cava dou a toro voleka kina ki na bai? mo qai kaya, Sa mate talega na nomuni tamata ko Uraia na Itaiti.
22A sa lako yani ko koya ka talai, ka lako mai ka tukuna vei Tevita na ka kecega sa talai koya kina ko Joapi. 23A sa kaya vei Tevita ko koya ka talai, Era sa gumatua mada vei keimami ko ira na tamata, ka curu mai vei keimami ki na veiwere, ia keimami a qai cici muri ira ka yaco ki nai sogo ni matamata-ni-koro: 24a ra sa vanai keimami na nomuni tamata ko ira na dauvanavana mai na dela ni bai; a sa mate eso vei ira na nomuni tamata na tui, sa mate talega na nomuni tamata ko Uraia na Itaiti. 25A sa kaya ko Tevita vei koya sa talai, Mo vosa vakaoqo vei Joapi, Me kakua ni ca vei iko na ka oqo, ni sa kana loa nai seleiwau: mo vakaukauwataka na nomu i valu ki na koro, ka vukica: ia mo vaqaqataki koya.
26A sa rogoca na wati i Uraia ni sa mate ko Uraia na watina, a sa tagicaka kina na watina. 27Ia ni sa oti na gauna e yasovaka kina na watina sa talaki ko Tevita ka kauti koya ki na nona vale, a sa qai watina ko koya, ka vakasucuma vua e dua na luvena tagane. A sa ca e na mata i Jiova na ka sa cakava ko Tevita.
Currently Selected:
2 SAMUELA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
