2 KORINICA 13
13
Sa qai kaya me laki cudruvi ira era sai valavala ca tiko; a sa vakarota me ra dikevi ira vakai ira, 110. Sa masulaki ira, ka qai tinia na nonai vola, 1114.
1Oqo nai katolu ni noqu lako yani vei kemudou. Ena vakadinadinataki na vosa kecega e na gusu ni vakadinadina e lewe rua, se lewe tolu. 2Au a vakasalataka eliu, kau sa qai vakasalataka, me vaka e nai karua ni noqu tiko vei kemudou; ia oqo, niu sa tiko tani, au tukuna vei ira sai valavala ca eliu, kei ira kecega na tani, kevaka kau na lako tale yani, kau na sega ni vosota: 3ni dou sa qara e dua nai vakadinadina ni sai Karisito kau sa vosa kina, o koya sa sega ni malumalumu vei kemudou, ia sa kaukauwa ga vei kemudou: 4ni sa vakoti ki na kauveilatai ko koya ni sa malumalumu, ia sa qai bula e na kaukauwa ni Kalou. Keitou talega, keitou sa malumalumu vata kaya, ia keitou na bula vata kaya e na kaukauwa ni Kalou vei kemudou. 5Dou dikevi kemudou, se dou tu e na vakabauta, se segai; vakatovolei kemudou. Dou sa sega beka ni kilai kemudou, ni sa tiko vei kemudou ko Jisu Karisito? de dou sa sega dina ni vakabau. 6Ia kau sa dinata ni dou na kila ni keitou sa sega ni tawa vakabau. 7Ia keitou sa masu vua na Kalou, mo dou kakua sara ni valavala ca; e segai me keitou rairai kina ni keitou sa vinakati kina, mo dou cakava ga na ka e dodonu, io, kevaka keitou sa sega ni vakabau. 8Ni keitou sa sega ni rawata e dua na ka me tarovi kina na dina, me totaka ga na dina. 9Ni keitou sa reki, ni keitou sa malumalumu tu, ka kaukauwa koi kemudou; ia na ka talega oqo keitou sa masulaka, mo dou vinaka sara. 10O koya oqo kau sa vola kina na veika oqo niu sa tiko tani, deu ia na lewa rarawa ni da sa tiko vata, me vaka na kaukauwa sa solia mai vei au na Turaga me ia kina na veivakatataki, me kakua ga na veivakarusai.
11Meu tinia, oi kemudou na veiwekani, mo dou vinaka! Mo dou vinaka taucoko, mo dou vakacegui sara, mo dou lomavata, mo dou veivinakati tiko; ia ena tiko vata kei kemudou na Kalou ni loloma kei na vakacegu. 12Dou veilomani ka veireguci e na yalosavasava. 13Sa loloma yani vei kemudou ko ira kecega era sa lotu.
14Me tiko vei kemudou kecega na yalololoma ni Turaga ko Jisu Karisito, kei na loloma ni Kalou, kei na veilomani ni Yalo Tabu. Emeni.
Currently Selected:
2 KORINICA 13: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
