2 SAMUELA 12
12
Sa vunauci Tevita ko Necani na parofita, a sa veivutuni kina ko Tevita, 1-14; a sa mate na luve i Paci-sepa, 15-23. Sa sucu ko Solomoni, 24,25. Sa kabai ko Rapa, a sa vakararawataki ira vakalevu nai taukei ko Tevita, 26-31.
1A sa talai Necani vei Tevita ko Jiova. A sa lako vua ko koya, ka kaya vua, Sa tiko e na dua na koro e lewe rua na tamata, e dua sa vutuniyau, ka dua sa dravudravua. 2Na tamata vutuniyau sa levu sara na nona qele ni sipi, kei na nona qele ni pulumokau; 3ia sa sega vua na tamata dravudravua e dua na ka, e dua walega na lami yalewa lailai, ka volia ko koya, ka dauvakania: a sa tubu cake kaya kei iratou talega na luvena; sa kania eso na tiki ni kena, a sa gunu mai na mena bilo, a sa koto e lomaserena, a sa tautauvata vua kei na dua na luvena yalewa. 4A sa lako vua na tamata vutuniyau e dua na tamata sa lako tu, ia sa sega ni taura ko koya e dua na nona sipi se na nona pulumokau, me vakarau vua sa taubale voli ka sa lako mai vua; ia sa taura na nona lami na tamata dravudravua, ka vakarautaka me kena na tamata sa lako mai vua.
5A sa waqa vakalevu mai na cudru i Tevita vua na tamata; a sa kaya vei Necani, Me vaka sa bula ko Jiova, sa dodonu me mate na tamata sa cakava na ka oqo: 6ia ena sauma vakava na lami, ni sa cakava na ka oqo, ka ni sa sega vua na loloma.
7A sa kaya vei Tevita ko Necani, Sai kemuni ga na tamata ko ya. Sa vosa vakaoqo ko Jiova na nodra Kalou na Isireli, Ka'u a lumuti iko mo nodra tui na Isireli, ia ka'u a vakabulai iko mai na liga i Saula; 8au a solia talega vei iko na nona vale na nomu turaga, kei iratou na wati ni nomu turaga ki na lomaseremu, au a solia talega vei iko na nodra mataqali na Isireli kei ira na Juta; ia kevaka sa lailai ko ya, ka'u na vakaikuritaka vei iko na ka vaka kei na ka vaka. 9A cava ko sa beca kina na vosa i Jiova, mo cakava na ka ca e matana? ko a vakamatei Uraia na Itaiti e nai seleiwau, ka kauta na watina me watimu, ka vakamatei koya e na nodra i seleiwau na luve i Amoni. 10Ia oqo, ena sega kina ni yali mai na nomu vale nai seleiwau, ka sega ni mudu; ni ko sa beci au, ka kauta na wati i Uraia na Itaiti me watimu: 11sa vosa vakaoqo ko Jiova, Raica, ka'u na vakatubura vei iko na ca mai na nomu vale, ia ka'u na kauti iratou na watimu e matamu, ka solia vua na wekamu, ia ena moce vata kei iratou na watimu ko koya e na mata ni siga oqo. 12Ko a cakava vakavuni ko iko ia ka'u na cakava na ka oqo e matadra kecega na Isireli, kei na mata ni siga.
13A sa kaya vei Necani ko Tevita, Au sa cala vei Jiova. A sa kaya vei Tevita ko Necani, Sa kauta tani na nomuni valavala ca ko Jiova; ko ni na sega ni mate: 14Ia ni kemuni sa vakavuna me ra vosavakacaca ko ira na meca i Jiova e na vuku ni ka oqo, sa na mate vakaidina talega na luvemuni sa sucu. 15A sa lako yani ko Necani ki na nona vale. A sa vakayaco mate ko Jiova vua na luve i Tevita ka vakasucuma na wati i Uraia, a sa malumalumu sara. 16A sa vakamasuta na Kalou ko Tevita e na vuku ni gone; a sa lolo ko Tevita, ka curu, ka koto e na qele ka siga mai. 17A sa ia ko iratou na qase ni nona vale ka la'ki tu vua me ra vakaduria cake mai na qele; a sa bese ko koya, ka sega ni kana vata kei ira. 18Ia e na kenai kavitu ni siga sa ciba na gone. A ratou sa rere ni tukuna vei Tevita ko ira na nona tamata ni sa mate na gone; ni ratou sa kaya, Raica, ni sa bula tiko na gone, edatou a vosa vua, ka sega ni vakarogoca na nodatou vosa ko koya: ena vakaevei na nona rarawa, ni datou sa tukuna vua ni sa mate na gone? 19Ia ni sa raica ko Tevita eratou sa vakasolokakana ko iratou na nona tamata, sa qai kila ko Tevita sa mate na gone: a sa taroga vei iratou na nona tamata ko Tevita, Sa mate na gone, ne? A ratou sa kaya, Sa mate. 20Sa qai tu cake mai na qele ko Tevita, ka sili, ka lumu, ka vakaisulutaki koya e nai sulu tani; ka la'ki curu ki na vale i Jiova, ka lotu: sa qai lako ki na nona vale; ia ni sa vaka me kana, sa kau vua na kakana, a sa kana ko koya. 21Eratou sa qai taroga vua ko iratou na nona tamata, A cava na ka oqo ko ni sa cakava? ni sa bula tiko na gone, ko ni a lolo ka tagi e na vukuna; ia ni sa qai mate na gone, ko ni a tu cake ka kana. 22A sa kaya ko koya, Ni sa bula tiko na gone, ka'u a lolo ka tagi; ni'u a kaya, O cei e kila se na lomani au ko Jiova, se segai, me bula na gone? 23ia ni sa qai mate ko koya, me'u qai lolo e na vuku ni cava? au sa rawata li me'u kauti koya tale mai? Au na lako ga vua, ia ko koya ena sega ni lesu mai vei au.
24A sa vakacegui Paci-sepa na watina ko Tevita, ka curu vua ka moce kaya; a sa vakasucuma ko koya e dua na gonetagane, a sa vakayacani koya, ko Solomoni: a sa lomani koya ko Jiova: 25a sa talai Necani na parofita ko koya, ka vakatoka na yacana ko Jititia [Ko sa lomani vei Jiova], e na vuku i Jiova.
26Ia sa vala tiko ko Joapi kei Rapa, ka nodra na luve i Amoni, a sa rawa na koro turaga ko ya. 27A sa tala eso na tamata vei Tevita ko Joapi, ka kaya, Au sa kabai Rapa, ka rawa na koro ni veiwai: 28ia mo ni vakasoqoni ira vata na tamata sa vo, ka me buku na druadrua ni koro, ka rawa; de'u sa rawa na koro koi au, a sa vakatokai e na yacaqu. 29A sa vakasoqoni ira vata na tamata kecega ko Tevita, ka lako ki Rapa, ka ia kina nai valu, ka rawa. 30Sa luvata na nonai sala vakaturaga mai vua na nodra tui, a kena bibi e dua na taledi koula, ka tu kina na veivatu talei eso; a sa vakaisalataki kina ko Tevita. A sa kauta yani nai toki ni valu mai na koro, e dua na ka levu sara. 31A sa kauti ira yani na tamata sa tiko kina, ka cudruvi ira e nai varo, kei nai kadrukadru aironi ni were, kei na matau aironi, ka lesi ira ki na cakacaka ni vatu-buli: a sa cakava vakakina ki na nodra koro kecega na luve i Amoni. A sa lesu tale ki Jerusalemi ko Tevita kei ira kecega na tamata.
Currently Selected:
2 SAMUELA 12: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
