2 KORINICA 12
12
Sa qai tukuna vei ira ni sa rawarawa vua me vakalevulevui koya e na vuku ni ka levu sa vakatakila oti vei koya na Kalou; ia ka sa via vakalevulevui koya e na vuku ga ni nona malumalumu, 113. Sa qai kaya ni na lako yani vei ira, ka lewai ira, 1421.
1E dina ga meu vakalevulevui au ia sa sega beka ni yaga: ia kau na cavuta na veiraivotu kei na veivakarairai ni Turaga.
2Au sa kila e dua na tamata o koya sa tu vata kei Karisito, ni sa kau cake mada ko koya oqo ki nai katolu ni lomalagi, a sa qai oti na yabaki e tinikava, (se vakayago beka, se sega, au sa sega ni kila; sa sega beka ni vakayago, au sa sega ni kila; sa kila na Kalou;) 3io, au sa kila na tamata sa vakaoqo, (se vakayago ga, se sega ni vakayago, au sa sega ni kila; sa kila na Kalou;) 4ni sa kau cake ki Parataisi, a sa rogoca na vosa sa sega ni tukuni rawa, sa sega ni tara me tukuna na tamata.
5Au na vakalevulevui au e na vukuna sa vakaoqo; ia e na vukuqu ga, kau na sega ni vakalevulevui au; e na vuku ga ni noqu malumalumu. 6Ia kevaka kau sa vinakata meu dokai au, au na sega ni lialia kina; niu na kaya ga na ka e dina: ia kau sa kua so ga, de dua sa vakasami au niu sa uasivi cake e na ka sa raica vei au, se rogoca vei au.
7Ia deu vakalevulevui sara ni sa levu sara na veivakarairai, sa dua na voto ni kau sa vakalauti kina na lewequ, e dua nai talaki i Setani me vakararawataki au, deu vakalevulevui sara. 8E na vuku ni ka oqo, kau a masu vakatolu vua na Turaga, me kau tani vei au. 9A sa kaya vei au ko koya, Sa rauti iko na noqu loloma: ni sa vakalevui na noqu kaukauwa, ni sa malumalumu e dua. O koya oqo sa yaloqu sara kina meu rekitaka na noqu malumalumu, me tiko kina vei au na kaukauwa i Karisito. 10O koya oqo kau sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito: ia niu sa malumalumu, au sa qai kaukauwa.
11Au sa yaco meu lialia; oi kemudou ga sa vakavuna; ni ka dodonu mo dou vosavakavinakataki au; niu sa sega ni uasivi sobu vei ira nai apositolo era sa uasivi cake; ia sa dina ga niu sa ka wale. 12E dina sa vakayacori e na kemudou maliwa na veivakatakilakila ni apositolo e na dauvosota kecega, e na veika-mana, kei na veika e veivakurabuitaki, kei na cakacaka mana. 13A cava beka dou sa uasivi sobu kina vei ira na veisoqosoqo lewe ni lotu tani, e na vuku ga ni ka oqo, niu sa sega ni vakaogai kemudou? ia mo dou kakua ni cudruvi au e na vuku ni ka ca oqo.
14Raica, au sa vakarau meu lako vakatolu yani vei kemudou; ia kau na sega ni vakaogai kemudou: ni kau sa sega ni vakasaqara na nomudou ka, koi kemudou ga: ni sa sega ni kilikili kei ira na gone me ra binia nai yau me nodra na qase, ko ira ga na qase, me nodra na gone. 15Ia sa yaloqu sara meu soli au kei na ka sa tu vei au e na vuku ni yalomudou; io kevaka sa ka levu na noqu loloma vei kemudou kau na lomani kina vakalailai beka?
16Ia me vaka ga ko ya, au a sega ni beitaki kemudou: ia niu a yaloqaseqase, kau sa rawai kemudou e nai lawaki. 17Au sa vakaiyau maivei kemudou li vei ira kau a tala vei kemudou? 18Au a masuti Taito, ka tala vata kaya e dua vei ira na veiwekani. Sa vakaiyau maivei kemudou li ko Taito? keirau a sega li ni valavala e na yalovata? keirau a sega li ni muria e dua bauga nai vakarau?
19Dou sa vakasama tiko beka ni keitou sa vosavinakataki keitou vei kemudou? keitou sa vosa e na mata ni Kalou, ni keitou sa tu vata kei Karisito: ia na ka kecega, kemudou sa daulomani, mo dou vakatataki cake kina. 20Niu sa rere, deu lako yani ka sega ni kunei kemudou me vaka kau sa vinakata, ia kau na qai kune vei kemudou me vaka dou sa sega ni vinakata: de sa tiko na veileti, kei na vuvu, kei na cudrucudru, kei na veiba, kei na kakase, kei na vakasolo kakana, kei na viavialevu, kei na ue; 21de vakamalumalumutaki au e na matamudou na noqu Kalou, niu sa lako tale yani, ka deu tagicaki ira kina era lewe vuqa era sai valavala ca oti, ka sega ni veivutunitaka na dukadukali kei na dauyalewa, kei na daudara, era a kitaka.
Currently Selected:
2 KORINICA 12: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
