2 KORINICA 7
7
Sa vakarota vei ira me ra lomani koya, a sa reki sara, ni ra sa qai veivutuni e na ka sa vola vei ira eliu, e na vuku talega ni ra a lomani Taito ni sa lako vei ira, 216.
1O koya oqo kemudou sa daulomani, ni sa qai tu vei keda na vosa ni yalayala oqo, me da vakasavasavataki keda mai na dukadukali kecega ni yago kei na yalo, me da ia sara na ka savasava e na rere vua na Kalou.
2MO dou dolava na yalomudou vei keitou; keitou sa sega ni vakacala e dua, keitou sa sega ni vakacacana e dua keitou sa sega ni kovea na nonai yau e dua. 3Sa sega ni vosa ni veibeitaki na noqu vosa oqo: niu sa kaya oti eliu, dou sa tiko e na yalo i keitou me da bula vata ka mate vata. 4Sa levu na noqu doudou niu sa vosa vei kemudou, au sa rekitaki kemudou vakalevu; au sa sinai sara e na vakacegu, au sa marau vakalevu sara e na neitou rarawa kecega.
5Ia ni keitou sa yaco ki Masitonia, sa sega ni cegu na yago i keitou, ia keitou sa vakararawataki ga e na ka kecega; esau sa ia na veivala, eloma sa tiko na rere. 6Ia na Kalou, o koya sa vakacegui ira era sa vakabalei sobu, sa vakacegui keitou ni sa lako mai ko Taito; 7a sa sega walega e na nona lako mai, e na veivakacegui talega sa vakacegui kina ko koya e na vukumudou, ni sa tukuna vei keitou na nomudou gagadre, na nomudou tagi, na nomudou loloma katakata vei au; kau sa reki vakalevu cake kina. 8E dina ga kau a vakararawataki kemudou e nai vola, ia kau sa sega ni veivutuni kina, ia kau a veivutuni ga eliu; niu sa qai kunea sa vakararawataki kemudou nai vola ko ya, ia ka sa dede vakalailai ga. 9Au sa qai reki, ka sega ga ni dou a vakararawataki, ni dou sa rarawa ga ki na veivutuni: ni dou sa vakararawataki me vaka na loma ni Kalou, me kakua ni yali vei kemudou e dua na ka e na vuku i keitou. 10Ia na rarawa sa vaka na loma ni Kalou sa vakayacora na veivutuni ki na bula o koya sa sega ni veivutunitaki tale: ia na rarawa vakavuravura sa vakayacora na mate. 11Ia ka raica, na ka ga oqo, io, na nomudou vakararawataki vaka na loma ni Kalou, ni sa vakatubura vei kemudou na gugumatua! io, na vakasavasavataki kemudou, io, na cudrucudru, io, ka rere, io, na gagadre vakalevu, io, na lomakatakata, io, na via sauma na ca! E na ka kecega dou sa vakadinadinataka ni dou sa sega ni cala e na ka ko ya. 12O koya oqo, niu sa volavola vei kemudou, au sa sega ni volavola e na vukuna sa cakava na ka ca ko ya, se na vukuna walega sa vakacacani, me vakaraitaki ga vei kemudou na neitou daunanumi kemudou e na mata ni Kalou.
13O koya oqo keitou sa vakacegui kina; ia e na neitou veivakacegui talega keitou sa reki vakalevu cake e na vuku ni reki i Taito, ni sa vakacegui na yalona e na vukumudou kecega. 14Ia kevaka kau a vakacaucautaki kemudou vua e na ka eso, au sa qai sega ni madua kina; ia me vaka sa dina na ka kecega keitou a tukuna vei kemudou, sa kune vaka talega kina me dina na neitou veivakacaucautaki e na mata i Taito. 15Ia sa ka levu sara na nona loloma vei kemudou, ni sa nanuma ko koya na nomudou talairawarawa kecega, ni dou sa vakacegui koya e na rere kei na sautaninini.
16Au sa reki niu sa qai vakararavi vei kemudou e na ka kecega.
Currently Selected:
2 KORINICA 7: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
