2 SAMUELA 10
10
Sa vakacacani na tamata i Tevita, o ira sa tala ko koya vei Anuni, 1-5. Sa ra vala kei Tevita ko ira na luve i Amoni, kei ira na kai Siria, a sa gumatua vei ira ko Tevita, 6-19.
1Sa oti na ka oqo, sa qai mate na nodra tui na luve i Amoni, a sa tui ko Anuni na luvena me kenai sosomi. 2A sa kaya ko Tevita, Au na caka vinaka vei Anuni na luve i Neasi, me vaka ka caka vinaka vei au ko tamana. A sa talai ira kina na nona tamata ko Tevita me vakacegui koya e na vuku i tamana. A ra sa lako nai talaki i Tevita ki na nodra vanua na luve i Amoni. 3A ra sa kaya ko ira na nodra turaga na luve i Amoni vei Anuni na nodra turaga, O sa nanuma beka ni sa dokai tamamu ko Tevita, sa tala kina eso me ra mai vakacegui iko? sa sega beka ni talai ira na nona tamata vei iko ko Tevita me yamata na koro, ka raica vakavinaka, ka me vukica? 4A sa tauri ira na tamata i Tevita ko Anuni, ka tasia tabakidua na kumidra, ka kotiva vakalekaleka na nodra i sulu, io ki rubudra, ka talai ira yani. 5A sa tukuni vei Tevita, a sa talaki ko koya me tavaki ira, ni ra sa madua vakalevu ko ira na tamata: a sa kaya na tui, Dou tiko mai Jeriko, me tubu mada na kumimudou, dou qai lako tale mai.
6A ra sa raica na luve i Amoni ni ra sa velavela vei Tevita, a ra sa talaki na luve i Amoni ka voli ira na kai Siria mai Peci-riopi, kei na kai Siria mai Sopa, e le rua na oba na tamata sa taubale, kei na dua na udolu na tamata mai vua na tui Meeka, ka le tinikarua na udolu na tamata mai Isi-topi.
7A sa rogoca ko Tevita, a sa talai Joapi, kei ira na mataivalu qaqa kecega. 8A ra sa curu yani ko ira na luve i Amoni, ka tuvai ira na mataivalu mai nai curucuru ni matamata-ni-koro: ia era sa tiko vakataki ira e na were ko ira na kai Siria mai Sopa, kei Riopi, kei Isi-topi, kei Meeka. 9Ia ni sa raica ko Joapi ni ra sa donui koya e dua na mataivalu, ka tiko ki dakuna e dua tale, sa digitaka ko koya maivei ira na tamata digitaki kecega ni Isireli, ka tuvai ira me ra donui ira na kai Siria: 10ka soli ira na tamata sa vo vei Apisai na tacina, me tuvai ira me ra donui ira na luve i Amoni. 11A sa kaya ko koya, Kevaka sa gumatua vei au ko ira na kai Siria, mo qai mai vukei au; ia kevaka sa gumatua vei iko ko ira na luve i Amoni, ka'u na la'ki vukei iko. 12Mo kaukauwa ga, ia me daru gumatua e na vukudra na noda tamata, kei na veikoro ni noda Kalou; ia me cakava ko Jiova na ka e vinaka vua. 13Ia sa toro yani ko Joapi, kei ira na tamata era sa tiko vata kaya, me ra vala kei ira na kai Siria: a ra sa dro tani mai vua. 14Ia ni ra sa raica ko ira na luve i Amoni era sa dro na kai Siria, era sa qai dro tani talega maivei Apisai, a ra sa la'ki curu ki na koro. A sa lesu mai ko Joapi maivei ira na luve i Amoni, ka lako ki Jerusalemi.
15Ia ni ra sa raica na kai Siria ni ra sa moku e matadra na Isireli, era sa soqoni vata. 16A sa talaki ko Etareseri, ka kauti ira mai na kai Siria era tiko mai tai kadua ni Uciwai; a ra sa lako mai ki Elami; a sa liutaki ira ko Sopaki na kapiteni ni valu i Etareseri. 17A sa tukuni vei Tevita, a sa vakasoqoni ira vata na Isireli kecega ko koya, ka lako yani ki tai kadua ni Joritani, ka yaco ki Elami. A ra sa tuva nai valu vei Tevita ko ira na kai Siria, a ra sa veivala kaya. 18A ra sa dro tani ko ira na kai Siria mai vei ira na Isireli; a sa vakamatea ko Tevita e le vitu na drau na lewe ni nodra qiqi-ni-valu na kai Siria, kei na tamata sa vodo ose e le vasagavulu na udolu, a sa mokuti Sopaki na kapiteni ni nodra i valu, a sa mate maikea ko koya. 19Ia ni ra sa raica ko ira na tui kecega era qaravi Etareseri ni ra sa moku e matadra na Isireli, era sa veisorosorovi kei ira na Isireli, ka qaravi ira. A ra sa rere na kai Siria ni vukei ira tale na luve i Amoni.
Currently Selected:
2 SAMUELA 10: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
