2 KORINICA 8
8
Sa vakarota vei ira me ra gumatua ni kumuna vata nai yau me ra solia vei ira na dravudravua mai Jerusalemi, 115. Sa qai tukuni Taito kei rau ka lako vata kaya, 1624.
1Ia keitou sa vakatakila vei kemudou, na veiwekani, na loloma ni Kalou sa soli vei ira na veisoqosoqo lewe ni lotu mai Masitonia, 2ni ra sa vakatovolei tiko e na ka rarawa sara sa levu sara na nodra reki, ka sa ka tani na nodra dravudravua, ia sa uasivi cake vakalevu kina na nodra lomasoli. 3Niu sa vakadinadina ni ra solia, me vaka na ka era rawata, io sa uasivi cake e na ka era rawata, ka ni sa yalodra kina; 4a ra sa vakamamasu ka cikevi keitou vakalevu me keitou kauta na ka-ni-loloma, ka veitokani kei ira e na cakacaka loloma vei ira era sa lotu. 5Ka sa sega ni vaka na neitou vakasama, ia era sa soli ira mada vua na Turaga, vei keitou talega me vaka na loma ni Kalou; 6ia keitou sa masuti Taito kina, me vaka sa vakatekivuna ko koya, me tinia vaka talega kina vei kemudou na cakacaka loloma talega oqo.
7Ia me vaka sa levu sara vei kemudou na ka kecega, na vakabauta, kei na vosa, kei na vuku, kei na gugumatua kecega, kei na nomudou loloma vei keitou, me levu sara vei kemudou na cakacaka loloma talega oqo. 8Au sa sega ni cavuta nai vakaro, au vosa ga e na vukudra eso era sa gumatua cake, meu vakatovolea talega na kena dina ni nomudou loloma. 9Ni dou sa kila na loloma ni noda Turaga ko Jisu Karisito, ni sa vutuniyau ko koya, ia sa yaco me dravudravua e na vukumudou, mo dou vutuniyau mai e na vuku ni nona dravudravua. 10Ia kau sa vakatavuvuli ga e na ka oqo: ni sa kilikili kei kemudou na ka oqo, dou a vakatekivuna eliu, ia dou a sega ni cakava walega, dou a gumatua cake talega kina ka sa oti yani e dua na yabaki. 11Ia oqo, mo dou qai vakayacora sara; me vaka dou a gumatua e na via cakava, me qai tini vakakina me vaka na ka sa rawa. 12Kevaka sa tu na via cakava, ena vinakati me vaka na ka sa tu vua e dua, ka sega ni vaka na ka sa sega ni tu vua. 13E segai me ra vakacegui ko ira na tamata tani, ka vakabibitaki koi kemudou: 14me vakatautauvata ga, me rauta na nodra dravudravua na nomudou i yau levu e na gauna oqo, me na rauta na nomudou dravudravua talega na nodra i yau levu: me rawa kina na vakatautauvatataki: 15me vaka na ka sa volai, O koya sa kumuna vakalevu sa sega na ka e vo vua; kei koya sa kumuna vakalailai sa sega na ka e yali vua.
16Ia me ia na vakavinavinaka vua na Kalou, o koya sa vakatubura e na loma i Taito na daunanumi kemudou vakaoqo. 17E dina ga sa vakabauta na neitou vakamamasu; ia ni sa gumatua sara vakai koya ga, sa lako kina vei kemudou. 18Ia keitou sa tala vata kaya na wekada, ko koya sa rogo vinaka vei ira kecega na veisoqosoqo lewe ni lotu e na vuku ni tukutuku-vinaka; 19ia ka sa sega ni koya walega oqo, sa digitaki koya talega ko ira na veisoqosoqo lewe ni lotu me lako vata kei keitou ni keitou sa ia na cakacaka loloma oqo, me vakarokorokotaki kina na Turaga, ka me rairai kina na noda gumatua talega: 20ia keitou sa via tarova oqo, me kakua e dua me beitaki keitou e na vuku ni yau levu oqo keitou sa oga kina: 21ni keitou sa nanuma na ka e dodonu, e segai walega e na mata ni Turaga, e na matadra talega na tamata. 22Keitou sa tala na wekada talega kei rau, o koya keitou sa kunea wasoma ni sa gumatua e na ka e vuqa, ia ka sa qai gumatua vakalevu cake, ni sa vakadinati kemudou vakalevu. 23Ke tarogi ko Taito, sa noqu i tokani ko koya, a sa vukei au e na cakacaka e na vukumudou: koi rau talega na wekada, erau sai talatala ni veisoqosoqo lewe ni lotu, oi rau sa vakarokorokotaki kina na Karisito. 24O koya oqo mo dou qai vakatakila vei iratou, e na matadra talega na veisoqosoqo lewe ni lotu, nai vakadinadina ni nomudou loloma, kei na neitou vakacaucautaki kemudou.
Currently Selected:
2 KORINICA 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
